MAISHA YA MKRISTO
Jitayarishe Sasa Kukabiliana na Dharura ya Kitiba
Kwa nini ujitayarishe? Kwa sababu unaweza kupatwa ghafla na dharura ya kitiba au ulazwe hospitalini bila kutarajia. Kwa hiyo, kabla ya dharura kutokea chukua hatua ili ufaidike na maandalizi yaliyotolewa kukusaidia kupata matibabu bora iwezekanavyo. Kwa kufanya hivyo, utaonyesha unaheshimu uhai na sheria ya Yehova kuhusu damu.—Mdo 15:28, 29.
Unaweza kujitayarishaje?
-
Sali na ujaze kwa makini kadi ya mamlaka ya kudumu ya uwakilishi (DPA). a Wahubiri waliobatizwa wanaweza kujipatia kadi ya DPA kutoka kwa mtumishi wa machapisho na pia Kadi ya Utambulisho (ic) kwa ajili ya watoto wao wadogo
-
Ikiwa wewe ni mjamzito, waombe wazee wa kutaniko lako nakala ya fomu Habari kwa Akina Mama Wajawazito (S-401). Hati hiyo itakusaidia kufanya maamuzi mazuri kuhusu masuala ya kitiba yanayoweza kutokea wakati wa ujauzito na unapojifungua
-
Ikiwa unahitaji kupata matibabu ambayo huenda yakahusisha suala la damu au kulazwa hospitalini, wajulishe wazee wa kutaniko lako mapema na uijulishe hospitali kwamba ungependa kutembelewa na mhudumu wa Mashahidi wa Yehova
Wazee wanaweza kukusaidiaje? Wanaweza kukusaidia kujaza kadi yako ya DPA. Hata hivyo, wazee hawatakufanyia maamuzi ya kitiba au kutoa maoni yao ya kibinafsi kuhusu mambo unayopaswa kujiamulia mwenyewe. (Ro 14:12; Gal 6:5) Unapowajulisha wazee wa kutaniko lako kwamba unakabili hali ya kitiba ambayo huenda ikahusisha damu, watawasiliana upesi na Halmashauri ya Uhusiano na Hospitali (HLC) kwa niaba yako.
HLC inaweza kukusaidiaje? Ndugu wanaotumikia kwenye HLC wamezoezwa kuwasaidia wataalamu wa kitiba na wanasheria kuelewa msimamo wetu wa kidini kuhusu damu. Wanaweza kuzungumza na daktari wako kuhusu mbinu mbalimbali za kitiba zinazoweza kutumiwa badala ya kutiwa damu mishipani. Ikihitajika wanaweza kukusaidia kupata daktari mwenye ushirikiano.
TAZAMENI VIDEO YENYE KICHWA JINSI YA KUFANYA MAAMUZI YA MATIBABU YANAYOHUSISHA DAMU, KISHA MJIBU MASWALI YAFUATAYO:
-
Umejifunza mambo gani katika video hii yanayoweza kukusaidia kujitayarisha kwa ajili ya dharura ya kitiba inayohusisha damu?
a Somo la 39 la kitabu Furahia Maisha Milele! linaweza kukusaidia kufanya maamuzi ya kitiba kuhusu damu.
