Mary na John, mume wake, a wanaishi katika eneo ambalo wanaweza kushiriki habari njema na watu wengi wanaokuja kufanya kazi kutoka Ufilipino. Katika kipindi cha janga la COVID-19, Mary alifanikiwa kuanza kujifunza Biblia na watu katika eneo analoishi, lakini pia na watu wanaoishi sehemu nyingine za ulimwengu. Alifanyaje hivyo?

Mary aliwauliza wanafunzi wake wa Biblia hivi: “Je, unamjua mtu yeyote ambaye angependa kujifunza Biblia?” Ikiwa wangejibu ndiyo, angewaomba wamtambulishe kwa mtu huyo. Mara nyingi kuuliza swali hilo rahisi kunaleta matokeo mazuri. Kwa nini? Kwa sababu mara nyingi watu wanaothamini Neno la Mungu wangependa kushiriki mambo wanayojifunza na watu wa familia na rafiki zao. Matokeo ya kuuliza swali hilo yamekuwa nini?

Mwanafunzi wa Biblia wa Mary anayeitwa Jasmin, alimtambulisha kwa watu wengine wanne ambao walitaka kujifunza Biblia. Kristine, mmoja kati yao, alifurahia sana pindi za kujifunza hivi kwamba akamwomba Mary ajifunze naye mara mbili kwa juma. Mary alipomuuliza ikiwa anamjua mtu yeyote ambaye angependa kujifunza Biblia, Kristine alisema, “Ndiyo, nitakutambulisha kwa rafiki zangu.” Kwa majuma machache, Kristine alimtambulisha Mary kwa rafiki zake wanne waliotaka kujifunza. Baadaye, Kristine alimtambulisha Mary kwa rafiki zake wengine, na baadhi yao walimpatia Mary majina ya watu ambao walitaka kujifunza Biblia.

Pia, Kristine alitaka familia yake iliyo Ufilipino ijifunze kuhusu Biblia. Hivyo, alizungumza na Andrea, binti yake. Mwanzoni, Andrea alisema, ‘Mashahidi ni dhehebu fulani la ajabu, hawamwamini Yesu, na wanatumia Agano la Kale tu.’ Lakini baada ya funzo moja tu, alitambua kwamba mambo aliyokuwa akifikiri kuhusu Mashahidi hayakuwa sahihi. Alipokuwa akijifunza, angesema hivi: “Maadamu Biblia imesema hivyo, lazima hilo ni kweli!”

Baada ya muda, Andrea alimtambulisha Mary kwa mfanyakazi mwenzake na rafiki zake wawili ambao walianza kujifunza. Pia, bila Mary kujua, Angela, shangazi ya Andrea ambaye ni kipofu alikuwa akisikiliza walipokuwa wakijifunza. Kisha siku moja, Angela alimwomba Andrea amtambulishe kwa Mary na akaomba kuwa na funzo lake la Biblia. Angela alipenda mambo aliyokuwa akijifunza. Kwa mwezi mmoja, alikariri maandiko mengi na alitaka kujifunza mara nne kwa juma! Kwa msaada wa Andrea, Angela alianza kuhudhuria  mikutano kwa ukawaida kupitia video mtandaoni.

Mary alipotambua kwamba Joshua, mume wa Kristine, sikuzote alikuwa karibu na mahali walipokuwa wakijifunza, Mary alimuuliza ikiwa angependa kujiunga nao. Joshua alisema hivi: “Nitasikiliza tu, lakini usiniulize maswali yoyote; ikiwa utaniuliza, nitaondoka.” Katika dakika tano za kwanza za funzo, Joshua aliuliza maswali mengi kuliko Kristine na alitaka kujifunza Biblia pia.

Swali rahisi ambalo Mary aliuliza lilitokeza mafunzo mengi ya Biblia. Mary alifanya mpango ili Mashahidi wengine wajifunze na baadhi ya wanafunzi hao. Kwa ujumla, Mary alianzisha mafunzo 28 ya Biblia kutoka katika nchi nne tofauti.

Jasmin, mwanafunzi wa kwanza aliyetajwa katika simulizi hili, alibatizwa Aprili 2021. Kristine alibatizwa Mei 2022 na amerudi nchini Ufilipino ili kuwa pamoja na familia yake. Wanafunzi wengine wawili ambao Kristine aliwatambulisha kwa Mary, walibatizwa pia. Angela alibatizwa miezi michache baadaye na sasa anatumikia akiwa painia wa kawaida. Joshua, mume wa Kristine, na Andrea, binti yao, pamoja na wanafunzi wengine kadhaa wanafanya maendeleo mazuri.

Katika karne ya kwanza, habari njema ilienea haraka kati ya watu wa familia na marafiki. (Yoh. 1:​41, 42a; Mdo. 10:​24, 27, 48; 16:​25-33) Kwa nini usiwaulize wanafunzi wako wa Biblia na watu wengine wanaopendezwa swali hili: “Je, unamjua mtu yeyote ambaye angependa kujifunza Biblia?” Ikiwa utauliza swali hilo rahisi ambalo mtu yeyote anaweza kuuliza, huenda wewe pia ukapata watu wengi ambao wangependa kujifunza Biblia.