Mbuni Mkuu Afunuliwa

HATA wanasayansi wengi watakubali kwamba kile kinachoitwa eti kitabu cha asili humfanya mtu mwenye kusababu vizuri aone pasipo shaka kwamba kuna Mbuni, Muumba. Zamani za kale mtume Mkristo Paulo aliandika kwamba “sifa za [Mungu] zisizoonekana zaonwa waziwazi tangu uumbaji wa ulimwengu na kuendelea, kwa sababu zafahamiwa kwa vitu vilivyofanywa, hata nguvu zake za milele na Uungu.” (Waroma 1:20) Lakini kitabu cha asili hakifunui kila jambo juu ya Mungu na mapenzi yake. Kwa mfano, hakifunui kusudi la uhai. Kwa kupendeza, Mbuni wa uumbaji amejifunua kupitia kwa kitabu kingine—Neno lake lililopuliziwa, Biblia.—2 Timotheo 3:16.

Ijapokuwa si kitabu cha sayansi, Biblia hujibu maswali yote muhimu yasiyojibiwa na vitu vya asili. Inajibu mojawapo ya maswali yanayoulizwa kwanza na watu wengi wanapochunguza kitu chenye kuvutia kilichofanyizwa  kwa mikono—Ni nani aliyekitengeneza? Kwa habari ya uumbaji, angalia jinsi Biblia inavyosema katika Ufunuo 4:11: “Wewe wastahili, Yehova, naam, Mungu wetu, kupokea utukufu na heshima na nguvu, kwa sababu uliumba vitu vyote, na kwa sababu ya mapenzi yako vilikuwako na vikaumbwa.” Ndio, Mbuni Mkuu ni Yehova Mungu, na jina lake huonekana mara zipatazo 7,000 katika hati za Biblia za awali.

Yapata miaka 3,500 kabla ya enzi yetu ya kisayansi, mwanamume anayeitwa Yobu, kwa wazi akiwa mchunguzi makini wa vitu vya asili na mtu mwenye kufikiri, alihesabia Yehova sifa ya uumbaji. Yobu alisema: “Waulize hao wanyama, nao watakufundisha; na nyuni wa angani, nao watakuambia. Au nena na nchi, nayo itakufundisha; nao samaki wa baharini watakutangazia.” Wote wanafundisha nini juu ya uumbaji? Yobu ajibu kwa swali: “Katika hawa wote ni yupi asiyejua, kwamba ni mkono wa BWANA uliofanya haya?”—Ayubu 12:7-9.

Kusudi la Yehova kwa Wanadamu

Biblia hufunua pia kusudi la Yehova kwa jamii ya kibinadamu. Ni kusudi gani hilo? Ni kusudi la kwamba wanadamu waadilifu watafurahia zawadi ya uhai udumuo milele katika Paradiso—papa hapa duniani. “Wenye haki watairithi nchi, nao watakaa humo milele,” yasema Zaburi 37:29. Vivyo hivyo, Yesu alisema: “Heri wenye upole: maana hao watairithi dunia.”—Mathayo 5:5, King James Version.

Zaidi ya hayo, dunia itadumu ikiwa paradiso yenye amani kwa sababu ya ujuzi fulani wa pekee. Andiko la Isaya 11:9 lasema: “Hawatadhuru wala hawataharibu katika mlima wangu wote mtakatifu; maana dunia itajawa na kumjua BWANA, kama vile maji yanavyoifunika bahari.” Kwa hakika, ‘ujuzi juu ya Yehova’ ndio ufunguo wa uhai wa milele, amani, na furaha. Yesu alithibitisha hilo aliposema: ‘Hii yamaanisha uhai udumuo milele, wao kuendelea kutwaa ujuzi juu yako wewe, Mungu pekee wa kweli, na juu ya yule uliyemtuma, Yesu Kristo.’—Yohana 17:3.

Hatimaye wanadamu watakapopokea uhai udumuo milele wataweza kuishi kwa furaha duniani jinsi Mungu alivyokusudia mwanzoni. Na mbali na kuwa wenye kuchosha, uhai wa milele utatokeza fursa isiyo na kikomo ya kuvumbua na kushangilia.

Kazi Yenye Kusisimua!

Mhubiri 3:11 husema: “Kila kitu [Mungu] amekifanya kizuri kwa wakati wake; tena ameiweka hiyo milele ndani ya mioyo yao; ila kwa jinsi mwanadamu asivyoweza kuivumbua kazi ya Mungu anayoifanya, tangu mwanzo hata mwisho.” Karibuni, tamaa ya asili ya mwanadamu ya kuishi “milele,” ikishatimizwa kikamili, tutajaribu ‘kuivumbua kazi ya Mungu anayoifanya tangu mwanzo hata mwisho.’ Naam, dunia nzima itakuwa darasa letu, Yehova atakuwa Mwalimu wetu, na uhai utakuwa mfululizo wa kuvumbua usiokoma na unaosisimua.

Jiwazie ukiwa katika Paradiso, ukiwa na akili na mwili mkamilifu. Unakubali kusuluhisha magumu ambayo huwezi kukubali kamwe leo—nawe wajua kwamba utafaulu kuyatatua kabisa, iwe ni kwa miaka mia moja au elfu moja. Huenda hata ukaweza kutumia uwezo wako mkamilifu kuiga baadhi ya ubuni wa Yehova—lakini kwa njia ambazo ni bora kupita jitihada za sasa za mwanadamu, ambazo mara nyingi hudhuru na kuchafua. Ndio, kama Yehova, utaongozwa na upendo katika yote uyafanyayo.—Mwanzo 1:27; 1 Yohana 4:8.

Ni nini kinachotujulisha kwamba mambo hayo si ndoto tu yenye kupendeza? Kwa sababu Yehova ana “vitabu” viwili vitukufu. Naam, Biblia na uumbaji hutoa uthibitisho usiokanushika wa kwamba hakuna jambo asiloweza kufanya Mbuni Mkuu na Muumba wetu. Kwa hiyo mbona usipate kumjua yeye na Mwanaye, Yesu Kristo, vema zaidi sasa? Hili ni jambo lenye kupendeza zaidi, lenye kufaa, na lenye ahadi kupita yote uwezayo kufanya.

[Picha katika ukurasa wa 10]

Biblia na kitabu cha asili hufunua Mbuni Mkuu