1. Wanadamu wote wanahitaji kufanya uamuzi gani muhimu?

 LEO watu wanahitaji kufanya uamuzi muhimu. Je, watamuunga mkono Yehova Mungu kuwa ndiye anayestahili kuutawala ulimwengu mzima, au watamuunga mkono adui yake mkubwa, Shetani Ibilisi? Ni lazima wachague upande mmoja. Uamuzi wowote watakaofanya utaamua ikiwa wataishi milele wakati ujao au la. (Mt. 25:31-33, 46) Wakati wa “dhiki kuu,” watatiwa alama ya kuokoka au kuangamizwa.​—Ufu. 7:14; 14:9-11, Eze. 9:4, 6.

2. (a) Andiko la Waebrania 10:35-39 linatutia moyo tufanye nini? (b) Kitabu cha Ufunuo kinaweza kutusaidiaje?

² Soma Waebrania 10:35-39. Ikiwa umechagua kuunga mkono utawala wa Yehova umefanya uamuzi wa hekima. Sasa unatamani kuwasaidia wengine wafanye uchaguzi sahihi. Ili kufanya hivyo, unaweza kutumia habari zinazopatikana katika kitabu cha Ufunuo. Kitabu hicho cha pekee kinafunua mambo yatakayowapata wale wanaompinga Yehova, lakini pia kinaonyesha baraka ambazo wale wanaounga mkono kwa ushikamanifu utawala wake watapata. Tunapaswa kujifunza kweli hizo muhimu. Kufanya hivyo kutaimarisha azimio letu la kuendelea kumtumikia Yehova. Pia, tunaweza kutumia mambo ambayo tumejifunza kuwasaidia wengine wafanye uamuzi sahihi na kushikamana nao.

3. Tutachunguza nini katika makala hii?

³ Katika makala hii, tutachunguza maswali haya: Wale wanaounga mkono utawala wa Mungu watapata nini? Kwa upande mwingine, ni nini kitakachowapata wale wanaochagua kumuunga mkono mnyama wa mwituni mwenye rangi nyekundu, anayetajwa katika kitabu cha Ufunuo?

4. Mtume Yohana anaona kikundi gani kikiwa na Yesu mbinguni?

⁴ Katika maono, mtume Yohana anaona vikundi viwili vinavyounga mkono utawala wa Yehova na kupata baraka za uzima wa milele. Kikundi cha kwanza ni wale 144,000. (Ufu. 7:4) Wamenunuliwa kutoka duniani ili wakafanyize serikali, au Ufalme, pamoja na Yesu mbinguni. Wakiwa pamoja naye, wanatawala juu ya dunia. (Ufu. 5:9, 10; 14:3, 4) Katika maono, Yohana anawaona wakiwa wamesimama pamoja na Yesu mbinguni kwenye Mlima Sayuni.—Ufu. 14:1.

5. Hivi karibuni itakuwaje kwa waliobaki kati ya wale 144,000?

⁵ Kwa karne nyingi, maelfu ya watu wamechaguliwa kuwa sehemu ya wale 144,000. (Luka 12:32; Rom. 8:17) Hata hivyo, Yohana aliambiwa kwamba ni idadi ndogo ya Wakristo watiwa-mafuta waliobaki, ambao watakuwa hai duniani katika siku za mwisho. Wale “waliobaki” watatiwa “muhuri” wa mwisho wa kibali cha Yehova kabla ya dhiki kuu kuanza. (Ufu. 7:2, 3; 12:17) Kisha, pindi fulani wakati wa dhiki kuu, Wakristo hao watiwa-mafuta watachukuliwa kwenda mbinguni ili wakaungane na wale wengine wanaofanyiza 144,000, ambao tayari walikufa wakiwa waaminifu. Wakiwa mbinguni watatawala pamoja na Yesu katika Ufalme wa Mungu.​—Mt. 24:31; Ufu. 5:9, 10.

6-7. (a) Yohana anaona kikundi gani kingine, nasi tunajifunza nini kukihusu? (b) Kwa nini watiwa-mafuta waliobaki na “umati mkubwa” wanapaswa kupendezwa na kitabu cha Ufunuo sura ya 7?

⁶ Baada ya kuona kile kikundi cha mbinguni, Yohana anaona “umati mkubwa.” Tofauti na wale 144,000, kikundi hiki hakiwezi kuhesabiwa. (Ufu. 7:9, 10) Tunajifunza nini kukihusu? Yohana aliambiwa hivi: “Hawa ndio wale wanaotoka katika ile dhiki kuu, nao wamefua kanzu zao na kuzifanya nyeupe katika damu ya Mwanakondoo.” (Ufu. 7:14) Baada ya kuokoka dhiki kuu, ‘umati huo mkubwa’ utaishi hapa duniani na kufurahia baraka nzuri kwelikweli.​—Zab. 37:9-11, 27-29; Met. 2:21, 22; Ufu. 7:16, 17.

⁷ Iwe tumechaguliwa kwenda mbinguni au kubaki hapa duniani, je, tunajiona katika ufafanuzi huo unaopatikana katika kitabu cha Ufunuo sura ya 7? Tunapaswa kujiona. Huo utakuwa wakati wenye kusisimua sana kwa vikundi hivyo viwili vya watumishi wa Mungu! Tutashangilia sana kwamba tulichagua kuunga mkono utawala wa Yehova. Kitabu cha Ufunuo kinatuambia jambo gani lingine kuhusu dhiki kuu?​—Mt. 24:21.

8. Dhiki kuu itaanzaje, na watu wengi watatendaje?

⁸ Kama ilivyotajwa katika makala iliyotangulia, hivi karibuni mifumo ya ulimwengu huu itamgeukia Babiloni Mkubwa, milki ya ulimwenguni pote ya dini za uwongo. (Ufu. 17:16, 17) Huo utakuwa mwanzo wa dhiki kuu. Je, hilo litafanya watu wengi waamue kuanza kumtumikia Yehova? Hapana. Kinyume chake, kitabu cha Ufunuo sura ya 6 kinaonyesha kwamba katika kipindi hicho muhimu, watu ambao hawamtumikii Yehova watatafuta ulinzi katika mifumo ya kisiasa na kibiashara ya ulimwengu huu, inayofananishwa na milima. Kwa kuwa watu hao hawataunga mkono Ufalme wa Mungu, Yehova atawaona kuwa wapinzani.​—Luka 11:23; Ufu. 6:15-17.

9. Watu wa Yehova watatendaje kwa njia tofauti wakati wa dhiki kuu, na kufanya hivyo kutakuwa na matokeo gani?

⁹ Kwa kweli, watumishi waaminifu wa Yehova watatenda kwa njia tofauti katika kipindi  hicho kigumu sana cha dhiki kuu. Bado wao watakuwa kikundi pekee cha watu duniani wanaomtumikia Yehova Mungu na kukataa kumuunga mkono “mnyama wa mwituni.” (Ufu. 13:14-17) Msimamo wao thabiti utawakasirisha wale wanaompinga Yehova. Matokeo yake ni kwamba muungano wa mataifa utawashambulia watu wa Mungu duniani kote. Shambulizi hilo lenye hasira lilitabiriwa kuwa shambulizi la Gogu wa Magogu.​—Eze. 38:14-16.

10. Kama inavyoonyeshwa kwenye Ufunuo 19:19-21, Yehova atatendaje baada ya watu wake kushambuliwa?

¹⁰ Yehova atatendaje baada ya shambulizi hilo kali? Anatuambia hivi: “Ghadhabu yangu kali itawaka.” (Eze. 38:18, 21-23) Sura ya 19 ya kitabu cha Ufunuo, inafafanua jambo litakalofuata. Yehova anamtuma Mwana wake kuwalinda watu Wake na kuwashinda maadui wao. Katika shambulizi hilo, Yesu atashirikiana na “majeshi ya mbinguni,” yaani, malaika waaminifu pamoja na wale 144,000. (Ufu. 17:14; 19:11-15) Matokeo ya vita hivyo yatakuwa nini? Kuwaangamiza kabisa wanadamu na mashirika yote yanayompinga Yehova!​—Soma Ufunuo 19:19-21.

11. Ni tukio gani la pekee sana linalotajwa katika kitabu cha Ufunuo?

¹¹ Hebu wazia jinsi wale watakaokuwa waaminifu duniani watahisi watakapookoka baada ya maadui wa Mungu kuharibiwa kabisa! Watashangilia sana wakati huo! Ingawa kutakuwa na kelele nyingi za shangwe mbinguni, Babiloni Mkubwa atakapokuwa akiharibiwa, kuna jambo lingine pia litakalotokeza shangwe kubwa zaidi. (Ufu. 19:1-3) Kwa kweli, hilo ni tukio la pekee sana katika kitabu cha Ufunuo​—“ndoa ya Mwanakondoo.”​—Ufu. 19:6-9.

12. Kama inavyoonyeshwa kwenye Ufunuo 21:1, 2, ndoa ya Mwanakondoo itafanywa lini?

¹² Ndoa hiyo itafanywa lini? Wale 144,000, wote watakuwa mbinguni muda mfupi kabla ya vita vya Har–Magedoni. Hata hivyo, huo hautakuwa wakati wa ndoa ya Mwanakondoo. (Soma Ufunuo 21:1, 2) Ndoa ya Mwanakondoo inafanywa baada ya vita vya Har–Magedoni kwisha na maadui wote wa Mungu kuondolewa.​—Zab. 45:3, 4, 13-17.

13. Ndoa ya Mwanakondoo inamaanisha nini hasa kwa wale wanaohusika?

¹³ Ndoa ya Mwanakondoo inamaanisha nini hasa kwa wale wanaohusika? Naam, kama tu ndoa inavyounganisha mwanamume na mwanamke pamoja, ndoa hiyo ya mfano inamuunganisha Mfalme, Yesu Kristo, pamoja na “bibi harusi” wake, yaani, wale 144,000. Kuanzia kwenye tukio hilo muhimu, wale 144,000 pamoja na Yesu wataanza kuitawala dunia kwa miaka 1,000.​—Ufu. 20:6.

14-15. Ufunuo sura ya 21 inawalinganisha wale 144,000 na nini? (Tazama picha kwenye jalada.)

¹⁴ Ufunuo sura ya 21 inawafananisha wale 144,000 na jiji maridadi sana linaloitwa “Yerusalemu Jipya.” (Ufu. 21:2, 9) Jiji hilo lina mawe 12 ya msingi ambayo yameandikwa “majina 12 ya mitume 12 wa Mwanakondoo.” Kwa nini Yohana alisisimuka kuona hilo? Ni kwa sababu aliona jina lake limeandikwa katika moja ya mawe hayo. Hilo ni pendeleo kubwa sana!​—Ufu. 21:10-14; Efe. 2:20.

¹⁵ Jiji hilo la mfano halifanani na jiji lingine lolote. Lina barabara kuu iliyotengenezwa kwa dhahabu safi, malango 12 ya lulu, kuta zake na misingi yake imepambwa kwa mawe ya thamani, na vipimo vyake vina usawaziko ulio kamili kabisa. (Ufu. 21:15-21) Hata hivyo, inaonekana kuna jambo linakosekana!  Ona kile ambacho Yohana anatuambia: “Sikuona hekalu ndani yake, kwa maana Yehova Mungu Mweza-Yote ndiye hekalu lake, na pia Mwanakondoo. Na lile jiji halihitaji jua wala mwezi kuliangazia, kwa maana utukufu wa Mungu uliliangazia, na taa yake ilikuwa yule Mwanakondoo.” (Ufu. 21:22, 23) Wale wanaofanyiza Yerusalemu Jipya watakuwa pamoja na Yehova. (Ebr. 7:27; Ufu. 22:3, 4) Hivyo, Yehova na Yesu ndio hekalu katika jiji hilo.

16. Itakuwaje kwa wanadamu wakati wa Utawala wa Miaka Elfu Moja ya Ufalme wa Mungu?

¹⁶ Wakristo watiwa-mafuta wanasisimuka sana wanapotafakari kuhusu jiji hilo. Wale walio na tumaini la kuishi duniani wanapaswa pia kupendezwa na jiji hilo. Wakati wa Utawala wa Miaka Elfu Moja wa Ufalme wa Mungu, Yerusalemu Jipya litaleta baraka nyingi sana duniani. Yohana anaona baraka hizo zikitiririka kama “mto wa maji ya uzima.” Na katika pande zote za mto huo kuna “miti ya uzima” inayotokeza majani ya “kuponya mataifa.” (Ufu. 22:1, 2) Kisha wanadamu wote watakaokuwa hai watapata fursa ya kunufaika na maandalizi hayo. Hatua kwa hatua, wanadamu wote watiifu watafikia ukamilifu. Hakutakuwa na magonjwa, maumivu, wala machozi ya huzuni.—Ufu. 21:3-5.

17. Kama Ufunuo 20:11-13 inavyoonyesha, ni nani watakaonufaika na ule Utawala wa Miaka Elfu Moja?

¹⁷ Ni nani watakaofaidika na maandalizi hayo mazuri sana? Kwanza kabisa ni umati mkubwa wa wale watakaookoka Har–Magedoni, pamoja na watoto wote ambao huenda watazaliwa katika ulimwengu mpya. Lakini Ufunuo sura ya 20 inaahidi pia kwamba wafu watafufuliwa. (Soma Ufunuo 20:11-13.) Watu waaminifu walio “waadilifu” ambao walikufa zamani, pamoja na wale “wasio waadilifu” ambao hawakupata fursa ya kutosha kujifunza kumhusu Yehova, watafufuliwa ili waishi duniani. (Mdo. 24:15; Yoh. 5:28, 29) Je, hilo linamaanisha kila mtu atafufuliwa aishi duniani wakati wa Utawala wa Miaka Elfu Moja? Hapana. Wale waliokataa kwa uasi fursa ya kumtumikia Yehova kabla ya kufa hawatafufuliwa. Walipata nafasi lakini wakathibitisha kwamba hawakustahili kuishi katika dunia Paradiso.​—Mt. 25:46; 2 The. 1:9; Ufu. 17:8; 20:15.

18. Hali itakuwaje duniani mwishoni mwa ile miaka 1,000?

¹⁸ Kufikia mwishoni mwa ile miaka 1,000, wale wote watakaokuwa wanaishi duniani watakuwa na uhai mkamilifu. Wote watakaokuwa hai hawataathiriwa tena na dhambi waliyorithi kutoka kwa Adamu. (Rom. 5:12) Laana inayotokana na dhambi ya Adamu itakuwa imeondolewa kabisa. Kwa njia hiyo, wale watakaokuwa duniani ‘watakuwa hai’ wakiwa wanadamu wakamilifu mwishoni mwa ile miaka 1,000.​—Ufu. 20:5.

19. Kwa nini kutakuwa na jaribu la mwisho?

¹⁹ Tunajua kwamba Yesu alipinga jitihada za Shetani za kumfanya avunje utimilifu wake. Aliendelea kuwa mwaminifu chini ya jaribu. Lakini je, wanadamu wote wakamilifu watakuwa tayari kuendelea kuwa waaminifu Shetani atakapopewa fursa ya kuwajaribu? Kila mmoja atajibu swali hilo yeye mwenyewe Shetani atakapoachiliwa huru kutoka katika shimo refu lisilo na mwisho mwishoni mwa ile miaka 1,000. (Ufu. 20:7) Wale watakaothibitika kuwa waaminifu wakati wa jaribu la mwisho watapata uzima wa milele na hatimaye watafurahia uhuru wa kweli. (Rom. 8:21) Wale watakaoasi wataharibiwa milele, pamoja na Ibilisi na roho wake waovu.​—Ufu. 20:8-10.

20. Unahisije kuhusu unabii wenye kusisimua unaopatikana kwenye kitabu cha Ufunuo?

²⁰ Unahisije baada ya kuchunguza kifupi habari za kitabu cha Ufunuo? Je, husisimuki kujiona katika unabii huo wenye kustaajabisha? Je, hilo halikufanyi utake kuwaalika wengine waungane nawe katika ibada safi ya Mungu wetu? (Ufu. 22:17) Akili na mioyo yetu inapoguswa na matukio hayo yenye kustaajabisha ya wakati ujao, bila shaka tunachochewa kurudia maneno ya mtume Yohana aliyesema: “Amina! Njoo, Bwana Yesu.”​—Ufu. 22:20.