Karibuni Kwenye Mkusanyiko wa Wilaya wa “Walimu wa Neno la Mungu”!

MAMILIONI WATAHUDHURIA mamia ya mikusanyiko hiyo ulimwenguni kote. Mikusanyiko 38 imepangwa kufanywa katika Afrika Mashariki. Mkusanyiko wa kwanza utafanywa Agosti 3-5, na wa mwisho utafanywa Septemba 7-9. Yaelekea mojawapo ya mikusanyiko hii ya siku tatu—Ijumaa hadi Jumapili—utafanywa katika jiji lililo karibu na mahala unapoishi.

Katika sehemu nyingi, kila siku programu itaanza kwa muziki saa 3.30 asubuhi. Baada ya hotuba ya kukaribisha siku ya Ijumaa, kutakuwa na hotuba zenye vichwa vinavyotegemea Biblia kama vile “Ufundishaji wa Ufalme Hutokeza Matunda Mema,” “Tunachochewa na ‘Mambo Yenye Fahari ya Mungu,’” na “Pendezwa na Uadilifu wa Yehova.” Kipindi cha asubuhi kitamalizika kwa hotuba ya msingi yenye kichwa, “Tumeandaliwa Kikamili Kuwa Walimu wa Neno la Mungu.”

Hotuba ya kwanza alasiri, “Watu Waliosafishwa kwa Ajili ya Kazi Zilizo Bora,” itafuatwa na mfululizo wenye sehemu tatu wenye kichwa “Tujifunze Tunapowafundisha Wengine.” Mfululizo huo utakazia umuhimu wa kuishi kupatana na yale tunayofundisha kuhusu maadili, funzo la Biblia la kibinafsi, na uhitaji wa kupinga jitihada za Ibilisi za kutuongoza vibaya. Hotuba itakayofuata itakuwa na kichwa “Chukia Kabisa Ponografia ya Ulimwengu Yenye Kudhuru.” Kisha programu ya siku hiyo itamalizika kwa hotuba inayozungumzia Isaya sura ya 60 yenye kichwa “Yehova Arembesha Watu Wake kwa Kuwapa Nuru.”

Hotuba za Jumamosi “Kupata Burudisho Chini ya Nira ya Kristo,” “Igeni Mwalimu Mkuu,” na “Je, Uko Tayari Kuwatumikia Wengine?” zitakazia umuhimu wa kufuata mfano wa Kristo. Siku hiyohiyo ya Jumamosi, kutakuwa na mifululizo miwili kwa muda wa saa mbili, yenye kichwa “Wahudumu Ambao Kupitia Kwao Wengine Hupata Kuwa Waamini” na “Faidika Zaidi na Elimu ya Kitheokrasi.” Mfululizo wa asubuhi utaandaa madokezo ya kufanya wanafunzi, na ule wa alasiri utakazia jinsi tunavyoweza kufaidika zaidi na funzo la Biblia na uhudhuriaji wa mikutano ya Kikristo. Programu ya asubuhi itamalizika kwa hotuba ya ubatizo na baada ya hapo wanaostahili watapata fursa ya kubatizwa. Wengi watakuwa na hamu nyingi sana ya kusikiliza hotuba ya kumalizia siku ya Jumamosi, yenye kichwa, “Maandalizi Mapya ya Kutusaidia Kufanya Maendeleo ya Kiroho.”

Programu ya Jumapili asubuhi inatia ndani mfululizo wenye sehemu tatu unaozungumzia kitabu cha Malaki na matumizi yake katika hali mbalimbali za leo. Baada ya mfululizo huo kutakuwa na drama ya mavazi rasmi ya kuigiza kuhusu uasi wa Kora, Dathani, na Abiramu dhidi ya mamlaka ambayo Musa alipewa na Mungu. Baadaye, kutakuwa na hotuba itakayokazia somo la drama hiyo. Programu ya alasiri itakuwa na hotuba ya watu wote yenye kichwa “Ni Nani Wanaofundisha Mataifa Yote Ile Kweli?”

Bila shaka utatajirishwa kiroho kwa kuhudhuria siku zote tatu. Ili upate mahala palipo karibu na kwako, wasiliana na Jumba la Ufalme la Mashahidi wa Yehova lililo karibu nawe au uwaandikie wachapishaji wa gazeti hili. Toleo letu la Mnara wa Mlinzi la Februari 15, 2001 liliorodhesha mahala pa mikusanyiko kadhaa katika Afrika Mashariki na Jamhuri ya Kidemokrasia ya Kongo.