Kitabu cha Kumbukumbu Rafiki Anayetumainika

KITABU cha kumbukumbu za kila siku, chaweza kuwa mwenzi mwaminifu, na rafiki wa karibu katika ulimwengu usio na huruma. Mwandishi Christina Baldwin anasema kwamba kitabu cha kumbukumbu “chatuwezesha kuhifadhi mkusanyo wa masimulizi ya maisha yetu ya binafsi.” Kama vile kitabu kikubwa cha picha zetu binafsi kinavyoweza kutukumbusha mambo yaliyotukia zamani, ndivyo kitabu cha kumbukumbu kinavyofunua na kuhifadhi matukio ya maisha yetu.

Katika siku za Biblia mara nyingi serikali zilihifadhi masimulizi ya matukio muhimu. Biblia yenyewe inarejezea masimulizi kadhaa ya aina hiyo. (Hesabu 21:14, 15; Yoshua 10:12, 13) Wagiriki walitengeneza kalenda iliyoitwa ephemerides, * ambamo waliandika misogeo ya kila siku ya nyota na sayari. Waroma, waliotwaa Ugiriki, walianza kutumia kalenda hizo, lakini walizifanya ziwe zenye faida zaidi kwa kuandika ndani yake pia matukio ya kila siku yaliyofaidi na kupendeza watu wote. Waliziita kalenda hizo diarium, neno ambalo linatokana na neno la Kilatini la dies, linalomaanisha “siku.”

Hata hivyo, ilikuwa tu baada ya kutolewa kwa kitabu cha kumbukumbu cha Samuel Pepys katika karne ya 17, ndipo watu wengi katika nchi za Magharibi walipoanza kupenda kuandika kitabu cha matukio ya kila siku. Katika kitabu chake cha kumbukumbu, Pepys alichanganya, kwa njia isiyo ya kawaida, maandishi kuhusu mambo ya dini na mambo ya ulimwengu. Kitabu hicho kimesaidia wanahistoria kujua mengi juu ya maisha katika pindi ya utawala wa Mfalme Charles wa Pili wa Uingereza.

Tangu wakati huo, wengi wameandika kitabu cha kumbukumbu. Vitabu vingi vya kumbukumbu ni hati muhimu za historia. Mojawapo ya vitabu hivyo ni kitabu cha kumbukumbu cha msichana mdogo Myahudi aliyekuwa mafichoni ili Wanazi wasimkamate. Kitabu cha kumbukumbu cha Anne Frank kinachoitwa Diary of a Young Girl ni uthibitisho unaohuzunisha wa unyama wa mwanadamu kwa mwanadamu mwenzake.

Kwa Nini Kitabu cha Kumbukumbu Kinavutia?

Kuandika kitabu cha kumbukumbu kwamwezesha mtu kutimiza tamaa  moja ya msingi ya wanadamu—tamaa ya kujieleza. Kuandika kitabu cha kumbukumbu kwatuwezesha kutafakari matukio muhimu ya maisha yetu kama vile jinsi tulivyofurahi tuliposikia maneno ya kwanza ya mtoto wetu au jinsi tulivyokuza uhusiano pamoja na mpenzi wetu. Tunaposoma maandishi hayo baadaye tunaweza kuwazia tena matukio hayo muhimu na hisia ambazo tulikuwa nazo.

Mojawapo ya faida kubwa ya kitabu cha kumbukumbu ni kwamba kunatusaidia kujijua. Mwandishi Tristine Rainer anakiita kitabu cha kumbukumbu “chombo kinachokusaidia kueleza hisia zako bila vizuizi.”

Biblia yasema hivi katika Mithali 12:25: “Uzito katika moyo wa mtu huuinamisha.” Ikiwa mtu anasitasita kusema na mwingine juu ya “uzito katika moyo” wake, huenda ataweza kujieleza kupitia maandishi. Kwa hiyo, watu walio na maumivu moyoni wanashauriwa kuandika kitabu cha kumbukumbu. Anapoandika kitabu cha kumbukumbu mtu anaweza kutafakari maisha, kujiwekea miradi mipya, na huenda akaweza kuona jinsi ya kutatua matatizo. Kuandika juu ya matatizo na hisia kwaweza kumsaidia mtu aone kile kinachosababisha tatizo hasa na kubainisha jambo muhimu.

Kuandika kitabu cha kumbukumbu kwaweza pia kuelimisha. Shirika la Walimu la Marekani latolea wazazi ushauri huu: “Watie moyo watoto wako waandike kitabu cha kumbukumbu. Kuandika kitabu kama hicho hukuza ubunifu na ustadi wa kuandika.”

Nianzeje?

Kwanza, tafuta mahali patulivu na daftari au kitabu cha kuandikia ambacho unakipenda. Huenda ukaona likiwa jambo gumu kujaza ukurasa mzima kwa maandishi. Lakini utafanikiwa ukiandika kwa njia rahisi na kwa unyofu, papo hapo bila kupangia mahususi. Unaweza kujiuliza maswali kama: ‘Nimefanya nini leo? Nilihisije? Nilikula chakula gani? Niliongea na nani? Maisha ya wapendwa wangu yanaendeleaje?’ Ama unaweza kuanza na habari ya hivi sasa kwa kujiuliza: ‘Niko wapi sasa hivi? Nina miradi gani? Ninatamani nini?’ Kisha bila kujichambua sana, anza kuandika.

Andika kadiri unavyotaka kuandika. Andika wakati unapotaka kuandika. Uwe mnyofu na uandike ukweli. Usihofie kufanya makosa ya herufi wala ya sarufi. Hakuna mwingine atakayesoma maandishi yako. Huenda ukapenda kutia ndani picha, sehemu zilizokatwa katika gazeti, au chochote kile kilicho muhimu kwako, kwa kuzibandika ndani ya kitabu. Hicho ni kitabu chako. Unaweza kukiweka katika hali nadhifu au ovyoovyo, na kinaweza kuwa kidogo au kikubwa. Na utaandika tu unapojisikia kuandika. Ikiwa unahisi kwamba kuandika kitabu cha kumbukumbu ni wajibu mgumu, hutaendelea kukiandika.—Soma sanduku.

Kama vile mwanasayansi anavyoandika mabadiliko anayoona katika kiumbe anayechunguza, wewe vilevile unaweza kuona na kuchunguza mienendo na mielekeo yako maishani kwa kuandika kitabu cha kumbukumbu. Kitabu chako kitafunua kile kinachokufurahisha na kukuumiza, udhaifu wako mbalimbali na vipawa vyako. Kuandika kitabu hicho kutaboresha uwezo wako wa kujieleza. Ni kweli kwamba kuandika kitabu cha kumbukumbu hutaka ujiwekee masharti fulani, lakini utafaidika sana ukifanya hivyo.—Imechangwa.

[Maelezo ya Chini]

[Sanduku katika ukurasa wa 27]

Jinsi ya Kuanza

◆ Chagua kitabu cha kuandikia kinachodumu ambacho huenda kikawa rahisi kubeba.

◆ Tafuta mahali patulivu ambapo unaweza kukaa peke yako. Andika tarehe kila unapoandika.

◆ Ukikosa kuandika siku chache, usivurugike, endelea tu mahali ulipoachia.

◆ Usichambue maandishi yako. Usijizuie, na uandike kila jambo unalotaka kutaja. Andika mambo kwa undani—wala usiandike mambo kwa jumla tu.