KANUNI YA BIBLIA: “Mtu asiyekasirika upesi ni bora kuliko mwanamume mwenye nguvu.”—Methali 16:32.

INAMAANISHA NINI: Tunapata manufaa tunapositawisha uwezo wa kudhibiti hisia zetu. Wakati mwingine tunaweza kukasirika kwa sababu fulani nzuri, lakini hasira isiyodhibitiwa inaweza kusababisha madhara makubwa. Watafiti wameeleza kwamba mara nyingi mtu anapokuwa na hasira husema au kufanya jambo ambalo baadaye hujutia.

MAMBO UNAYOWEZA KUFANYA: Jifunze kudhibiti hasira yako kabla hujafanya jambo ambalo unaweza kujutia. Ingawa watu fulani wanafikiri kwamba kuwa na hasira isiyodhibitiwa ni ishara ya uhodari, ukweli ni kwamba hiyo ni ishara ya udhaifu. Biblia inasema hivi: “Kama jiji lililobomolewa, lisilo na ukuta, ndivyo alivyo mtu asiyeweza kuidhibiti hasira yake.” (Methali 25:28) Njia bora ya kudhibiti hasira yako ni kujitahidi kupata habari kamili kabla ya kuchukua hatua yoyote. Biblia inasema hivi: “Ufahamu wa mtu hakika hutuliza hasira yake.” (Methali 19:11) Ni vizuri kuwasikiliza kwa makini watu wote wanaohusika, na hilo litakupa ufahamu ambao utatuliza hisia zako.

KANUNI YA BIBLIA: “Mjionyeshe kuwa wenye shukrani.”—Wakolosai 3:15.

INAMAANISHA NINI: Inasemekana kwamba mtu mwenye shukrani huwa na furaha. Hata wale ambao wamefiwa na mtu wanayempenda au kupoteza vitu vyenye thamani wanakubaliana na jambo hilo. Wanaeleza kwamba jambo lililowasaidia kukabiliana na hisia zao ni kuthamini mambo waliyo nayo, badala ya kukazia fikira vitu walivyopoteza.

 MAMBO UNAYOWEZA KUFANYA: Kila siku, andika orodha ya mambo ambayo umefurahia na kuthamini. Si lazima mambo hayo yawe makubwa. Yanaweza kuwa mambo madogo-madogo kama vile kuchomoza kwa jua, mazungumzo yenye kupendeza pamoja na mpendwa wako, au kwa sababu tu ya kuwa hai kwa siku nyingine. Ukitenga muda wa kufikiria na kuthamini mambo hayo mazuri, unaweza kuboresha hali yako ya kihisia.

Unaweza kunufaika sana ukifikiria hasa kwa nini unathamini familia yako na marafiki wako. Unapotambua mambo unayofurahia kuwahusu watu wengine, waambie mambo hayo kwa kuwaeleza moja kwa moja au kupitia barua, barua-pepe, au ujumbe wa simu. Hilo litafanya uimarishe uhusiano wako na wengine na utakuwa na furaha kwa sababu unafanya jambo fulani zuri kwa ajili ya wengine.​—Matendo 20:35.

EPUKA MABISHANO.

“Kuanzisha vita ni kama kufungua lango la mafuriko; kabla ugomvi haujalipuka, ondoka.”​—METHALI 17:14.

EPUKA WASIWASI USIO WA LAZIMA KUHUSU WAKATI UJAO.

“Msihangaike kamwe kuhusu kesho, kwa maana kesho itakuwa na mahangaiko yake yenyewe. Kila siku ina matatizo yake ya kutosha.”​—MATHAYO 6:34.

BADALA YA KUONGOZWA NA HISIA, FIKIRIA KWA MAKINI MAMBO YANAYOHUSIKA KABLA YA KUCHUKUA HATUA YOYOTE.

“Uwezo wa kufikiri utakukinga, na utambuzi utakulinda.”​—METHALI 2:11.