Maoni ya Biblia

Ni Nani Aliye Mhudumu?

JIONI ya kuamkia siku ambayo Yesu alitoa uhai wake dhabihu, kulitokea ubishi mkali kati ya rafiki zake wa karibu. Kulingana na Luka 22:24, ‘kulitokea bishano kali miongoni mwao juu ya ni yupi kati yao aliyeonekana kuwa mkubwa zaidi ya wote.’ Hiyo haikuwa mara ya kwanza kwa ubishi kama huo kutokea miongoni mwa mitume wa Yesu. Yesu tayari alikuwa amesahihisha maoni yao angalau mara mbili.

Ni jambo lenye kusikitisha kama nini kwamba jioni hiyo muhimu, Yesu alilazimika kuwakumbusha tena sifa za mhudumu Mkristo. Alisema hivi: “Acheni yeye aliye mkubwa zaidi ya wote miongoni mwenu awe kama aliye mchanga zaidi ya wote, na yule anayetenda kama mkuu kama yule anayehudumu.”—Luka 22:26.

Hatupaswi kushangazwa kwamba mitume walikuwa na maoni yaliyopotoka juu ya vyeo vya juu na umashuhuri. Kabla ya Yesu, waandishi na Mafarisayo ndio waliokuwa mifano yao kwa habari ya uongozi wa kidini. Badala ya kuwaongoza na kuwaelekeza watu kiroho, wahudumu hao wasio wa kweli waliidhinisha mapokeo na sheria ngumu ambazo ‘zilifunga ufalme wa mbingu mbele ya watu.’ Walipenda vyeo vya juu, walipenda umashuhuri, walijifikiria wenyewe tu nao walifanya kazi zao “ili watazamwe na watu.”—Mathayo 23:4, 5, 13.

Mhudumu Tofauti

Hata hivyo, Yesu aliingiza katika wanafunzi wake mawazo mapya juu ya huduma ya kiroho. Alifundisha: “Msiitwe Rabi, kwa maana mmoja ni mwalimu wenu, lakini nyinyi nyote ni akina ndugu. Zaidi ya hayo, msiite yeyote baba yenu duniani, kwa maana mmoja ni Baba yenu, Aliye wa kimbingu. . . . Lakini aliye mkubwa zaidi sana miongoni mwenu lazima awe mhudumu wenu.” (Mathayo 23:8-11) Wanafunzi wa Yesu hawakupaswa kuwaiga viongozi wa kidini wa wakati huo. Ikiwa walitaka kuwa wahudumu wa kweli, walipaswa kumwiga Yesu. Aliwaonyesha mfano wa aina gani?

Neno la Kigiriki di·aʹko·nos latumiwa mara nyingi katika Biblia kurejezea “mhudumu.” Kichapo cha The Encyclopedia of Religion chaeleza kwamba neno hilo halikazii “cheo, bali huduma ya mhudumu kwa  niaba ya yule anayehudumiwa: kuufuata mfano wa Kristo . . . ni jambo kuu katika huduma ya Kikristo.”

Kwa kupatana na ufafanuzi sahihi wa neno “mhudumu,” Yesu alijitoa kabisa kwa ajili ya wengine. Kwa subira alieleza hivi: “Mwana wa binadamu alikuja, si kuhudumiwa, bali kuhudumu na kutoa nafsi yake kuwa fidia katika kubadilishana kwa ajili ya wengi.” (Mathayo 20:28) Yesu hakujifikiria, bali alitumia wakati, nguvu, na vipawa vyake kuwasaidia wengine kimwili na kiroho. Kwa nini? Kwa sababu alihurumia umati wa watu wasioridhishwa kiroho waliokuja kumwona. Alitaka kuwasaidia. Upendo mwingi ulimsukuma katika huduma yake, naye akataka wanafunzi wake wawe na mwelekeo uo huo.—Mathayo 9:36.

Kupitia maisha yake, Yesu alionyesha mfano kwa wahudumu wa wakati ujao. Alisema: “Mavuno ni mengi, lakini wafanyakazi ni wachache. Kwa hiyo, ombeni Bwana-mkubwa wa mavuno atume wafanyakazi katika mavuno yake.” (Mathayo 9:37, 38) Naam, wahudumu wa Kristo wangefanya kazi kubwa kupita zote ulimwenguni—kwa kuhubiri na kufundisha habari njema za Ufalme wa Mungu wangeandaa faraja ya kiroho kwa wanadamu wote.—Mathayo 28:19, 20.

Jambo kuu katika huduma ya Kristo lilikuwa kutoa na kuhudumia wengine, hilo ndilo lililofanya huduma yake iwe tofauti. Aliwafundisha wahudumu wake wawe wafanyakazi, wavuvi na wachungaji wa kiroho, wala si wataalamu na wenye mafumbo waliovaa mavazi na mapambo ya pekee.—Mathayo 4:19; 23:5; Yohana 21:15-17.

Maoni ya Biblia

Kwa kusikitisha, kadiri karne zilivyopita, maoni yanayofaa ya kwamba wahudumu ni wahubiri na walimu waliojitoa yalipotoshwa. Kilichoanza kama huduma ya Kikristo kikawa shirika rasmi linaloongozwa na makasisi. Vyeo mbalimbali vilianzishwa, navyo viliheshimiwa na kupewa mamlaka, na mara nyingi vilitokeza utajiri mkubwa. Hilo lilisababisha migawanyiko. Jamii ya makasisi, iliyoshughulikia tu kutoa sakramenti na kushauri waliokosea, ikatokea. Katika kutaniko la Kikristo la karne ya kwanza kila mshiriki alikuwa mhudumu mwenye kutenda, lakini karne zilipopita, wengi waliacha kutenda huku watu wachache tu waliokuwa wamezoezwa na kuwekwa rasmi wakiruhusiwa kuhubiri na kufundisha.

Hata hivyo, kulingana na Biblia, mhudumu wa Kikristo anajulikana kwa kazi yake ya kujitoa, wala si kwa mavazi ya kipekee, taratibu za kidini, mshahara, au amri ya serikali. Mtume Paulo alieleza mwelekeo ambao mhudumu Mkristo anapaswa kuwa nao. Aliwatia moyo ‘wasifanye jambo lolote kwa majisifu ya bure, bali kwa hali ya akili ya kujishusha chini.’—Wafilipi 2:3.

Kwa hakika Paulo alitenda kupatana na yale aliyohubiri. Alifuata kwa ukaribu mfano wa Kristo, naye hakutafuta kamwe ‘faida yake mwenyewe bali ile ya walio wengi, ili wapate kuokolewa.’ Alielewa na kuhisi moyoni daraka lake la “kuitoa habari njema bila gharama, kwa madhumuni ya kwamba nisipate kutumia vibaya mamlaka yangu katika habari njema.” Hakutaka “utukufu kutoka kwa wanadamu.”—1 Wakorintho 9:16-18; 10:33; 1 Wathesalonike 2:6.

Alikuwa mhudumu Mkristo mzuri jinsi gani! Wahudumu wa kweli ni wale wanaoiga mfano wake mzuri na kuufuata mfano wa Yesu Kristo wa kujitoa bila ubinafsi, huku wakijitoa wenyewe ili kuandaa msaada wa kiroho na faraja itokanayo na habari njema.—1 Petro 2:21.