MAKALA YA 33
Yehova Anawalinda Watu Wake
“Jicho la Yehova linawalinda wale wanaomwogopa.”—ZAB. 33:18.
WIMBO 4 “Yehova Ni Mchungaji Wangu”
MUHTASARI *
1. Kwa nini Yesu alimwomba Yehova awalinde wafuasi wake?
USIKU kabla ya kifo chake, Yesu alimtolea Baba yake wa mbinguni ombi la pekee. Alimwomba Yehova awalinde wafuasi wake. (Yoh. 17:15, 20) Bila shaka, sikuzote Yehova amewalinda watu wake, yaani, amewajali na kuwakazia uangalifu. Hata hivyo, Yesu alijua kwamba wafuasi wake wangekabili upinzani mkali kutoka kwa Shetani. Pia, Yesu alitambua kwamba wangehitaji msaada wa Yehova ili kupinga mashambulizi ya uovu kutoka kwa Ibilisi.
2. Kulingana na Zaburi 33:18-20, kwa nini hatuhitaji kuogopa tunapokabili hali ngumu?
2 Leo, Wakristo wanakabili matatizo mengi sana katika mfumo huu wa Shetani. Tunakabili hali ngumu ambazo zinaweza kutuvunja moyo na hata kujaribu ushikamanifu wetu kwa Yehova. Lakini kama tutakavyoona katika makala hii, hatupaswi kuogopa chochote. Yehova anatulinda—anaona changamoto tunazokabili, na sikuzote yuko tayari kutusaidia kukabiliana na hali hizo. Acheni tuchunguze mifano miwili katika Biblia inayoonyesha jinsi Yehova ‘anavyowalinda wale wanaomwogopa.’—Soma Zaburi 33:18-20.
TUNAPOHISI TUKO PEKE YETU
3. Ni nyakati gani ambazo huenda tukahisi tuko peke yetu?
3 Ingawa sisi ni sehemu ya familia kubwa ya waabudu wa Yehova, wakati mwingine huenda tukahisi tuko peke yetu. Kwa mfano, huenda vijana wakahisi wako peke yao wanapoeleza imani yao mbele ya wanafunzi wenzao shuleni, au wanapohamia katika kutaniko jipya. Huenda baadhi yetu tukahisi tumehuzunika au huenda tunapambana na hisia za kuvunjika moyo, tukifikiri kwamba tunahitaji kukabiliana na hisia hizo sisi wenyewe. Tunaweza kusita kuwaeleza wengine jinsi tunavyohisi kwa sababu tuna wasiwasi kwamba huenda wasituelewe. Na wakati mwingine, huenda tukajiuliza ikiwa kweli kuna mtu yeyote anayejali. Hata iwe hisia za upweke zinasababishwa na nini, zinaweza kutusababishia mahangaiko na kutufanya tuhisi kwamba hakuna mtu wa kutusaidia. Yehova hataki kamwe tuhisi hivyo. Kwa nini tunasema hivyo?
4. Kwa nini nabii Eliya alisema: “Nimebaki mimi peke yangu”?
4 Fikiria mfano wa mwanamume mwaminifu Eliya. Yezebeli alikuwa ameazimia kumuua, basi kwa zaidi ya siku 40, Eliya alikuwa akikimbia ili kuokoa uhai wake. (1 Fal. 19:1-9) Baadaye, akiwa peke yake kwenye pango, alimlilia hivi Yehova: “Nimebaki mimi peke yangu [nikiwa nabii].” (1 Fal. 19:10) Kulikuwa na manabii wengine katika nchi hiyo; Obadia alikuwa amefaulu kuwaokoa manabii 100 ili wasiuawe na Yezebeli. (1 Fal. 18:7, 13) Basi, kwa nini Eliya alihisi yuko peke yake? Je, alifikiri kwamba manabii ambao Obadia aliwaokoa walikuwa wameuawa? Je, alijihisi yuko peke yake kwa sababu wengine hawakujiunga naye kumtumikia Yehova baada ya Yehova kuthibitisha yeye ni Mungu wa kweli kwenye Mlima Karmeli? Je, huenda alihisi kwamba hakuna mtu aliyejua hatari kubwa aliyokabili, au alifikiri kwamba hakuna mtu anayemjali? Simulizi hilo halielezi kikamili hisia za Eliya. Lakini jambo tunalojua kwa hakika ni kwamba Yehova alielewa jinsi Eliya alivyohisi, na alijua kihususa jinsi ya kumsaidia.
Tunapohisi kwamba tuko peke yetu, tunaweza kujifunza mambo gani yenye kufariji kutokana na jinsi Yehova alivyomfariji Eliya? (Tazama fungu la 5 na 6)
5. Yehova alimhakikishiaje Eliya kwamba hakuwa peke yake?
5 Yehova alimsaidia Eliya kwa njia mbalimbali. Alimtia moyo Eliya ajieleze. Alimuuliza Eliya hivi mara mbili: “Unafanya nini hapa?” (1 Fal. 19:9, 13) Kila mara, Yehova alimsikiliza Eliya alipommiminia moyo wake. Yehova alimjibu Eliya kwa kumwonyesha kuwepo Kwake na nguvu zake nyingi. Pia, alimhakikishia Eliya kwamba kulikuwa na waabudu wengine wengi wa Yehova. (1 Fal. 19:11, 12, 18) Bila shaka, Eliya alifarijika baada ya kummiminia Yehova moyo wake na kusikia jibu Lake. Yehova alimpa Eliya migawo kadhaa muhimu. Alimwambia amtie mafuta Hazaeli awe mfalme wa Siria, Yehu awe mfalme wa Israeli, na Elisha awe nabii. (1 Fal. 19:15, 16) Kwa kumpa Eliya migawo hiyo, Yehova alimsaidia akazie fikira mambo yanayofaa. Pia, Mungu alimpa Eliya nabii mwingine ambaye angeshirikiana naye, yaani, Elisha. Unawezaje kupokea msaada wa Yehova unapohisi uko peke yako?
6. Unaweza kusali kuhusu nini unapohisi uko peke yako? (Zaburi 62:8)
6 Yehova anakualika usali kwake. Anaona mambo unayokabili na anakuhakikishia kwamba atasikiliza sala zako wakati wowote. (1 The. 5:17) Anafurahia kusikiliza sala za waabudu wake. (Met. 15:8) Unaweza kusali kuhusu nini unapohisi uko peke yako? Kama Eliya alivyofanya, mmiminie Yehova moyo wako. (Soma Zaburi 62:8.) Mwambie kuhusu mahangaiko yako na jinsi unavyohisi. Mwombe Yehova akusaidie kukabiliana na hisia zako. Kwa mfano, unapohisi uko peke yako na kuogopa unapotoa ushahidi shuleni, mwombe Yehova akupatie ujasiri ili ufaulu kujieleza. Pia, unaweza kumwomba akupe hekima ili ueleze imani yako kwa busara. (Luka 21:14, 15) Ikiwa unapambana na hisia za kuvunjika moyo, mwombe Yehova akusaidie ili uzungumze na Mkristo mkomavu kuhusu hisia zako. Unaweza kumwomba Yehova amsaidie yule anayekusikiliza aelewe jinsi unavyohisi. Mmiminie Yehova moyo wako, tambua jinsi anavyojibu sala zako, na ukubali msaada kutoka kwa wengine; na hivyo utapunguza hisia za upweke.
Je, unatafuta njia za kupanua huduma yako na kushiriki katika huduma pamoja na wengine? (Tazama fungu la 7)
7. Unajifunza nini kutokana na mfano wa Mauricio?
7 Yehova ametupatia sisi sote kazi muhimu. Unaweza kuwa na hakika kwamba anatambua na kuthamini mambo yote unayofanya ili kutimiza migawo yako kutanikoni na katika huduma. (Zab. 110:3) Kuwa na bidii katika kazi hiyo kunaweza kukusaidiaje unapohisi upweke? Fikiria mfano wa ndugu kijana anayeitwa Mauricio. * Muda mfupi baada ya Mauricio kubatizwa, mmoja wa rafiki zake wa karibu alianza kuacha kweli hatua kwa hatua. Mauricio anasema hivi: “Kuona jambo hilo kulifanya niache kujiamini. Nilijiuliza kama ningeweza kuishi kulingana na wakfu wangu na kuendelea kubaki katika familia ya Yehova. Nilihisi niko peke yangu na hakuna yeyote anayeweza kuelewa hisia zangu.” Ni nini kilichomsaidia Mauricio? Anasema hivi: “Nilipanua huduma yangu. Hilo lilinisaidia nisijifikirie mimi mwenyewe tu na kuacha kukazia fikira hisia za kuvunjika moyo. Kushirikiana na wengine katika huduma kuliniletea furaha na kupunguza hisia zangu za upweke.” Kwa kweli, hata kama hatuwezi kuhubiri ana kwa ana pamoja na wahubiri wenzetu, tunaimarishwa kwa kushirikiana nao katika utendaji kama vile kuandika barua na mahubiri ya simu. Ni nini kingine ambacho kilimsaidia Mauricio? Anaongeza hivi: “Nilikuwa na shughuli nyingi kutanikoni. Nilitayarisha na kutoa migawo yangu ya wanafunzi kwa moyo wote. Migawo hiyo ilinifanya nihisi ninathaminiwa na Yehova na wengine pia.”
TUNAPOHISI TUMELEMEWA NA MAJARIBU MAKALI
8. Majaribu makali yanaweza kutuathirije?
8 Tunatarajia kwamba tutakabili majaribu katika siku hizi za mwisho. (2 Tim. 3:1) Lakini huenda tusitarajie kupatwa na aina fulani ya jaribu au huenda likatokea wakati tusiotarajia. Huenda ghafla tukakabili hali ngumu za kiuchumi, tukagunduliwa kwamba tuna ugonjwa mbaya, au tukampoteza mtu tunayempenda katika kifo. Wakati kama huo, huenda tukahisi mkazo mkubwa na kulemewa, hasa ikiwa inaonekana kwamba tunakabili jaribu moja baada ya lingine au hata majaribu mengi kwa wakati mmoja. Hata hivyo, kumbuka kwamba Yehova anaona hali tunazopitia na kwa msaada wake tunaweza kukabili jaribu lolote tukiwa na uhakika.
9. Fafanua baadhi ya majaribu ambayo Ayubu alikabili.
9 Fikiria jinsi Yehova alivyomsaidia mwanamume mwaminifu Ayubu. Alikabili majaribu mengi yenye kuumiza kwa muda mfupi. Katika kipindi cha siku moja, Ayubu alipata habari kuhusu matukio hatari na yenye kushtua ambayo yalisababisha vifo vya mifugo yake, watumishi wake, na jambo baya hata zaidi, watoto wake wapendwa walikufa. (Ayu. 1:13-19) Muda mfupi baadaye, alipokuwa bado anaomboleza, Ayubu alipatwa na ugonjwa uliomsababishia maumivu makali na majipu mwilini. (Ayu. 2:7) Hali ya Ayubu ilikuwa mbaya sana hivi kwamba akasema: “Ninachukia maisha yangu; sitaki kuendelea kuishi.”—Ayu. 7:16.
Ili kumhakikishia Ayubu kwamba anampenda, Yehova alizungumza naye kuhusu njia nyingi ambazo anatunza uumbaji wake (Tazama fungu la 10)
10. Yehova alimsaidiaje Ayubu avumilie majaribu yake? (Tazama picha kwenye jalada.)
10 Yehova aliona mambo ambayo Ayubu alipitia. Kwa kuwa Yehova alimpenda, alimpa msaada aliohitaji ili avumilie majaribu yake kwa mafanikio. Yehova alizungumza na Ayubu, na akamkumbusha kuhusu hekima Yake isiyo na kifani na upendo wake kuelekea viumbe Wake. Alizungumza kuhusu wanyama wengi wenye kustaajabisha. (Ayu. 38:1, 2; 39:9, 13, 19, 27; 40:15; 41:1, 2) Yehova pia alimtumia mwanamume mwaminifu kijana aliyeitwa Elihu, kumwimarisha na kumfariji Ayubu. Elihu alimhakikishia kwamba sikuzote Yehova huwathawabisha waabudu wake kwa sababu ya uvumilivu wao. Lakini pia, Yehova alimchochea Elihu ampe shauri lenye upendo. Elihu alimsaidia Ayubu akazie fikira jambo muhimu zaidi kwa kumkumbusha kwamba yeye ni mdogo sana kwa kulinganishwa na Yehova Muumba wa ulimwengu wote. (Ayu. 37:14) Pia, Yehova alimpa Ayubu mgawo. Alimwambia asali kwa ajili ya rafiki zake watatu waliokuwa wamefanya dhambi. (Ayu. 42:8-10) Yehova anatusaidiaje leo tunapokabili majaribu magumu?
11. Biblia inawezaje kutufariji tunapokabili majaribu?
11 Yehova hazungumzi nasi moja kwa moja kama alivyozungumza na Ayubu, lakini anazungumza nasi kupitia Neno lake, Biblia. (Rom. 15:4) Anatufariji kwa kutupatia tumaini la wakati ujao. Fikiria baadhi ya mistari iliyo katika Biblia ambayo inaweza kutufariji tunapokabili majaribu. Katika Maandiko, Yehova anatuhakikishia kwamba hakuna jambo lolote—kutia ndani majaribu makali—linaloweza “kututenga na upendo [wake].” (Rom. 8:38, 39) Pia, anatuhakikishia kwamba yuko karibu na “wote wanaomwitia” katika sala. (Zab. 145:18) Yehova anatuambia kwamba ikiwa tutamtegemea tunaweza kuvumilia jaribu lolote na kuwa na furaha hata ingawa tunateseka. (1 Kor. 10:13; Yak. 1:2, 12) Pia, Neno la Mungu linatukumbusha kwamba majaribu yetu ni ya muda mfupi kwa kulinganishwa na thawabu ya kuishi milele ambayo anatuahidi. (2 Kor. 4:16-18) Yehova anatupatia tumaini hakika kwamba ataondoa chanzo kikuu cha majaribu yetu yote, yaani, Shetani Ibilisi na wale wanaoiga njia zake za uovu. (Zab. 37:10) Je, umekariri baadhi ya mistari ya Biblia inayoweza kukusaidia uvumilie majaribu wakati ujao?
12. Yehova anataka tufanye nini ili tunufaike kikamili na Neno lake?
12 Yehova anataka tutenge wakati wa kujifunza Biblia kwa ukawaida na kutafakari kwa makini mambo tunayosoma. Tunapotumia mambo tunayojifunza, imani yetu inaimarika na tunamkaribia zaidi Baba yetu wa mbinguni. Matokeo ni kwamba tunapata nguvu za kuvumilia majaribu. Pia, Yehova huwapa roho takatifu wale wanaotegemea Neno lake. Na roho hiyo inaweza kutupatia “nguvu zinazopita zile za kawaida” ili tuvumilie jaribu lolote.—2 Kor. 4:7-10.
13. Chakula cha kiroho ambacho kinaandaliwa na “mtumwa mwaminifu na mwenye busara” kinatusaidiaje kuvumilia majaribu?
13 Kwa msaada wa Yehova, “mtumwa mwaminifu na mwenye busara” anatokeza kwa wingi makala, video, na muziki unaoweza kutusaidia kujenga imani yenye nguvu na kuendelea kuwa macho kiroho. (Mt. 24:45) Tunapaswa kutumia kikamili maandalizi hayo yanayotolewa kwa wakati unaofaa. Hivi karibuni, dada mmoja kutoka nchini Marekani alitoa shukrani kwa ajili ya chakula hicho cha kiroho. Alisema hivi: “Katika kipindi cha miaka 40 ambayo nimekuwa nikimtumikia Yehova, utimilifu wangu umejaribiwa tena na tena.” Alikabili majaribu makali—babu yake aliuawa na dereva aliyekuwa amelewa, wazazi wake walikufa kwa sababu ya ugonjwa hatari, naye alikabiliana na ugonjwa wa kansa mara mbili. Ni nini kilichomsaidia kuvumilia? Alisema hivi: “Sikuzote Yehova amenitunza. Chakula cha kiroho ambacho ametuandalia kupitia mtumwa mwaminifu na mwenye busara kimenisaidia kuvumilia. Kwa sababu ya chakula hicho, ninahisi kama Ayubu, aliyesema hivi: ‘Mpaka nitakapokufa, sitaukana utimilifu wangu!’”—Ayu. 27:5.
Tunawezaje kuwasaidia wengine kutanikoni? (Tazama fungu la 14)
14. Yehova anawatumiaje waabudu wenzetu kutusaidia tunapokabili majaribu? (1 Wathesalonike 4:9)
14 Yehova amewazoeza watu wake kupendana na kufarijiana wakati wa matatizo. (2 Kor. 1:3, 4; soma 1 Wathesalonike 4:9.) Kwa kumwiga Elihu, ndugu na dada zetu wako tayari kutusaidia tuendelee kuwa waaminifu tunapokabili hali ngumu. (Mdo. 14:22) Kwa mfano, fikiria jinsi Diane alivyotiwa moyo na akina ndugu na dada kutanikoni na kusaidiwa kuendelea kuwa na nguvu kiroho baada ya mume wake kupata tatizo kubwa la afya. Alisema hivi: “Hali ilikuwa ngumu. Lakini tulihisi mkono wa Yehova wenye nguvu na upendo katika kipindi cha miezi hiyo migumu. Kutaniko letu lilitusaidia kwa njia mbalimbali. Walitutembelea, walitupigia simu, na walitukumbatia, mambo ambayo tulihitaji ili tuendelee kuvumilia. Kwa kuwa siendeshi gari, akina ndugu na dada walihakikisha kwamba nilifika mikutanoni na kwenye utumishi wa shambani nilipoweza.” Ni baraka kubwa kuwa katika familia hii ya kiroho yenye upendo!
TUNATHAMINI UTUNZAJI WENYE UPENDO WA YEHOVA
15. Kwa nini tuna uhakika kwamba tunaweza kukabiliana na hali ngumu?
15 Sisi sote tutakabili majaribu ya aina fulani. Hata hivyo, kama tulivyojifunza, hatutakuwa peke yetu tutakapokabili majaribu hayo. Kama baba mwenye upendo, sikuzote Yehova anatujali na kuhangaikia hali yetu. Yuko karibu nasi, akiwa tayari kusikiliza sala zetu za kuomba msaada na anatamani kutusaidia. (Isa. 43:2) Tuna uhakika kwamba tunaweza kukabiliana na hali ngumu kwa sababu anatupatia kwa ukarimu kila kitu tunachohitaji ili tuvumilie. Ametupatia zawadi ya sala, Biblia, chakula kingi cha kiroho, na undugu wenye upendo ili kutusaidia tunapokuwa na uhitaji.
16. Tunawezaje kuendelea kuwa chini ya utunzaji wenye upendo wa Yehova?
16 Tunashukuru sana kwamba tuna Baba wa mbinguni ambaye anatulinda! “Mioyo yetu hushangilia kwa sababu yake.” (Zab. 33:21) Tunaweza kumwonyesha Yehova kwamba tunathamini utunzaji wake wenye upendo kwa kutumia kikamili mambo yote anayotuandalia ili kutusaidia. Pia, tunapaswa kujitahidi ili tuendelee kubaki chini ya utunzaji wa Yehova. Kwa maneno mengine, ikiwa tutaendelea kujitahidi kabisa kumtii Yehova na kufanya mambo yaliyo sawa machoni pake, ataendelea kutulinda milele!—1 Pet. 3:12.
WIMBO 30 Baba Yangu, Mungu Wangu, Rafiki Yangu