Kwa nini tunafurahia sana makusanyiko yetu ya kila mwaka? Kama ilivyokuwa katika Israeli la kale, makusanyiko tunayofanya leo yanatupatia nafasi ya kumwabudu Yehova tukiwa na mamia na hata maelfu ya waamini wenzetu. Tunafurahia chakula kingi bora cha kiroho. Pia, tunathamini sana pindi hizo za kuwa pamoja na marafiki na watu wa familia. Uthamini wetu wenye kina hutusukuma kuhudhuria siku zote tatu za kusanyiko.

Tunapopata nafasi ya kukusanyika pamoja, hatupaswi kufikiria tu kuhusu jinsi sisi tutakavyofaidika, bali pia jinsi tunavyoweza kuwaonyesha wengine upendo. (Gal 6:10; Ebr 10:24, 25) Tunapomfungulia ndugu au dada mlango au tunapohifadhi viti tutakavyohitaji tu, tunaonyesha kwamba tunaangalia faida za wengine. (Flp 2:3, 4) Makusanyiko hutupatia nafasi nzuri ya kupata marafiki wapya. Kabla na baada ya programu na wakati wa mapumziko ya mchana, tunaweza kujiwekea lengo la kufahamiana na ndugu au dada ambaye tumekutana naye kwa mara ya kwanza. (2Ko 6:13) Katika pindi hizo, tunaweza kuanzisha urafiki utakaodumu milele! Zaidi ya yote, watu wanaotutazama wanapoona tukionyeshana upendo wa kweli, wanaweza kuamua kujiunga nasi kumtumikia Yehova.—Yoh 13:35.

TAZAMENI VIDEO YENYE KICHWA MAKUSANYIKO YA KIMATAIFA YA “UPENDO HAUSHINDWI KAMWE”! KISHA MJIBU MASWALI YAFUATAYO:

• Wajumbe walionyeshwaje upendo wakati wa makusanyiko ya kimataifa ya 2019?

• Kwa nini umoja na upendo ulio miongoni mwa watu wa Yehova ni wa pekee sana?

• Washiriki wa Baraza Linaloongoza walionyesha sehemu zipi za upendo wa Kikristo?

• Upendo wa Kikristo umewasaidiaje ndugu zetu nchini Ujerumani na Korea Kusini kuwa na umoja?

• Tunapaswa kuazimia kufanya nini?