Teknolojia Inaathirije Ndoa Yako?
Inapotumiwa vizuri, teknolojia inaweza kuimarisha uhusiano kati ya mume na mke. Kwa mfano, inaweza kuwasaidia wawasiliane siku nzima.
Hata hivyo, baadhi ya wenzi wa ndoa wameruhusu matumizi mabaya ya teknolojia . . .
-
yawanyang’anye wakati wanaotumia pamoja.
-
yawachochee kufanya kazi za ofisini wakiwa nyumbani isivyo lazima.
-
yafanye wasiaminiane.
UNACHOPASWA KUJUA
KUTUMIA WAKATI PAMOJA
Mume anayeitwa Michael anasema hivi: “Wakati mwingine mimi na mke wangu tunakuwa pamoja, lakini hanikazii uangalifu. Anajishughulisha tu na simu yake, na ananiambia kwamba hakupata nafasi ya kuangalia jumbe na mambo mengine hadi sasa.” Mume anayeitwa Jonathan anasema kwamba katika hali kama hizo “wenzi wa ndoa wanaweza kuwa pamoja lakini kiakili kila mmoja yuko mbali sana na mwenzake.”
JAMBO LA KUFIKIRIA: Ni mara ngapi unaruhusu simu, ujumbe mfupi, au taarifa fulani kwenye simu iingilie muda ambao ungetumia pamoja na mwenzi wako?—WAEFESO 5:33.
KAZI
Baadhi ya watu wanafanya kazi ambazo zinawalazimu wajibu simu au barua pepe hata wakiwa nyumbani. Lakini si rahisi kwa watu wengine kuacha kazi zao kazini, hata ikiwa hawalazimiki kufanyia kazi nyumbani. Mwanamume anayeitwa Lee anakiri hivi: “Si rahisi kwangu kutojibu simu au ujumbe unaohusiana na kazi hata ikiwa utatumwa wakati ambao nilipanga niutumie pamoja na mke wangu.” Mwanamke anayeitwa Joy anasema hivi: “Ninafanyia kazi nyumbani, hivyo si rahisi kwangu kujua muda wa kuacha kufanya kazi. Ninajitahidi sana ili niwe na usawaziko.”
JAMBO LA KUFIKIRIA: Je, unamsikiliza kwa makini mume au mke wako anapozungumza nawe?—LUKA 8:18.
UAMINIFU
Utafiti mmoja ulisema kwamba ugomvi mwingi kwenye ndoa unatokana na kutilia shaka matumizi ya mitandao ya kijamii. Asilimia kumi ya waliofanyiwa utafiti walikiri kwamba waliweka mtandaoni vitu ambavyo hawataki wenzi wao wajue.
Watu wengi wanaamini kwamba mitandao ya kijamii ina mitego mingi hatari inayoweza kuvunja ndoa au hata kufanya iwe rahisi kwa wenzi wa ndoa kuwa wazinzi. Haishangazi mawakili wengi wanaoshughulikia mambo ya talaka wanasema kwamba mitandao ya kijamii imechangia kuvunjika kwa ndoa nyingi.
JAMBO LA KUFIKIRIA: Je, unamficha mwenzi wako mawasiliano unayofanya na mtu wa jinsia tofauti?—METHALI 4:23.
UNACHOWEZA KUFANYA
AMUA MAMBO YA KUTANGULIZA
Mtu anayepuuza kula chakula atakuwa na afya mbaya. Vivyo hivyo, si rahisi kwa mtu anayepuuza kutumia wakati pamoja na mume au mke wake, kuwa na ndoa nzuri.—Waefeso 5:28, 29.
KANUNI YA BIBLIA: “Mhakikishe mambo muhimu zaidi.”—WAFILIPI 1:10.
Weka alama kwenye mapendekezo ambayo ungependa kutumia, au andika mawazo yako kwenye sehemu iliyoachwa wazi yatakayosaidia ndoa yako isiathiriwe na teknolojia.
-
Kula angalau mlo mmoja pamoja kila siku
-
Kutenga muda hususa ambao hatutatumia vifaa vyetu
-
Kupanga muda au siku ya kufanya jambo lenye kufurahisha pamoja
-
Kuzima simu zetu usiku na kuziweka mbali na kitanda
-
Kutenga angalau dakika 15 kila siku za kuzungumza pamoja bila kuwa na vifaa vyetu vya kielektroni
-
Kupanga muda wa kuzima Intaneti
Huenda Ukapenda Pia
NDOA NA FAMILIA
Jinsi ya Kutumia Teknolojia kwa Usawaziko
Matumizi ya teknolojia yanaweza kuboresha au kudhoofisha ndoa yako. Yanaathirije ndoa yako?
NDOA NA FAMILIA
Jinsi ya Kuacha Kazi “Ibaki Kazini”
Madokezo matano yanayoweza kukusaidia usiruhusu kazi yako iingilie ndoa yako.
AMKENI!
Je, Unatumia Teknolojia Kwa Busara?
Jibu maswali manne rahisi yafuatayo ili ujue jinsi hali yako ilivyo.
