JE, UMEWAHI kuhisi kwamba unahitaji kukabiliana na matatizo ukiwa peke yako? Tunaishi katika “nyakati za hatari zilizo ngumu kushughulika nazo” ambazo zinaweza kutufanya tuhisi tumevunjika moyo na tuko peke yetu. (2 Tim. 3:1) Hata hivyo, hatuhitaji kukabiliana na changamoto za maisha peke yetu. Biblia inakazia umuhimu wa kuwa na marafiki wa kweli katika “nyakati za taabu.”—Met. 17:17.

Mtume Paulo alinufaika kutokana na urafiki wake pamoja na wale aliosafiri nao. (Kol. 4:​7-11) Paulo alipofungwa huko Roma, rafiki zake walitimiza kazi ambazo Paulo alishindwa kutimiza. Kwa mfano, Epafrodito alimpelekea Paulo vitu alivyohitaji ambavyo akina ndugu na dada huko Filipi walituma. (Flp. 4:18) Tikiko alipeleka barua za Paulo kwenye makutaniko mbalimbali. (Kol. 4:7) Kwa msaada wa rafiki zake, Paulo aliendelea kutimiza huduma yake licha ya kuwa katika kifungo cha nyumbani au kuwa peke yake gerezani. Wewe unawezaje kuwa rafiki wa kweli?

Mifano mbalimbali ya siku zetu inaonyesha umuhimu wa kuwa rafiki wa kweli. Fikiria mfano wa dada ambaye alithibitika kuwa rafiki ya Elisabet, painia wa kawaida nchini Hispania. Mama ya Elisabet alipogunduliwa kuwa ana ugonjwa wa kansa ambao ungemsababishia kifo, dada huyo alimtumia Elisabet jumbe nyingi za simu zenye kutia moyo zilizotegemea mistari ya Biblia. Elisabet anasema hivi: “Jumbe hizo zilinitia moyo na kunisaidia kukabili changamoto za kila siku bila kuhisi upweke.”—Met. 18:24.

Tunaweza kuimarisha urafiki wetu pamoja na waabudu wenzetu kwa kuwaunga mkono katika utendaji mbalimbali kutanikoni. Kwa mfano, je, unaweza kujitolea kumpeleka ndugu au dada mwenye umri mkubwa kwenye mkutano au kwenye huduma? Ikiwa utafanya hivyo, utafurahia ubadilishanaji wa kitia moyo. (Rom. 1:​12, maelezo ya chini) Hata hivyo, baadhi ya Wakristo hawawezi kuondoka nyumbani. Tunawezaje kuwa marafiki wao wa kweli?

Baadhi ya waabudu wenzetu wana matatizo ya afya yanayowazuia kuhudhuria mikutano uso kwa uso. Fikiria mfano wa David aliyegunduliwa na aina ya kansa inayoitwa lymphoma. Kwa zaidi ya miezi sita, alikuwa akipata matibabu kwa ajili ya ugonjwa wake. Wakati huo wote, David na mke wake, Lidia, walihudhuria mikutano kupitia video mtandaoni.

Walipokea msaada gani kutoka kwa marafiki wao kutanikoni? Baada ya kila mkutano, baadhi ya wale waliokuwa kwenye Jumba la Ufalme walijitahidi  kuzungumza na David na Lidia kwa njia ya video. Kwa kuongezea, David na Lidia walipotoa maelezo, baadaye walipokea jumbe za simu zenye kutia moyo kutoka kwa waabudu wenzao. Matokeo yalikuwa nini? David na Lidia hawakuhisi wakiwa peke yao.

Je, tunaweza kushiriki katika huduma pamoja na wale ambao hawawezi kuondoka nyumbani? Tunapobadili ratiba yetu kidogo, tunaweza kuonyesha kwamba hatujawasahau wale ambao wanakabili changamoto hiyo. (Met. 3:27) Kwa nini usipange kuhubiri nao kwa njia ya barua au simu? Wale ambao hawawezi kuondoka nyumbani wanaweza kushiriki katika mikutano ya utumishi wa shambani kupitia video mtandaoni. David na Lidia walithamini mpango huo. David anasema hivi: “Kuwa tu pamoja na kikundi chetu cha utumishi kwa ajili ya mazungumzo mafupi na sala kulituchochea sana.” Zaidi ya hilo, ikiwa hali ni salama na inafaa kufanya hivyo, je, pindi fulani unaweza kupanga kumleta mwanafunzi wako wa Biblia nyumbani kwa mhubiri ambaye hawezi kutoka nje ili kuongoza funzo hilo hapo?

Tunapofanya kazi pamoja na ndugu na dada zetu ambao hawawezi kuondoka nyumbani na kujionea sifa zao zenye kuvutia, tunakuwa marafiki wa karibu zaidi. Kwa mfano, unaposhiriki katika huduma pamoja na wahubiri hao na kuona jinsi wanavyotumia Neno la Mungu kwa ustadi ili kuufikia moyo wa mtu, utavutiwa nao hata zaidi. Unapowaunga mkono waabudu wenzako katika utendaji wa kiroho, unaweza kuwa na marafiki wengi zaidi wa karibu.—2 Kor. 6:13.

Paulo alipata faraja kwa kuwa pamoja na Tito, rafiki yake. (2 Kor. 7:​5-7) Simulizi hilo linatukumbusha kwamba tunaweza kuandaa faraja, si tu kwa kuwaonyesha huruma wale wanaohitaji msaada, bali pia, kwa kuwa pamoja nao na kufanya yote tunayoweza ili kuwategemeza.—1 Yoh. 3:18.

Ndugu na dada zetu nchini Urusi wametuwekea kielelezo kizuri cha kutegemezana. Fikiria kisa cha Sergey na Tatyana, mke wake. Baada ya nyumba yao kupekuliwa na polisi, walipelekwa kituoni ili wahojiwe. Tatyana aliachiliwa kwanza na kurudi nyumbani. Sergey anasema, “Baada tu ya [Tatyana] kufika nyumbani, dada mmoja mwenye ujasiri alifika mlangoni kwetu. Marafiki wengine zaidi walikuja kutusaidia kupanga nyumba yetu.”

Sergey anaongezea hivi: “Sikuzote nimetiwa moyo na andiko la Methali 17:​17, linalosema: ‘Rafiki wa kweli hupenda nyakati zote naye ni ndugu ambaye amezaliwa kwa ajili ya nyakati za taabu.’ Maneno hayo yana maana kubwa hata zaidi kwangu wakati huu wa mateso ninaposhindwa kuvumilia nikiwa peke yangu. Yehova amenipa marafiki wanaonitegemeza bila woga.” a

Kadiri tunavyokabili hali ngumu hata zaidi, ndivyo tunavyohitaji marafiki ambao watatutegemeza. Tutawahitaji hata zaidi katika dhiki kuu. Hivyo, acheni tujitahidi kadiri tuwezavyo kuwa marafiki wa kweli sasa!—1 Pet. 4:​7, 8.