Je, Kweli Inadhuru?

KAMA tulivyokwisha kuona, watu wazima na watoto wanaweza kutazama ponografia kwa urahisi kwenye Internet. Je, hilo likuhangaishe? Je, kweli ponografia inadhuru?

Wengi hudhani kwamba kutazama kidogo ponografia hakudhuru. Lakini hivyo sivyo mambo yalivyo. Fikiria mume na mke walioonekana kuwa na ndoa yenye fanaka. Walikuwa na fedha za kutosha, nao walipenda mno kutalii. Marafiki wao waliwaona wakiwa na uhusiano wa karibu sana, upendo, na ujitoaji, na kwa kweli ndivyo walivyokuwa.

Hata hivyo, matatizo yalizuka wakati mume alipoanza kutazama ponografia. Mke wake mwenye wasiwasi alimwandikia mwandikaji maarufu wa makala za ushauri na kumweleza hangaiko lake: “[Mume wangu] alipoanza kutumia kompyuta kwa saa nyingi katikati ya usiku na alfajiri, aliniambia alikuwa akifanya ‘utafiti.’ Nilimfumania alfajiri moja akitazama [ponografia] . . . Akasema alikuwa akidadisi tu. Nilipoangalia kwa ukaribu mambo aliyokuwa akitazama nilichukizwa mno. Aliaibika na akaahidi kukoma, nikaamini aliyosema. Sikuzote amekuwa mwenye kuheshimika—mtu anayetimiza ahadi zake.”

Mwanzoni wengi huangukia ponografia kwa sababu ya udadisi sawa na mtu huyo. Wao hufungua Internet usiku  wa manane au mapema alfajiri kwa sababu ya kuhofu kugunduliwa. Wanapofumaniwa, kwa kawaida wao hujaribu kuficha kosa lao kwa kusema uwongo, kama alivyofanya mtu huyo. Je, kuna yeyote anayeweza kudai kwa haki kwamba “utendaji wa kujifurahisha” unaomfanya “mtu anayetimiza ahadi zake” anyemelee kisirisiri usiku wa manane na kuwadanganya wapendwa wake haudhuru?

Zoea hilo laweza kusababisha matatizo makubwa ya kibinafsi na ya familia. Baadhi ya watu wamekiri kwamba kutazama ponografia kumewazuia wakuze uhusiano wa karibu pamoja na wengine. Hawapendi watu wawepo wanapojisisimua kwa kutazama ponografia. Watu huelekea kuwazia mambo yasiyo halisi wanapotazama ponografia, na mawazo hayo hayamsaidii mtu aimarishe uhusiano wake na wengine au ashughulikie hali halisi ulimwenguni. Je, burudani inayowazuia watu kuwa na wale wanaowajali sana inaweza kwa kweli kuwa bila madhara?

Katika visa fulani watu wanaotazama au kusoma vichapo vya ponografia hata hushindwa kufurahia uhusiano wa kawaida wa ngono na mwenzi wao. Ili kuelewa sababu, fikiria kusudi la awali la Mungu kwa wenzi wa ndoa. Kwa upendo aliwapa waume na wake uwezo wa kuonyeshana upendo kupitia uhusiano wa ngono wenye kuheshimika. Mithali 5:18, 19 laonyesha kwamba uhusiano huo ulikusudiwa ufurahishe: “Umfurahie mke wa ujana wako . . . Maziwa yake yakutoshe sikuzote; na kwa upendo wake ushangilie daima.” (Italiki ni zetu.)

Ona kwamba upendo ndio ungekuwa msingi wa uhusiano wa ngono. Je, mtu anayetazama ponografia anakuza kifungo cha upendo mchangamfu na urafiki? La, anatosheleza tamaa yake mwenyewe ya ngono—mara nyingi akiwa peke yake. Mwanamume aliyeoa anayetazama ponografia aweza kuanza kumwona mke wake kama chombo tu—mtu wa kumtoshelezea tamaa yake. Hilo halipatani na adhama na heshima ambayo Muumba alikusudia waume wawaonyeshe wake. (1 Petro 3:7) Je, zoea linalovuruga mambo ya siri ya ndoa laweza kuonwa kuwa la kupendeza?

Isitoshe, kutazama tu kwa kusudi la kudadisi kwaweza kuongoza kwenye uraibu wa muda mrefu. Mwandikaji mmoja asema hivi: “Kama vile ambavyo waraibu wa dawa za kulevya huhitaji ‘dawa kali zaidi’ ili walewe, ndivyo na watazamaji wa kawaida wa ponografia wanavyohitaji kujidukiza mno ili waweze kusisimuka kama awali.”

Ndivyo ilivyotukia kwa mume aliyetajwa mwanzoni mwa makala hii. Jioni moja miezi kadhaa tangu alipoahidi kuacha kutazama ponografia, mkewe alirejea nyumbani akamkuta akitazama kompyuta. Mkewe alipomtazama aling’amua kwamba kuna kasoro. “[Alionekana] mwenye wasiwasi sana na fadhaa,” akaandika. “Nilipotazama kompyuta, kwa hakika alikuwa akitazama programu fulani iliyokuwa chafu kupindukia. Alisema kwamba aliahidi kwa moyo mweupe kuacha zoea hilo, lakini alishindwa kabisa kujizuia.”

Una sababu nyingi halali za kuhangaikia ponografia ufikiriapo kusambaa kwake na madhara inayoweza kusababisha. Waweza kujilindaje na kuwalinda watoto wako? Makala ya mwisho ya mfululizo huu itachunguza swali hilo.

[Picha katika ukurasa wa 6]

Ponografia hupotoa maadili