Kutoka kwa Wasomaji Wetu

Kuchagua Mwenzi wa Ndoa Asanteni kwa utunzaji kama wa baba mliotuonyesha sisi vijana katika makala “Maoni ya Biblia: Jinsi ya Kuchagua Mwenzi wa Ndoa.” (Oktoba 8, 1999) Vijana wengi hukimbilia ndoa kwa sababu ya kukosa ujuzi, wakishindwa kupambanua kati ya upendo wa kupumbazwa na upendo wa kweli. Ni afadhali niwe peke yangu kuliko kuwa na mtu tusiyepatana.

S. R. M., Brazili

Nina umri wa miaka 40 na sijaolewa bado. Mimi husali kwa Yehova kila siku kuhusu kupata mwenzi, nami hujaribu sana kusitawisha sifa zinazohitajiwa ili kufanikisha ndoa. Lilikuwa jambo lenye kutia moyo sana kusoma madokezo kuhusu kutafuta mtu aliye imara kiroho, mnayeshiriki miradi ileile na anayejitahidi kusitawisha matunda ya roho ya Mungu. Asanteni sana kwa kuimarisha azimio langu la kuendelea kumngojea Yehova.

E. F., Marekani

Mbayuwayu Kwa miaka mingi nikiwa kwenye roshani yangu nimewaona mbayuwayu wa Ulaya wakijenga viota. Huja mwezi wa Mei na kutoweka ghafula mwezi wa Agosti. Asanteni kwa ajili ya makala “Mbayuwayu Mwenye Kuruka kwa Kasi” (Oktoba 8, 1999), sasa najua mengi zaidi kuhusu viumbe hao wenye kuvutia.

A. D., Ujerumani

Simulizi la Maisha Nimekuwa mweneza-evanjeli wa wakati wote kwa zaidi ya mwongo mmoja sasa na sikuzote nimekuwa nikitamani sana kuwashukuru kwa ajili ya makala zenu zilizoandikwa vizuri. Jambo la maana kwangu limekuwa masimulizi ya maisha yenye kupendeza ya wamishonari. Sikuzote nimetamani kuwa mishonari. Simulizi la maisha kama lile la Willem na Gré van Seijl (“Mambo Halisi Yamezidi Mataraja Yangu,” Oktoba 8, 1999) hunisaidia kudumisha tamaa yangu ya kutumikia katika nchi ya kigeni.

P. K., Marekani

Nilikuwa nimeshuka moyo sana nilipokuwa nikisoma makala hiyo. Nyakati nyingine ninahisi kwamba sitawahi kutimiza miradi yangu ya kiroho. Pia nimekuwa na wakati mgumu kudumisha mtazamo unaofaa kuelekea kazi yangu nikiwa mweneza-evanjeli wa wakati wote. Willem na Gré walikuwa na mtazamo mzuri, wa kutazamia mema licha ya vizuizi, na Yehova alibariki jitihada zao. Jambo hilo liliimarisha uhakika wangu kwamba mimi pia naweza kutimiza miradi yangu nikidumisha imani yenye nguvu.

K. C., Marekani

Kuwa Mwenye Urafiki Asanteni sana kwa ajili ya makala “Vijana Huuliza . . . Kwa Nini Nisiwe Mwenye Urafiki Zaidi?” (Oktoba 22, 1999) Nina umri wa miaka 17, na karibu makala hiyo ifanye nifikiri kuwa iliandikwa kwa ajili yangu hasa. Ilieleza mambo sawa na ninavyohisi moyoni. Mara nyingi nimesikia watu wakisema kwamba mimi hujifikiria sana kupita kiasi. Lakini hata kama mtu ni mnyamavu zaidi ya wote hiyo si sababu ya kumchambua.

R. R., Ujerumani

Ugonjwa ulionishika nikiwa mtoto umenifanya nihisi kana kwamba nimetengwa na watu. Makala hiyo ilinisaidia kufahamu hisia zangu na kutafuta njia ya kukabiliana na hali hiyo. Nitajitahidi kutafuta marafiki katika kutaniko langu.

J. F. F., Brazili

Idadi Yenye Kosa! Sikuzote mimi hufurahia makala zenu na jinsi zinavyokuwa sahihi kwa kawaida. Hata hivyo, katika “Kuutazama Ulimwengu,” ile sehemu “Kutamani Sana Magari” (Septemba 8, 1999) ilisema: “Inakadiriwa kwamba sasa kuna takriban magari milioni 40 nchini Marekani.” Idadi halisi ni kubwa zaidi kuliko hiyo.

R. K., Marekani

Twaomba radhi kwa kosa hilo. Tulinukuu takwimu zisizo sawa bila kukusudia. Kwa sasa, kuna magari zaidi ya milioni 130 yaliyosajiliwa Marekani.—Mhariri.