JE, UMETAMBUA kwamba watu wengi katika ulimwengu wanahisi wanapaswa kutendewa kwa njia ya pekee na wanastahili kupata mapendeleo au haki fulani za pekee? Hata wanapotendewa kwa njia hiyo ya pekee, wanaamini wanastahili kupata mambo mengi hata zaidi. Njia hiyo ya kufikiri inatokana na mtazamo wa ubinafsi na mwelekeo wa kutokuwa na shukrani ambao ungekuwa ishara ya siku za mwisho.—2 Tim. 3:2.

Ni wazi kwamba sikuzote kumekuwa na watu wanaoonyesha roho ya ubinafsi. Adamu na Hawa waliamua kujichagulia wenyewe mema na mabaya, na jambo hilo lilikuwa na matokeo mabaya sana. Karne nyingi baadaye, Mfalme Uzia wa Yuda alifikiri kwamba alistahili kufukiza uvumba hekaluni, lakini alikuwa amekosea sana. (2 Nya. 26:​18, 19) Vivyo hivyo, Mafarisayo na Masadukayo waliamini kwamba walistahili kibali cha pekee cha Mungu kwa sababu tu walikuwa wazao wa Abrahamu.—Mt. 3:9.

Tumezungukwa na watu wenye ubinafsi na wenye majivuno, na mtazamo wao unaweza kutuathiri. (Gal. 5:26) Tunaweza kuanza kufikiri kwamba tunastahili kupata pendeleo fulani au kutendewa kwa njia ya pekee. Tunawezaje kuepuka njia hiyo ya kufikiri? Kwanza, tunahitaji kupata maoni ya Yehova kuhusu jambo hilo. Kanuni mbili za Biblia zitatusaidia.

Yehova huamua kile tunachostahili kupata. Fikiria mifano kadhaa.

• Katika mpango wa familia, mume anahitaji kuhisi anaheshimiwa na mke wake na mke anahitaji  kuhisi anapendwa na mume wake. (Efe. 5:33) Wenzi wa ndoa wanapaswa kuwaonyesha wenzi wao tu upendo wa kimahaba. (1 Kor. 7:3) Wazazi wanastahili utii kutoka kwa watoto wao, na watoto wanapaswa kuonyeshwa upendo mwingi na kutunzwa vizuri.—2 Kor. 12:14; Efe. 6:2.

• Katika kutaniko, wazee wanaofanya kazi kwa bidii wanastahili kuheshimiwa. (1 The. 5:12) Hata hivyo, hawana mamlaka ya kuwatawala ndugu na dada zao.—1 Pet. 5:​2, 3.

• Mungu amezipatia serikali za wanadamu haki ya kudai kodi na kuonyeshwa heshima na watu wanaowatawala.—Rom. 13:​1, 6, 7.

Kwa upendo, Yehova anatupatia mambo mengi zaidi ya tunayostahili. Kwa sababu ya mwelekeo wetu wa kutenda dhambi, tunachostahili tu ni kifo. (Rom. 6:23) Hata hivyo, Yehova anatupatia baraka nyingi kwa sababu ya upendo wake mshikamanifu kwetu. (Zab. 103:​10, 11) Baraka yoyote au pendeleo lolote tunalopata kutoka kwake ni kwa sababu ya fadhili zake zisizostahiliwa.—Rom. 12:​6-8; Efe. 2:8.

Jihadhari na mtazamo wa ulimwengu. Bila kutambua, huenda tukaanza kufikiri kwamba tunastahili mengi zaidi kuliko wengine. Yesu alionyesha jinsi inavyoweza kuwa rahisi kwetu kufikiri kwa njia hiyo alipotumia mfano wa wafanyakazi waliolipwa dinari. Baadhi ya wafanyakazi walianza kazi asubuhi na mapema na wakafanya kazi siku nzima chini ya jua kali; wengine walifanya kazi kwa saa moja tu. Kikundi cha kwanza kilidhani kinastahili kupokea mshahara mkubwa zaidi kwa sababu ya kazi waliyokuwa wamefanya. (Mt. 20:​1-16) Kwa kutumia mfano huo, Yesu aliwaonyesha wafuasi wake kwamba wanapaswa kuridhika na kile ambacho Mungu anachagua kuwapatia.

Uwe mwenye shukrani, si mwenye kudai mengi. (1 The. 5:18) Mwige Mtume Paulo ambaye hakuomba kutegemezwa kimwili na akina ndugu huko Korintho, hata ingawa alikuwa na haki ya kufanya hivyo. (1 Kor. 9:​11-14) Tunapaswa kuthamini kila baraka tunayopokea na kuepuka roho ya kudai mengi.

 Uwe mnyenyekevu. Mtu anapojikazia fikira sana, kwa kawaida anaanza kuhisi kwamba anastahili kupata mambo mengi zaidi ya yale aliyo nayo. Unyenyekevu utatusaidia kutofikiri kwa njia hiyo hatari.

Nabii Danieli aliweka mfano mzuri katika kuonyesha unyenyekevu. Alitoka kwenye familia mashuhuri, alikuwa na mwonekano mzuri, akili nyingi, na uwezo mbalimbali. Mambo hayo yangeweza kumfanya ahisi alistahili kutendewa kwa njia ya pekee na kupata mapendeleo aliyopewa. (Dan. 1:​3, 4, 19, 20) Hata hivyo, Danieli aliendelea kuwa mnyenyekevu, na sifa hiyo ilimfanya awe mwenye thamani kwa Yehova.—Dan. 2:30; 10:​11, 12.

Acheni tukatae roho ya ubinafsi na majivuno ambayo imeenea sana katika ulimwengu wa leo. Badala yake, na tuendelee kupata shangwe katika kila baraka ambayo Yehova anatupatia kupitia fadhili zake zisizostahiliwa.