Dini Zitapatwa na Nini?

DINI nyingi zimeibuka tena katika nchi za ule uliokuwa Muungano wa Sovieti. Kwa sasa, nchini Urusi peke yake, asilimia 50 ya watu hudai kuwa Waothodoksi, na mamilioni ya watu ni wafuasi wa dini nyinginezo. Uislamu, Dini ya Kiyahudi, na Ubudha ni mojawapo ya dini za kale zaidi huko, na Mashahidi wa Yehova wamekuwapo kwa muda mrefu pia.

Mapema mno mwaka wa 1891, wawakilishi wa Wanafunzi wa Biblia, kama vile Mashahidi wa Yehova walivyojulikana kabla ya mwaka wa 1931, walizuru Kishinev, Urusi (inayoitwa leo Chisinau, huko Moldova). Walifanya mikutano na waamini wenzao. Katika mwaka wa 1928, mwakilishi maalumu wa Wanafunzi wa Biblia, George Young, alikutana na maofisa wa Sovieti huko Moscow, Urusi, ili kuomba idhini ya kuchapisha vichapo vya Biblia katika Muungano wa Sovieti. Baadaye, Mashahidi walijulikana sana kwa sababu ya jitihada za Sovieti za kuwaangamiza.

Muungano wa Sovieti ulipovunjika ghafula takriban miaka kumi iliyopita, watu walianza kujiuliza hivi, ‘Kwa nini serikali ya Sovieti ikajaribu kuondolea mbali dini?’ Watu wengi waliofunzwa kutomwamini Mungu kwa miaka mingi wakawa na hamu ya kutaka kujua manufaa ya dini. Je, Biblia ambayo ilikuwa imepigwa marufuku, ingeweza kueleza jinsi ambavyo matatizo yanayokumba wanadamu yatatatuliwa? Warusi walianza kuichunguza wenyewe.

Tatizo Tofauti la Kidini

Watu wengi sana walipendezwa na Biblia katika ule uliokuwa Muungano wa Sovieti. Hivyo basi kukazuka tatizo jipya la kidini. Mwaka uliopita gazeti Guardian la London, Uingereza, lilisema hivi: “Huenda ‘upinzani dhidi ya Mungu’ umekoma, lakini uhasama mpya wa kidini umeanza kutokea, miaka kumi tu tangu kuporomoka kwa serikali ya kwanza ulimwenguni iliyoazimia kutomwamini Mungu.” Ule unaoitwa na gazeti hilo uhasama wa kidini ni nini?

Kama ilivyotajwa katika makala yetu iliyotangulia, Kanisa Othodoksi la Urusi lilishirikiana bega kwa bega na viongozi wa Sovieti ili kuendelea kuwapo na kupata mapendeleo. Gazeti la Guardian laeleza hivi kuhusu kuendelea kwa uhusiano huo: “Kwa muda uliopita wa miaka 10, kanisa limekuwa na uhusiano wa karibu isivyofaa na serikali ileile ambayo ililigandamiza. Kanisa linaunga mkono sana serikali ya Urusi (Kiongozi Mkuu wa Kanisa hilo aliunga mkono vita huko Chechnya) na hivyo limekuwa na uvutano mkubwa wa kisiasa.”

Gazeti Los Angeles Times la Februari 10, 1999, lilitaja uvutano wa kisiasa wa dini lilipokuwa likizungumzia Sheria ya Uhuru wa Dhamiri na Ushirika wa Kidini. Gazeti la Los Angeles Times lilisema kwamba sheria hiyo, iliyotiwa sahihi mwezi wa Septemba 1997 na Rais Boris Yeltsin aliyekuwa akitawala, “iliungwa mkono na Kanisa Othodoksi la Urusi.” Sheria hiyo ililipa Kanisa Othodoksi, dini ya Kiislamu, dini ya Kiyahudi, na Ubudha hadhi ya pekee ya kuwa dini “rasmi.” Miongoni mwa mambo mengine, sheria hiyo iliamuru dini zote nchini Urusi zisajiliwe upya.

Gazeti New York Times la Februari 11, 1999, liliripoti kwamba baada ya sheria hiyo kupitishwa, “Kanisa Othodoksi lilisonga makanisa mengine.” Gazeti hilo la Times liliongezea hivi: “Agosti iliyopita, Kiongozi wa Kanisa Othodoksi la Urusi, Aleksei wa Pili, aliomba dini zote zinazobadili imani ya wengine zipigwe  marufuku, hasa zile zinazojaribu kuwashawishi watu waache ‘dini za mababu zao.’” Tangu hapo, jitihada za kupiga marufuku zile zinazoitwa eti dini zinazobadili imani ya wengine zimepamba moto, na hivyo kusababisha ule unaoitwa “uhasama wa kidini.”

Mojawapo ya Dini Zinazolengwa

Mashahidi wa Yehova wamekuwa mojawapo ya shabaha kuu ya mashambulizi yaliyoongozwa na Kanisa Othodoksi la Urusi. Katika Juni 20, 1996, mwendesha-mashtaka wa Moscow alianza kushughulikia kesi iliyoletwa mahakamani na Chama cha Kulinda Vijana na Dini Bandia ambacho kinapinga madhehebu. Kesi hiyo iliwasilishwa tena na tena hata ingawa ilikuwa ikiahirishwa mara kwa mara kwa sababu hakukuwa na mambo ya kuthibitisha kwamba Mashahidi walikuwa wahalifu.

Pindi hiyo, habari za uwongo zilienezwa kote kuhusu Mashahidi. Gazeti la Urusi Komsomolskaya Pravda lenye nakala 1,200,000, lilisema hivi katika toleo lake la Novemba 21, 1998: “Kwa muda wa miaka miwili tu, Kanisa Othodoksi la Urusi limechapisha zaidi ya vitabu kumi, broshua, na vijitabu vinavyoshutumu Mashahidi wa Yehova.” Kwa nini kanisa hilo limekuwa likijaribu kuwaharibia Mashahidi sifa?

Gazeti la Komsomolskaya Pravda liliendelea kusema kwamba, “yaelekea hasa ni kwa sababu idadi ya washiriki wa tengenezo hilo imeongezeka mara kumi zaidi katika miaka saba iliyopita, nalo Kanisa Othodoksi la Urusi, kama makanisa mengineyo maarufu, linachukia ushindani.”

Kesi dhidi ya Mashahidi iliposikilizwa tena mapema mwaka wa 1999, habari ilisambazwa ulimwenguni kote. Kichwa kikuu cha gazeti la New York Times la Februari 11 chasema: “Mahakama ya Moscow Yachunguza kwa Makini Kupigwa Marufuku kwa Mashahidi wa Yehova.” Makala hiyo ilisema hivi: “Kesi inayosikizwa sasa katika chumba kidogo cha Mahakama ya Moscow, inachunguzwa kwa makini sana na vikundi vya kutetea haki za binadamu. Hilo linaonwa kuwa jaribio la kwanza la kutumia [Sheria ya Uhuru wa Dhamiri na Ushirika wa Kidini] kuzuia ibada.”

Lyudmila Alekseyeva, msimamizi wa Shirika la Kimataifa la Helsinki la Kutetea Haki za Binadamu, alieleza kwa nini kesi ya Mashahidi ilikuwa ikichunguzwa kwa makini. Alisema kwamba endapo wale wanaojaribu kuwagandamiza Mashahidi wa Yehova “watashinda kesi hii,” basi “wataanza kushambulia vikundi vingine” ambavyo si sehemu ya dini maarufu. Lakini kesi hiyo iliahirishwa tena mnamo Machi 12, 1999. Lakini, tarehe 29 ya mwezi uliofuata wa Aprili, Wizara ya Haki ya Urusi ilisajili shirika la “Administrative Center of Jehovah’s Witnesses in Russia.”

Licha ya kusajiliwa na serikali, Mashahidi na dini nyinginezo zaendelea kushambuliwa nchini Urusi na katika baadhi ya zile zilizokuwa jamhuri za Sovieti. Lawrence Uzzell, mkurugenzi wa Taasisi ya Keston huko Oxford, Uingereza, alisema kwamba “inafaa kuwachunguza Mashahidi wa Yehova” kwa sababu mambo yanayowapata “huonyesha kimbele mambo yatakayopata vikundi vinginevyo.” Kwa kweli, uhuru wa kidini wa makumi ya mamilioni ya watu umo hatarini!

Washambuliwa Isivyo Haki

Makuhani wakuu na viongozi wengine wa kidini waliwanyanyasa wafuasi wa Yesu katika karne ya kwanza. (Yohana 19:15; Matendo 5:27-33) Kama tokeo, ilisemwa hivi kuhusu Ukristo: “Kweli kwa habari ya farakano hili yajulikana kwetu kwamba kila mahali huwa lasemwa vibaya.” (Matendo 28:22) Kwa hiyo si ajabu kwamba, Wakristo wa kweli leo wanasemwa vibaya pia, kama ilivyo na Mashahidi wa Yehova.

Lakini, baada ya kuchunguza mashtaka yaliyotolewa dhidi ya Wakristo wa mapema, Gamalieli, Farisayo mashuhuri na mwalimu wa Sheria, alishauri hivi: “Msijiingize katika mambo ya watu hawa, bali waacheni; (kwa sababu, ikiwa mpango huu au kazi hii ni kutoka kwa wanadamu, itapinduliwa; lakini ikiwa ni kutoka kwa Mungu, hamtaweza kuwapindua;) ama sivyo, huenda mkaonwa kuwa wapiganaji  dhidi ya Mungu kwa kweli.”—Matendo 5:38, 39.

Wachambuzi pia wamewachunguza Mashahidi wa Yehova kwa uangalifu sana leo. Wamegundua nini? Sergey Blagodarov, ambaye ni muumini wa Kanisa Othodoksi, alisema hivi katika gazeti la Komsomolskaya Pravda: “Kwa zaidi ya miaka mia moja, hakuna nchi yoyote duniani imeweza kuthibitisha kuwa Mashahidi wa Yehova ni wahalifu, au kwamba hawastahili kuwapo.”

Dini Zitapatwa na Nini?

Biblia husema juu ya “dini iliyo safi,” au “ibada iliyo safi na isiyo na unajisi.” (Yakobo 1:27a; ona pia Union Version.) Kama ilivyotajwa kwenye makala iliyotangulia, Biblia huita milki ya ulimwengu ya dini bandia kuwa “kahaba mkubwa . . . ambaye wafalme wa dunia walifanya uasherati naye.” Yasemekana kwamba kahaba huyo wa kidini wa ufananisho—“Babiloni Mkubwa”—“amelewa damu ya watakatifu na damu ya mashahidi wa Yesu.”—Ufunuo 17:1-6.

Hayo ni maelezo muafaka kama nini kuhusu dini ambayo imeshirikiana sana na viongozi wa kisiasa wa ulimwengu ili kulinda cheo na mapendeleo yake! Hata hivyo, kahaba huyo mkubwa wa kidini wa ufananisho hana budi kuharibiwa wakati ujao. Biblia yasema kwamba “katika siku moja tauni zake zitakuja, kifo na kuomboleza na njaa kali, naye atachomwa kabisa kwa moto, kwa sababu Yehova Mungu, aliyemhukumu, ni mwenye nguvu.” Ndiyo sababu malaika atoa onyo la dharura: “Tokeni kwake . . . ikiwa hamtaki kupokea sehemu ya tauni zake.”—Ufunuo 18:4, 7, 8.

Mwanafunzi Yakobo alipoeleza kuhusu “dini iliyo safi,” alisema haina “doa kutokana na ulimwengu.” (Yakobo 1:27b) Isitoshe, Yesu Kristo alisema hivi kuhusu wafuasi wake wa kweli: “Wao si sehemu ya ulimwengu, kama vile mimi si sehemu ya ulimwengu.” (Yohana 17:16) Basi je, waona kwa nini Mashahidi wa Yehova hujitenga na uvutano wenye kuchafua wa mambo ya kisiasa ya ulimwengu huu? Wao hujitenga kwa sababu wanaamini kabisa ahadi hii ya Biblia: “Ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hudumu milele.”—1 Yohana 2:17.

[Picha katika ukurasa wa 15]

Kusikizwa kwa kesi huko Moscow mnamo Februari 1999. Washtakiwa (kushoto), hakimu (katikati), na waendesha-mashtaka (kulia)

[Picha katika ukurasa wa 15]

Biblia husema mambo yatakayopata dini zote