1. Ni wazo gani linalokuja akilini mwako unapofikiria kumhusu Yehova?

 JE, UMEWAHI kuwazia jinsi Yehova alivyo? Ni wazo gani linalokuja akilini mwako unapozungumza naye katika sala? Ingawa hatuwezi kumwona Yehova, Biblia inamfafanua kwa njia mbalimbali. Yehova anafafanuliwa kuwa “jua na ngao” na “moto unaoteketeza.” (Zab. 84:11; Ebr. 12:29) Uwepo wake unafananishwa na jiwe la yakuti, mchanganyiko wa dhahabu na fedha unaong’aa, na upinde wa mvua maridadi. (Eze. 1:26-28) Baadhi ya maelezo hayo kumhusu Yehova huenda yakatustaajabisha au hata kutuogopesha.

2. Ni jambo gani ambalo huenda likawazuia baadhi ya watu wasimkaribie Yehova?

² Kwa kuwa hatuwezi kumwona Yehova, huenda isiwe rahisi kuamini kwamba anatupenda. Baadhi ya watu wanahisi kwamba Yehova hawezi kuwapenda kamwe kwa sababu ya mambo mabaya waliyopitia maishani. Huenda hawakupendwa na baba zao. Yehova anaelewa hisia hizo na jinsi zinavyotuathiri. Ili kutusaidia, anafunua katika Neno lake sifa zake zenye kuvutia.

3. Kwa nini tunapaswa kuchunguza kwa undani kuhusu upendo wa Yehova?

³ Neno moja linalomfafanua vizuri zaidi Yehova ni upendo. Biblia inasema kwamba “Mungu ni upendo.” (1 Yoh. 4:8) Kila kitu anachofanya kinachochewa na upendo. Upendo wa Mungu ni mwingi sana na ni wenye nguvu sana hivi kwamba anauonyesha hata kwa watu wasiompenda. (Mt. 5:44, 45) Katika makala hii, tutachunguza kwa undani zaidi kumhusu Yehova na upendo wake. Kadiri tunavyojifunza mengi zaidi kumhusu Mungu, ndivyo tutakavyompenda zaidi.

 YEHOVA ANATUPENDA SANA

4. Upendo mwororo wa Yehova unakufanya uhisije? (Tazama pia picha.)

⁴ “Yehova ni mwenye upendo mwororo sana.” (Yak. 5:11) Katika Biblia, Yehova anajifananisha na mama mwenye upendo. (Isa. 66:12, 13) Wazia mama anayemtunza kwa upendo mtoto wake mchanga. Kwa wororo anamchezesha kwenye magoti yake na kuzungumza naye kwa sauti ya upole na ya kubembeleza. Anapolia au anapokuwa na maumivu, mama anahakikisha kwamba anapata anachohitaji. Tunapokuwa na maumivu, tunaweza kuwa na uhakika katika upendo wa Yehova. Mtunga zaburi aliandika hivi: “Mahangaiko yaliponilemea, ulinifariji na kunibembeleza.”​—Zab. 94:19.

5. Upendo mshikamanifu wa Yehova unamaanisha nini kwako?

⁵ Yehova ni mshikamanifu. (Zab. 103:8) Hataacha kutupenda tunapofanya jambo fulani baya. Waisraeli walimkatisha tamaa Yehova tena na tena; hata hivyo, alieleza kuhusu upendo wake mshikamanifu kwa watu wake waliotubu alipowaambia hivi: “Ulikuwa mwenye thamani machoni pangu, uliheshimiwa, nami nimekupenda.” (Isa. 43:4, 5) Upendo wa Mungu haujabadilika. Sikuzote tunaweza kuutegemea. Hata ikiwa tumefanya makosa mazito, Yehova hatatuacha. Tukitubu na kumrudia Yehova, tutajionea kwamba bado anatupenda. Anaahidi kwamba “atasamehe kwa njia kubwa.” (Isa. 55:7) Biblia inasema kwamba msamaha huo ni kama “majira yenye kuburudisha . . . kutoka kwa Yehova mwenyewe.”​—Mdo. 3:19.

6. Zekaria 2:8 inatufundisha nini kumhusu Yehova?

⁶ Soma Zekaria 2:8. Kwa sababu Yehova anatupenda, anatambua haraka hisia zetu na yuko tayari kutulinda. Anahuzunika tunapoumia. Hivyo, tunaweza kusali hivi tukiwa na uhakika: “Nilinde kama mboni ya jicho lako.” (Zab. 17:8) Jicho ni kiungo cha mwili chenye thamani sana na kinachopaswa kutunzwa vizuri. Hivyo, Yehova anapotulinganisha na mboni ya jicho lake, ni kana kwamba anasema, ‘Yeyote anayewadhuru ninyi, watu wangu, anadhuru kitu chenye thamani kwangu.’

7. Kwa nini tunahitaji kuimarisha uhakika wetu katika upendo wa Yehova?

⁷ Yehova anataka tusadiki kwamba anatupenda kibinafsi. Lakini anajua kwamba kwa  sababu ya mambo mabaya tuliyopitia maishani, huenda tusiwe na uhakika kwamba anaweza kutupenda. Au huenda kwa sasa tunakabili hali ambazo zinafanya tusiwe na uhakika kwamba Yehova anatupenda. Ni nini kitakachoimarisha uhakika wetu? Kujifunza jinsi Yehova anavyoonyesha upendo wake kwa Yesu, watiwa-mafuta, na kwetu sote.

JINSI YEHOVA ANAVYOONYESHA UPENDO WAKE

8. Kwa nini Yesu alikuwa na uhakika kwamba Baba yake anampenda?

⁸ Kwa miaka mingi sana, Yehova na Mwana wake mpendwa walijenga uhusiano wa karibu sana na wenye upendo mwingi. Huo ndio uhusiano uliodumu kwa muda mrefu zaidi katika ulimwengu wote. Yehova alieleza waziwazi upendo wake kwa Yesu kama tunavyosoma kwenye Mathayo 17:5. Yehova angeweza kusema tu, ‘Huyu ni mtu ninayemkubali.’ Hata hivyo, kwa kuwa alitaka tujue jinsi anavyompenda Yesu, alimwita “Mwanangu, mpendwa.” Yehova alijivunia kuwa na mwana kama Yesu, hasa kwa sababu Yesu alikuwa tayari kutoa uhai wake. (Efe. 1:7) Na Yesu hakuwa na shaka hata kidogo kuhusu jinsi Baba yake alivyompenda. Yesu alikuwa na uhakika kabisa na upendo wa Baba yake hivi kwamba aliuhisi moyoni mwake. Alieleza tena na tena kwa uhakika kwamba Baba yake anampenda.​—Yoh. 3:35; 10:17; 17:24.

9. Ni neno gani linalofafanua jinsi Yehova anavyowapenda watiwa-mafuta? Eleza. (Waroma 5:5)

⁹ Pia, Yehova anawahakikishia watiwa-mafuta kwamba anawapenda. (Soma Waroma 5:5.) Ona neno ambalo limetumiwa kuonyesha jinsi Yehova anavyowapenda. Andiko linasema upendo wa Mungu “umemiminwa” ndani ya mioyo yao. Kitabu kimoja cha marejeo kinalinganisha neno “umemiminwa” na kijito cha maji, yaani, kinachotiririka maji mengi. Mfano huo unaonyesha jinsi Yehova anavyowapenda sana watiwa-mafuta! Watiwa-mafuta wanajua kwamba “wanapendwa na Mungu.” (Yuda 1) Mtume Yohana alieleza hisia zao alipoandika hivi: “Oneni upendo ambao Baba ametuonyesha, kwamba tunapaswa kuitwa watoto wa Mungu! ” (1 Yoh. 3:1) Je, Yehova anawapenda tu watiwa-mafuta? La, Yehova amethibitisha upendo wake kwetu sisi sote.

10. Ni nini kinachokuhakikishia zaidi kwamba Yehova anakupenda?

¹⁰ Ni nini kinachotuhakikishia zaidi kwamba Yehova anatupenda? Fidia​—wonyesho mkubwa zaidi wa upendo katika ulimwengu wote! (Yoh. 3:16; Rom. 5:8) Yehova alimtoa Mwana wake mpendwa, akaruhusu afe kwa ajili ya wanadamu wote ili dhambi zetu ziweze kusamehewa na tuweze kuwa rafiki Zake. (1 Yoh. 4:10) Kadiri tunavyotafakari gharama kubwa ambayo Yehova na Yesu walilipia, ndivyo tunavyoelewa zaidi jinsi wanavyompenda sana kila mmoja wetu. (Gal. 2:20) Fidia haikutolewa ili kutimiza tu matakwa ya haki ya Yehova. Ni zawadi ya upendo. Yehova amethibitisha upendo wake kwetu kwa kutoa dhabihu yenye thamani zaidi kwake, yaani, Yesu. Yehova aliruhusu Mwana wake ateseke na kufa kwa ajili yetu.

11. Tunajifunza nini kutokana na Yeremia 31:3?

¹¹ Kama tulivyoona, Yehova hafichi hisia zake, bali anatueleza waziwazi jinsi anavyotupenda sana. (Soma Yeremia 31:3.) Yehova ametuvuta kwake kwa sababu anatupenda. (Linganisha Kumbukumbu la Torati 7:7, 8.) Hakuna kitu chochote wala mtu yeyote anayeweza kututenganisha na upendo wake. (Rom. 8:38, 39) Upendo huo unakufanya wewe uhisije? Soma Zaburi ya 23, na uone jinsi Daudi alivyohisi kuhusu upendo mwororo wa Yehova na jinsi wewe unavyoweza kuhisi.

 UPENDO WA YEHOVA UNAKUFANYA UHISIJE?

12. Toa maelezo mafupi kuhusu Zaburi ya 23.

¹² Soma Zaburi 23:1-6. Zaburi ya 23 ni wimbo unaotuhakikishia kwamba Yehova anatupenda na kututunza kwa wororo. Daudi, mwandishi wa zaburi hii, anaeleza kuhusu uhusiano wa karibu uliopo kati yake na Mchungaji wake, Yehova. Daudi alihisi akiwa salama kwa kumruhusu Yehova amwongoze, na alimtegemea Yehova kikamili. Daudi alijua kwamba upendo wa Yehova ungemfuatia sikuzote za maisha yake. Kwa nini alikuwa na uhakika huo?

13. Kwa nini Daudi alikuwa na uhakika kwamba Yehova angemtunza?

¹³ “Sitakosa chochote.” Daudi alihisi anatunzwa vizuri kwa sababu sikuzote Yehova alimpatia mahitaji yake. Pia, Daudi alifurahia urafiki na kibali cha Yehova. Ndiyo maana alikuwa na uhakika kwamba hata nini kitokee wakati ujao, Yehova angeendelea kumwandalia mahitaji yake. Kwa kuwa Daudi aliamini kwamba Yehova anampenda na angemtunza, hilo lilimsaidia asiogope, bali awe na furaha na aridhike.​—Zab. 16:11.

14. Yehova anawezaje kututunza kwa upendo?

¹⁴ Yehova anatutunza kwa upendo, hasa tunapokabili hali mbaya maishani. Claire, a dada ambaye ametumikia Betheli kwa zaidi ya miaka 20, hakujua jinsi ya kuisaidia familia yake ilipokabiliwa na tatizo moja baada ya lingine. Baba yake alipatwa na ugonjwa wa kiharusi, dada yake alitengwa na ushirika, biashara yao ndogo ya familia ilifungwa, na benki ilichukua nyumba yao. Yehova aliwatunzaje kwa upendo? Claire anasema hivi: “Yehova alihakikisha kwamba familia yetu inapata mahitaji ya  kila siku. Mara nyingi, Yehova alitupatia hata zaidi ya kile tulichohitaji! Mara kwa mara ninafikiria pindi hizo nilizojionea upendo mwororo wa Yehova, na sitazisahau kamwe. Kumbukumbu hizo zimenisaidia kuendelea kumtumikia Yehova kwa shangwe wakati wa majaribu.”

15. Kwa nini Daudi alihisi ameburudishwa? (Tazama pia picha.)

¹⁵ “Huniburudisha.” Nyakati nyingine, Daudi alitaabishwa kwa sababu ya matatizo na majaribu aliyokabili. (Zab. 18:4-6) Hata hivyo, upendo mwororo wa Yehova na utunzaji wake ulimburudisha. Yehova alimwongoza rafiki yake aliyechoka katika “malisho yenye majani mengi” na “kwenye sehemu za kupumzika zenye maji mengi.” Matokeo ni kwamba Daudi alipata nguvu tena na aliweza kuendelea kumtumikia Yehova kwa shangwe.​—Zab. 18:28-​32.

16. Upendo wa Yehova umekuburudishaje?

¹⁶ Vivyo hivyo leo, upendo mshikamanifu wa Yehova unafanya iwezekane kuvumilia tunapokabili majaribu au hali ngumu maishani. (Omb. 3:22; Kol. 1:11) Fikiria mfano wa Rachel. Alivunjika moyo sana mume wake alipomwacha yeye na kuacha kumtumikia Yehova wakati wa janga la COVID-19. Yehova alimsaidiaje? Rachel anasema hivi: “Yehova alihakikisha kwamba ninahisi ninapendwa. Nilizungukwa na marafiki ambao walitumia muda pamoja nami, waliniandalia chakula, walinitumia jumbe nzuri na maandiko ya kunitia moyo, walitabasamu, na kuendelea kunikumbusha kwamba Yehova ananijali. Sikuzote ninamshukuru Yehova kwa kunipatia familia kubwa yenye upendo.”

17. Kwa nini Daudi ‘hakuogopa madhara yoyote’?

¹⁷ “Siogopi madhara yoyote, kwa maana wewe uko pamoja nami.” Mara nyingi uhai wa Daudi ulikuwa hatarini, na alikabiliana na maadui wengi wenye nguvu. Hata hivyo, upendo wa Yehova ulimfanya ahisi kuwa analindwa na yuko salama. Daudi alihisi kwamba Yehova alikuwa pamoja naye katika kila hali aliyokabili, na hilo lilimfariji. Hivyo, angeweza kuimba hivi: “[Yehova] aliniokoa kutoka katika mambo yote yanayoniogopesha.” (Zab. 34:4) Daudi alikuwa na sababu nzuri za kuogopa, lakini upendo wa Yehova ulikuwa na nguvu zaidi kuliko woga wake.

18. Kuwa na uhakika kwamba Yehova anatupenda kunawezaje kutuimarisha tunapoogopa?

¹⁸ Kuwa na uhakika kwamba Yehova anatupenda  kunatuimarishaje tunapokabili hali zenye kuogopesha? Dada painia anayeitwa Susi, anaeleza jinsi yeye na mume wake walivyohisi mwana wao alipojiua. Anasema hivi: “Jambo baya linapotokea ghafla maishani linaweza kukuathiri sana na kukufanya uhisi hujui la kufanya. Lakini upendo mwororo wa Yehova umetulinda na kutufanya tuhisi tukiwa salama.” Rachel, aliyetajwa awali, anakumbuka hivi: “Usiku mmoja moyo wangu uliniuma sana na nilikuwa na wasiwasi na woga sana, hivyo nilimlilia Yehova kwa sauti. Papo hapo nilihisi Yehova anaubembeleza moyo wangu na kunituliza kama mama anavyomfanyia mtoto wake, na kisha nikalala. Sitasahau kamwe pindi hiyo.” Mzee wa kutaniko anayeitwa Tasos, aliyefungwa gerezani kwa miaka minne kwa sababu ya kukataa kujiunga na jeshi. Alijionea jinsi gani upendo na utunzaji wa Yehova? Anasema hivi: “Yehova aliniandalia mahitaji yangu yote na mambo mengine mengi. Hilo liliimarisha uhakika wangu kwamba ninaweza kumtumaini kikamili. Pia, kupitia roho yake, Yehova alinipatia shangwe licha ya kuishi katika mazingira yenye kuvunja moyo. Hilo lilinihakikishia kwamba kadiri ninavyomtumaini zaidi, ndivyo ninavyonufaika zaidi na wema wake. Hivyo, nikaanza kutumikia nikiwa painia wa kawaida nilipokuwa gerezani.”

MKARIBIE MUNGU MWENYE UPENDO MWORORO

19. (a) Sala zetu zitakuwaje tunapojua kwamba Mungu anatupenda? (b) Ni ufafanuzi gani kuhusu upendo wa Yehova unaokuvutia zaidi? (Tazama sanduku lenye kichwa “ Maneno Yanayotusaidia Kuhisi Upendo Mwororo wa Yehova.”)

¹⁹ Masimulizi yote tuliyozungumzia yanathibitisha kwamba Yehova, “Mungu wa upendo,” yuko pamoja nasi! (2 Kor. 13:11) Anapendezwa nasi kibinafsi. Tunasadiki kwamba “[tumezungukwa] na upendo Wake mshikamanifu.” (Zab. 32:10) Kadiri tunavyotafakari jinsi ambavyo ameonyesha upendo wake kwetu, ndivyo anavyokuwa halisi zaidi kwetu, na tunahisi yuko karibu zaidi nasi. Tunaweza kumkaribia kwa uhuru na kumweleza jinsi tunavyohitaji sana upendo wake. Tunaweza kumweleza mahangaiko yetu yote, tukiwa na uhakika kwamba anatuelewa na kwamba yuko tayari kutusaidia.​—Zab. 145:18, 19.

20. Upendo wa Yehova unatusaidiaje kumkaribia zaidi?

²⁰ Kama tunavyovutiwa kuota moto katika siku yenye baridi, ndivyo tunavyovutiwa na upendo mwororo wa Yehova. Ingawa upendo wa Yehova ni wenye nguvu, ni mwororo pia. Kwa hiyo, uruhusu upendo mwororo wa Yehova maishani mwako. Kwa sababu Yehova anatupenda, acheni sisi sote tuseme hivi kwa sauti: “Ninampenda Yehova”!​—Zab. 116:1.