Kutoka kwa Wasomaji Wetu

Fupi Sana? Mimi ni mpasuaji wa mfumo wa neva, na niliona kosa fulani katika picha iliyokuwa kwenye ile makala “Ubongo Wako—Unatatanisha Ajabu.” (Mei 8, 1999) Mlionyesha picha ya sehemu za ndani za ubongo ikiwa na kistari kilichoelekeza kwenye tezi pituitari. Niliona ni kana kwamba kistari hiki ni kifupi sana na kinaelekeza kwenye optic chiasma.

A. W., Japani

Msomaji wetu mwenye jicho kali yuko sahihi, na twaomba radhi kwa kosa hilo.—Mhariri.

Kimbunga Mitch Asanteni sana kwa ile makala yenye kusisimua “Kuokolewa Kutoka Kwenye Dhoruba Yenye Kufisha!” (Juni 8, 1999) Mara nyingi mimi hupokea habari kuhusu misiba iliyowakumba ndugu zetu kupitia E-mail, lakini sijui ni habari kiasi gani inayoweza kutumainika. Njia ambayo habari hii ilitolewa katika makala hiyo ilikuwa yenye kutia moyo sana na kujenga. Ilikuwa kikumbusha kitulivu kwa nyakati za hatari ambamo twaishi.

C. P., Marekani

Natambua kwamba wengi walipoteza mali zao nyingi katika msiba huu mkubwa, lakini ilisisimua kusoma kuhusu udugu wetu wa ulimwenguni pote ukitenda, hata katika hali yenye hatari kubwa. Ile picha ya ndugu aliyesimama mbele ya nyumba yake iliyoharibiwa ilinipa jambo la kufikiria. Nina haki gani kulalamika kuhusu mambo?

R.C.N., Brazili

Guarana Ile makala yenu “Kahawa, Chai, au Guarana?” (Juni 8, 1999) ilikuwa yenye kuelimisha. Nikiwa mhudumu wa wakati wote nikitumikia kwenye kingo za Mto Amazon, mimi hutumika karibu na maeneo ambako guarana hukuzwa. Mara nyingi mimi huiona ikitengenezwa. Wakati ujao mtu fulani akinikaribisha guarana, najua jibu langu litakuwa nini.

J.R.S.M., Brazili

Ulimwengu Nataka kuwashukuru sana kwa ule mfululizo “Ulimwengu Wetu—Je, Uliumbwa kwa Kusudi Fulani?” (Juni 22, 1999) Nikiwa mwastronomia asiye stadi, nilifurahia sana makala hizo. Tamasha hiyo ya ajabu sana inayotukia kila usiku hutukumbusha nguvu nyingi, ujuzi mwingi, na upendo wa Muumba wetu.

V. V., Hispania

Makala hizo zilikuwa rahisi kuelewa, hata kwa mtu asiyefahamu mambo ya kisayansi. Asanteni kwa kunisaidia nipate kumjua Yehova vema zaidi. Baada ya miaka 58 ya ndoa, mke wangu alikufa hivi majuzi. Kwa hiyo uelewevu huu wenye kuelimisha ulikuja kwa wakati unaofaa kabisa katika maisha yangu.

F. W., Marekani

Wanawake Wanaofanya Kazi ya Ujenzi Asanteni sana kwa ile makala “Wanawake Wamechangia Sana.” (Juni 22, 1999) Karibu mwaka mmoja uliopita, nilihama kutoka California hadi Thailand. Hivi majuzi tulikuwa na pendeleo la kujenga Jumba letu wenyewe la Ufalme. Kama wale wanawake huko Zimbabwe, akina dada wetu walisaidia kuchanganya simiti, kufunga fito za feleji, na kuweka vigae na kufanya kazi nyingine nyingi za ujenzi. Kwa msaada wa Yehova tuliweza kumaliza kazi hiyo katika muda wa miezi mitatu hivi. Asanteni kwa kukiri fungu wanalotimiza wanawake katika kazi ya ujenzi ya ulimwenguni pote.

R. G., Thailand

Mimi na wazazi wangu tulikuwa na pendeleo la kusaidia katika kazi ya kujenga Jumba la Ufalme lililojengwa upesi kwa mara ya kwanza. Waweza kuwazia nilivyofurahi nilipoona jinsi wanawake ulimwenguni pote wanavyochangia kazi ya ujenzi wa ofisi za tawi na Majumba ya Ufalme ya Mashahidi wa Yehova ulimwenguni pote. Miradi ya ujenzi kama ule wa Zimbabwe ni matayarisho kwa ajili ya kazi tutakayofanya katika ulimwengu mpya. Ikiwa twafurahia miradi kama hiyo sasa, wazia jinsi itakavyokuwa wakati wanadamu wote watakuwa wakamilifu na wenye muungano katika kumtumikia Yehova!

S.W.S., Brazili