Je, Wataka Kujifunza Lugha ya Kigeni?

NA MLETA-HABARI WA AMKENI! KATIKA UINGEREZA

“Kusema ni rahisi kuliko kutenda!” Ndivyo watu wengi husema juu ya kujifunza lugha ya kigeni, hasa baada ya kujaribu. Ni kweli kwamba, kujifunza lugha nyingine ni jambo gumu, bila kutia chumvi. Lakini wale ambao wamefanikiwa wanasema kwamba jitihada hiyo yastahili.

KUNA sababu nyingi tofauti za kujifunza lugha ya kigeni. Kwa mfano, Andrew, alipanga kwenda likizo Ufaransa, naye alitaka aweze kuzungumza na watu wa huko kwa lugha yao wenyewe. Guido alizaliwa Uingereza, lakini malezi ya familia yake ni ya Kiitalia. “Nilijua lahaja tu,” yeye asema, “kwa hiyo nilitaka kujifunza kusema Kiitalia vizuri.” Ndugu ya Jonathan alihamia ng’ambo majuzi na kuoa msichana Mhispania. “Nilitaka kuongea na watu wa jamaa yangu mpya kwa lugha yao nilipomtembelea ndugu yangu,” asema Jonathan.

Lakini kujifunza lugha ya kigeni kwaweza kuwa na manufaa nyingine. “Kulinifunza kuwa na hisia-mwenzi,” asema Louise. “Sasa naelewa jinsi ambavyo wageni huhisi wanapofika nchi ambayo lugha inayozungumzwa ni tofauti na yao.” Pamela aliathiriwa na manufaa kwa njia ya kibinafsi zaidi. Akiwa amelelewa Uingereza, hakujua mengi kuhusu lugha ya Kichina—lugha ya familia yake. Pamela na mama yake wakawa hawana uhusiano wa karibu. “Hatukuwasiliana sana,” akiri Pamela. “Lakini sasa kwa kuwa naweza kuongea Kichina, tuna uhusiano wa karibu zaidi.”

Misaada ya Kufaulu

Utahitaji nini ili ufanikiwe kujifunza lugha ya kigeni? Wengi ambao wamefanya hivyo wanakazia mambo yafuatayo.

● Kichocheo. Unahitaji kichocheo—sababu ya kufuatia mradi wako. Wanafunzi wenye kichocheo kikubwa kwa kawaida hufanikiwa.

● Unyenyekevu. Usitazamie kutimiza mengi mno—huwezi kuepuka makosa, hasa mara ya kwanza. “Watu watakucheka,” asema Alison, “kwa hiyo hata wewe cheka!” Valerie akubali: “Unakuwa kama mtoto ajifunzaye kutembea. Mara nyingi utajikwaa, lakini lazima tu uamke na ujaribu tena.”

● Subira. “Kwangu, miaka miwili ya kwanza ilikuwa migumu, na nyakati nyingine nilitaka kukata tamaa,” akubali David. Lakini yeye anakubali kwa kusema: “Huendelea kuwa rahisi zaidi!” Jill ahisi vivyo hivyo. “Haufikiri umefanya maendeleo mpaka  unapokumbuka yaliyopita,” yeye asema.

● Mazoezi. Utaratibu wa kawaida utakusaidia kusema lugha mpya kwa ufasaha. Jaribu kujizoeza kila siku, hata kama ni kwa dakika chache tu. Kama vile kitabu kimoja kikuu kisemavyo, “‘mazoezi machache kwa ukawaida,’ ni afadhali kuliko ‘mengi lakini mara mojamoja.’”

Vifaa Vyenye Msaada

Je, uko tayari kukubali ugumu wa kujifunza lugha ya kigeni? Ikiwa ndivyo, vifaa vifuatavyo vyaweza kuongeza ubora wa maendeleo yako.

● Kadi za kujifunzia. Kila moja ya hizo ina neno au kifungu cha maneno mbele na tafsiri yake nyuma. Ikiwa hazipatikani mahali unapoishi, unaweza kufanyiza zako mwenyewe kwa kutumia katalogi ya kadi.

● Kaseti na vidiokaseti za maagizo. Hizi zaweza kukusaidia usikie lugha ikisemwa kwa usahihi. Kwa mfano, David alijifunza Kijapani cha msingi kwa kusikiliza kaseti ya kitabu cha watalii chenye vifungu vya maneno alipokuwa akiendesha gari lake.

● Programu za mawasiliano ya kompyuta. Baadhi ya hizo hukuruhusu urekodi sauti yako na kulinganisha matamshi yako na wasemaji wenyeji wa lugha hiyo.

● Redio na televisheni. Ikiwa kuna programu za redio au televisheni mahali penu zinazotumia lugha unayojifunza, kwa nini usifungulie na uone ni kadiri gani unaweza kujifunza?

● Magazeti na vitabu. Jaribu kusoma habari iliyochapishwa katika lugha mpya, ukihakikisha kwamba kiwango cha kuelewa si cha juu zaidi au cha chini zaidi. *

Kuielewa Kabisa Lugha Hiyo

Bila shaka, baada ya muda mfupi au baadaye itakubidi uzungumze na wale wanaosema lugha hiyo. Huhitaji kusafiri nchi ya mbali. Badala yake, labda unaweza kutembelea kutaniko linalosema lugha ya kigeni la Mashahidi wa Yehova lililo nchini mwako.

Kwa vyovyote vile, mradi wako wapaswa kuwa kujifunza kufikiri katika lugha ya kigeni, badala ya kutafsiri tu maneno na vifungu vya maneno kutoka katika lugha yako ya kwanza. Inaelekea litakuwa jambo lenye msaada ikiwa utajaribu kujifunza jambo fulani kuhusu desturi na tabia za watu wanaoongea lugha yako geni. “Huwezi kujifunza lugha kabisa bila kuelewa jambo fulani linalohusu tabia na viwango vya utamaduni ulio sehemu yake,” asema mtaalamu wa lugha Robert Lado.

Wazo la mwisho: Usivunjike moyo unapoona unafanya maendeleo polepole. Kwa vyovyote vile, kujifunza lugha ya kigeni ni hatua ya kuendelea. “Mimi siachi kujifunza kamwe,” asema Jill, alijifunza lugha ya ishara miaka 20 iliyopita. “Lugha hiyo husitawi daima.”

Kwa hiyo wataka kujifunza lugha ya kigeni? Ikiwa wataka, jitayarishe kwa ajili ya jitihada nyingi zaidi—lakini yenye kuthawabisha sana.

[Maelezo ya Chini]

[Picha katika ukurasa wa 12, 13]

Unaweza kuongeza msamiati wako kwa . . .

. . . kulinganisha lugha yako ya asili na ile unayojifunza