Kutoka kwa Wasomaji Wetu

Historia Ninawaandikia kuhusu mfululizo wenye kichwa “Tujifunze Nini Kutokana na Historia?” (Machi 8, 2001) Mfululizo huo ni mojawapo ya mifululizo mizuri zaidi ambayo nimepata kusoma. Nilisoma mfululizo wote mara moja. Ninastaajabishwa daima kuona jinsi mnavyofanya utafiti wa kindani sana, na jinsi habari hizo bora zinavyotolewa bila kukoma.

M. C., Marekani

Ugonjwa Wenye Kudhoofisha Asanteni sana kwa makala yenye kichwa “Pambano Langu na Ugonjwa Wenye Kudhoofisha.” (Machi 8, 2001) Nilishikwa na ugonjwa wa interstitial cystitis (IC) nilipokuwa na umri wa miaka 18. Ugonjwa huu umenisumbua sikuzote kwa kuwa umenizuia sana nisifanye mengi. Nimehisi kwamba sijawa na uvumilivu wa kutosha, na kwamba sifai kitu. Baada ya kusoma makala hiyo niliweza kuondoa hisia nyingi zisizofaa ambazo nilikuwa nimefungia moyoni kwa miaka mingi. Niliposoma kwamba ugonjwa wa IC ulimzuia Tanya Salay pia asifanye mengi, nilisaidiwa kusawazisha maoni yangu.

B. Y., Marekani

Ninaposoma makala kama hizo, ni kana kwamba matatizo yangu mwenyewe yanakuwa madogo sana. Ninataka Tanya Salay ajue kwamba ninafurahi sana kwamba hakujiua bali alimtegemea Yehova. Mume wake apasa kusifiwa vilevile kwa msaada wake.

I. W., Marekani

Asanteni sana kwa makala kama hizo. Hata ingawa sisi wenyewe hatuna magonjwa hayo, makala hizo hutusaidia kuwaelewa wale walio nayo.

C. L., Marekani

Kupendwa na Mtu Usiyempenda Niliposoma makala “Vijana Huuliza . . . Naweza Kumkataaje?” (Machi 22, 2001), nilikumbushwa kuhusu huzuni niliyopata mimi mwenyewe. Nilipuuza hisia zangu, na ndoa yetu haikufanikiwa hata kidogo. Kama vile makala hiyo ilivyosema, “huruma si msingi mzuri wa kuanzishia ndoa.”

A. M., Marekani

Kijana mmoja mwanamume alitaka niwe rafiki yake, lakini nilikataa kwa kuwa nilijua kwamba miradi yake na yangu ilikuwa tofauti. Licha ya kumkataa, aliniambia mara nyingine kuwa ananipenda. Nilikuwa na wasiwasi, na niliogopa kwamba kama ningemkataa tena, singepata mwenzi kamwe. Hata hivyo, baada ya kusoma habari hiyo, nilitulia. Nilijua kwamba nimefanya uamuzi unaofaa.

S. N., Japani

Siku tatu kabla ya kupata makala hiyo, kijana mwanamume aliniambia hivi: “Ningependa tujuane zaidi.” Nilivurugika. Nilivutiwa naye lakini nilijua kwamba nilikuwa mchanga mno kuweka miadi ya kijinsia. Sasa, baada ya kusoma makala hiyo, na kusoma tena makala “Vijana Huuliza . . . Vipi Ikiwa Wazazi Wangu Wanafikiri Mimi Ni Mchanga Mno Kuweka Miadi ya Kijinsia?” (Januari 22, 2001), ninajua la kufanya.

R. S., Marekani

Nilifikiri nilikuwa nikifanya uamuzi unaofaa nilipochumbiwa. Wazazi wangu na Wakristo wengine waliokomaa waliniambia kwamba sikuwa nimechagua mchumba anayefaa, lakini sikuwasikiliza. Baada ya mwezi mmoja, nilivunja uchumba. Laiti ningalikuwa na ujasiri wa kutosha kukataa uchumba huo, mimi na mchumba wangu tungaliepuka maumivu mengi ya moyoni.

V. T., Italia

Mzunguko wa Damu Baada ya kufanyiwa upasuaji kwenye mfumo wangu wa limfu hivi majuzi nimekuwa na uvimbe unaoitwa chovya. Niliposoma makala yenye kichwa “Maajabu ya Mfumo wa Mzunguko wa Damu” (Machi 22, 2001), wasiwasi wangu ukaisha. Ukurasa wa mwisho wa makala hiyo ulieleza kisababishi cha uvimbe huu.

M. R., Italia