Pasaka ya mwisho ambayo Yesu angesherehekea ingekuwa muhimu sana. Kwa kuwa alikuwa karibu kufa, alipanga kula mlo wa Pasaka pamoja na mitume wake na kuanzisha mwadhimisho mpya wa kila mwaka, Mlo wa Jioni wa Bwana. Kwa hiyo, akamtuma Petro na Yohana kutayarisha chumba ambacho wangetumia. (Lu 22:7-13; ona picha kwenye jalada.) Hilo linatukumbusha umuhimu wa kujitayarisha kwa ajili ya Ukumbusho utakaofanyika Machi 27. Huenda tayari makutaniko yamefanya mipango kwa ajili ya msemaji, mifano, na mambo mengine. Hata hivyo, sisi binafsi tunaweza kufanya nini ili kujitayarisha kwa ajili ya Ukumbusho?

Tayarisha moyo wako. Soma na utafakari usomaji wa Biblia wa Ukumbusho. Ratiba inaweza kupatikana kwenye kijitabu cha Kuyachunguza Maandiko Kila Siku. Pia, Nyongeza B12-A na Nyongeza B12-B katika Biblia Takatifu—Tafsiri ya Ulimwengu Mpya iliyorekebishwa ina ratiba yenye habari nyingi zaidi. (Ona pia toleo la Daftari la Mkutano wa Huduma na Maisha la Aprili 2020.) Familia zinaweza kupata habari za kuzungumzia wakati wa ibada ya familia kuhusu umuhimu wa fidia kwa kuchunguza Fahirisi au Mwongozo wa Utafiti wa Mashahidi wa Yehova.

Waalike wengine wahudhurie. Shiriki kikamili katika kampeni ya kugawa mialiko. Fikiria wale unaoweza kuwaalika kama vile ziara za kurudia, wanafunzi wa Biblia wa zamani, marafiki, na watu wa ukoo. Wazee wanapaswa kukumbuka kuwaalika wasiotenda. Kumbuka kwamba ikiwa mtu haishi katika eneo lenu, unaweza kujua wakati na mahali ambapo Ukumbusho utafanywa katika eneo lake kwa kubofya tabo ya KUTUHUSU kwenye sehemu ya juu ya ukurasa wa mwanzo wa jw.org na kuteua “Ukumbusho.”

Tunaweza kufanya nini kingine ili kujitayarisha?