Isaya 46:1-13
46 Beli anainama chini,+ Nebo anainama.
Sanamu zao zimewekwa juu ya wanyama, juu ya wanyama wanaobeba mizigo,+Kama mizigo inayowalemea wanyama waliochoka.
2 Wanainama na kujiinamisha pamoja;Hawawezi kuiokoa mizigo,*Nao wenyewe wanaenda utekwani.
3 “Nisikilize mimi, Ee nyumba ya Yakobo, nanyi nyote mnaobaki wa nyumba ya Israeli,+Ninyi niliowategemeza tangu mlipozaliwa na kuwabeba tangu tumboni.+
4 Hata utakapozeeka nitakuwa yuleyule;+Hata kichwa chako kikiwa na mvi nitaendelea kukubeba.
Kama nilivyofanya, nitakubeba na kukuchukua na kukuokoa.+
5 Mtanifananisha na nani au kunifanya niwe sawa na nani au kunilinganisha na nani,+Ili tufanane naye?+
6 Kuna wale wanaomwaga dhahabu kwa wingi kutoka kwenye mikoba yao;Wanapima fedha katika mizani.
Wanamwajiri mfua chuma, naye huitengeneza kuwa mungu.+
Kisha wanasujudu, naam, wanaiabudu.*+
7 Wanaiinua na kujitwika mabegani;+Wanaibeba na kuiweka mahali pake, nayo husimama papo hapo.
Haiondoki mahali pake.+
Wanaipazia sauti, lakini haiwajibu;Haiwezi kumwokoa yeyote kutoka katika taabu yake.+
8 Kumbukeni hilo, na mjipe ujasiri.
Litieni moyoni, ninyi wakosaji.
9 Kumbukeni mambo ya kwanza* ya zamani za kale,Kwamba mimi ni Mungu, na hakuna mwingine.
Mimi ni Mungu, na hakuna aliye kama mimi.+
10 Tangu mwanzo ninatabiri matokeo,Na tangu zamani za kale mambo ambayo bado hayajafanywa.+
Ninasema, ‘Uamuzi* wangu utasimama,+Nami nitafanya jambo lolote ninalopenda.’+
11 Ninamwita kutoka mashariki* ndege anayewinda,+Kutoka nchi ya mbali mtu atakayetekeleza uamuzi* wangu.+
Nimesema, nami nitalitimiza.
Nimekusudia, nami pia nitalitekeleza.+
12 Nisikilizeni, ninyi mlio na moyo mkaidi,*Ninyi mlio mbali sana na uadilifu.
13 Nimeuleta karibu uadilifu wangu;Hauko mbali sana,Na wokovu wangu hautakawia.+
Nitaleta wokovu katika Sayuni, na fahari yangu kwa Israeli.”+
Maelezo ya Chini
^ Yaani, sanamu zilizobebwa na wanyama.
^ Tnn., “wanaiinamia.”
^ Au “awali.”
^ Au “kusudi; shauri.”
^ Au “upande wa mapambazuko ya jua.”
^ Au “kusudi; shauri.”
^ Tnn., “moyo wenye nguvu.”
