Hapana. Mambo ambayo Daudi aliandika ni ya kweli na sahihi.

Fikiria mambo aliyoandika kwenye mstari huo na mistari inayofanana na mstari huo: “Nitaliimbia sifa jina lako milele ninapotimiza nadhiri zangu siku baada ya siku.” “Ninakusifu, Ee Yehova Mungu wangu, kwa moyo wangu wote, nami nitalitukuza jina lako milele.” “Nitalisifu jina lako milele na milele.”—Zab. 61:8; 86:12; 145:1, 2.

Daudi alipoandika maneno hayo hakuwa akifikiri kwamba hatakufa kamwe. Alijua Yehova alikuwa amesema kwamba dhambi ya wanadamu ingetokeza kifo, na Daudi alikiri kwamba alikuwa mtenda dhambi. (Mwa. 3:3, 17-19; Zab. 51:4, 5) Alijua kwamba hata wanaume ambao walikuwa na kibali cha Mungu, kama vile Abrahamu, Isaka, na Yakobo, walikuwa wamekufa. Na Daudi alijua kwamba hatimaye yeye pia angekufa. (Zab. 37:25; 39:4) Lakini maneno yake yanayopatikana kwenye Zaburi 61:8 yalionyesha tamaa na azimio lake la kumsifu Mungu milele, yaani, katika maisha yake yote.​—2 Sam. 7:12.

Baadhi ya mambo ambayo Daudi aliandika ni mambo ambayo alijionea maishani, kama tunavyoona kwenye utangulizi wa Zaburi 18, 51, na 52. Kwenye Zaburi 23, Daudi ambaye yeye pia alikuwa mchungaji, alimfafanua Yehova kuwa mchungaji ambaye huandaa mwongozo, burudisho, na ulinzi. Hilo lilimfanya Daudi atamani kumtumikia Mungu ‘sikuzote za maisha yake.’​—Zab. 23:6.

Pia, kumbuka kwamba Yehova ndiye aliyemwongoza Daudi kuandika maneno hayo. Mambo aliyoandika yalitia ndani unabii kuhusu mambo ambayo yangetokea baadaye. Kwa mfano, kwenye Zaburi 110, Daudi alitaja kuhusu wakati ambao Bwana wake ‘angeketi kwenye mkono wa kuume wa Mungu’ huko mbinguni na kupokea mamlaka kubwa. Ili afanye nini? Ili awatiishe maadui wa Mungu na ‘atekeleze hukumu dhidi ya mataifa’ duniani. Daudi alikuwa babu ya Masihi, ambaye angetawala akiwa mbinguni na ambaye angekuwa “kuhani milele.” (Zab. 110:1-6) Yesu alithibitisha kwamba unabii ulio kwenye Zaburi 110 ulimhusu na kwamba ungetimizwa wakati ujao.​—Mt. 22:41-45.

Naam, Daudi aliongozwa na roho kuandika kuhusu wakati wake na pia wakati ujao ambapo angefufuliwa na angefurahia kumsifu Yehova milele. Hilo linatusaidia kuona kwamba andiko la Zaburi 37:10, 11, 29 linaweza kueleweka kama ufafanuzi wa hali ambazo zilikuwepo katika Israeli la kale na pia hali ambazo zitakuwepo ulimwenguni pote wakati ujao Mungu atakapotimiza ahadi zake.​—Tazama fungu la 8 kwenye makala “Utakuwa Pamoja Nami Katika Paradiso” kwenye gazeti hili.

Basi, Zaburi 61:8 na mistari mengine kama hiyo inaonyesha kwamba Daudi alitaka kumsifu Yehova katika Israeli la kale hadi wakati ambapo angekufa. Na pia, inaonyesha mambo ambayo Daudi ataweza kufanya wakati ujao Yehova atakapomfufua.