Kutoka kwa Wasomaji Wetu

Takwimu za Biashara ya Utumwa Nimekasirishwa sana na taarifa moja kwenye sehemu yenye kichwa “Biashara ya Uhalifu Inayokua Haraka Zaidi” katika makala ya “Kuutazama Ulimwengu.” (Desemba 22, 2000) Sehemu hiyo ilisema kwamba watumwa milioni 11.5 walihamishwa kutoka Afrika kwa meli katika ile miaka 400 ya utumwa. Utumwa uliisha nchini Marekani mnamo mwaka wa 1865. Ukiondoa miaka 400, hiyo itakurudisha nyuma hadi mwaka wa 1465—muda mrefu kabla ya watu kukaa katika koloni ya Jamestown!

M. B., Marekani

Kwa mujibu wa kichapo “Encyclopædia Britannica,” watumwa Waafrika walianza kuhamishwa “katika miaka ya 1450.” Wanahistoria wanasema kwamba Waafrika waliohamishwa kinguvu walipelekwa kwenye mashamba makubwa ya visiwa vya Atlantiki muda mrefu kabla ya kuanza kupelekwa Karibea na Marekani.—Mhariri.

Kutumia Vibaya Kitambulisho Nilifurahia kusoma makala yenu yenye kichwa “Wanaweza Kutumia Vibaya Vitambulisho Vyako!” (Machi 22, 2001) Mtu fulani aliiba namba ya akaunti yangu ya hundi, akatengeneza hundi bandia, na kutumia karibu dola 800 za Marekani! Ilichukua muda mrefu kurekebisha hali hiyo—kufunga akaunti hiyo, kufungua nyingine, na kuripoti jambo hilo kwenye kituo cha polisi. Nimejifunza kwamba napaswa kutumia busara ninapotoa habari za kibinafsi.

D. S., Marekani

Wakati mume wangu alipokuwa safarini, mkoba wake uliibwa pamoja na kadi zetu zote za mikopo na vitabu vya hundi. Makala hiyo kuhusu kutumia vibaya vitambulisho ilituonyesha jinsi tunavyopaswa kushughulikia hali hiyo, kutia ndani kupiga ripoti kwenye idara zinazoshughulikia ulaghai katika mashirika ya mikopo ya eneo letu. Hilo liliwazuia wezi hao wasichukue mikopo mingine. Kama singesoma makala hiyo, singeweza kufikiria jambo hilo.

H. C., Marekani

Jua Mimi humshukuru Yehova mara nyingi kwa ajili ya jua, mwezi, na dunia yetu inayopendeza, lakini kwa kawaida sifikiri kwa uzito kuhusu vitu hivyo. Baada ya kusoma makala yenye kichwa “Hali ya Pekee ya Jua Letu” (Machi 22, 2001), nilichochewa kutoa sala kutoka moyoni ili kumshukuru Mungu kwa zawadi zake za ukarimu na zenye thamani kubwa.

B. P., Marekani

Nina umri wa miaka tisa, na ninawashukuru kwa kuandika makala zenye kupendeza—kama hiyo kuhusu jua. Mimi hujifunza mambo mengi ninaposoma gazeti la Amkeni!

A. B., Marekani

Nywele Mimi hutengeneza watu nywele, na niliposoma makala yenye kichwa “Kuchunguza Nywele Zako” (Aprili 8, 2001), nilifurahi sana. Nilimpa mwajiri wangu nakala moja ya gazeti hilo. Alipendezwa nalo na akawapa wasichana wengine kazini. Asanteni kwa habari hiyo yenye mafaa.

D. L., Rumania

Asanteni sana kwa kielezi chini kilichorejelea kwenye makala moja ya zamani yenye kichwa, “Alopecia—Living in Silence With Hair Loss” (“Kuvumilia Ugonjwa wa Kutoka-toka Nywele” Aprili 22, 1991, Kiingereza) Nimekuwa na tatizo hilo kwa miaka 17. Katika ulimwengu huu ambao unajali sana sura na unaopuuza watu walio tofauti, inatia moyo sana kujua kwamba ninaungwa mkono na Yehova na tengenezo lake.

M. G., Italia

Simulizi la Msanii Mimi ni mwangalizi asafiriye wa makutaniko ya Mashahidi wa Yehova, na ninajua familia yenye baba Mkristo ambaye hajafanya maendeleo. Yeye ni mtu mzuri, lakini anapenda kutengeneza ndege za vita za kifani. Yeye hucheza mchezo wa kupigana na ndege kwenye kompyuta na hutumia saa nyingi akipambana na ndege za adui. Tumejaribu kumsaidia aone uhitaji wa kubadili maoni yake kuhusu vita. Sasa tuna simulizi hilo zuri la Dorothy Horle lenye kichwa “Kutukuza Amani Badala ya Vita.” (Aprili 8, 2001) Ninapanga kuzungumza naye kuhusu makala hiyo.

P. P., Jamhuri ya Dominika