Kutoka kwa Wasomaji Wetu

Utumwa Hata sijui nisemeje ili kuonyesha shukrani zangu kwa mfululizo wa makala “Utumwa wa Aina Zote Utakapokoma!” (Juni 22, 2002) Makala hizo zilinisaidia kuelewa kwamba watu wanaweza kuwa watumwa wa mambo mengi kama vile dawa za kulevya, sigara, na kusema uwongo. Mimi nilikuwa mtumwa wa kamari. Nilijua moyoni mwangu kwamba kucheza kamari ni makosa, lakini sikuweza kushinda tamaa hiyo. Machozi yalinitoka niliposoma juu ya Ricardo. Ilinisaidia kuona kwamba mtu akijitahidi, anaweza kufaulu kuacha mazoea kama hayo. Asanteni kwa kuchapisha makala kama hiyo inayofariji na inayozungumzia mambo halisi maishani.

M. W., Marekani

Utatu Asanteni kwa makala “Ufalme Uliotetea Uhuru wa Kidini Kujapokuwa Upinzani.” (Juni 22, 2002) Nilifurahi sana kusoma kumhusu Sigismund, aliyeunga mkono wale waliopinga Utatu katika mijadala yao, na jinsi Kanisa la wapinzani wa Utatu lilivyosajiliwa kisheria. Nilipendezwa na jinsi Francis Dávid alivyotoa hoja zenye kusadikisha za kupinga Utatu. Nilikumbushwa ujasiri wa mtume Paulo. Huwa sipendezwi na makala za historia, lakini ninajitahidi kusoma makala zote ili nisitawishe hamu kwa yote yanayoandaliwa na “mtumwa mwaminifu na mwenye busara” kupitia magazeti yetu. (Mathayo 24:45-47) Makala hiyo iliandikwa kwa usanifu na ilifanyiwa utafiti vizuri. Niliipenda sana.

M. C., Marekani

Nilisoma makala yenu yenye kupendeza iliyopinga fundisho la Utatu. Kwa sasa tuna mjadala kuhusu fundisho hilo katika kanisa letu. Kwa muda mrefu mimi nimeamini kwamba fundisho la Utatu si la kweli na ningetaka kuagiza nakala 15 za gazeti hilo ili niwagawie wengine.

A. O., Ujerumani

Nyasi Asanteni kwa makala “Nyasi Si Mmea wa Kijani Tu Unaokua Katika Udongo.” (Juni 8, 2002) Makala hiyo ilinisaidia kuelewa vizuri zaidi kwamba Yehova Mungu ameumba nyasi ili kuendeleza uhai duniani. Mtaalamu mmoja wa mimea alisema kweli aliposema kwamba nyasi ni “kama ukuta unaozuia wanadamu wasikumbwe na njaa.” Yehova ni Msanii Mkuu, na nilikuja kutambua kwamba sifa za Yehova za upendo, hekima, haki, na nguvu, zinaonekana wazi katika jinsi alivyoumba aina mbalimbali za nyasi.

K. O., Japan

Kutoka kwa Kijana Mimi nina umri wa miaka tisa, na niko katika darasa la nne. Ninataka kuwashukuru kwa makala nzuri sana mnazochapisha katika magazeti yenu. Mfululizo mmoja ambao ulinisaidia hasa ulikuwa ule wenye kichwa “Je, Sherehe Zinazopendwa Zina Hatari Zilizofichika?” (Oktoba 8, 2001) Baada ya kumpatia mwalimu wangu wa Kiingereza gazeti hilo, aliweza kutumia katika somo fulani habari iliyopatikana chini ya kichwa kidogo “Uadui wa Kidini.” Alivutiwa sana kuona kwamba habari hizo zilikuwa sahihi sana. Asanteni sana kwa yote mnayoandika ili kututia moyo na kutulinda.

N. R., Italia

Uthamini Huwa ninafurahia sana makala zenu zinazohusu mambo hususa, kama vile makala kuhusu wanyama mbalimbali. Ni mimi tu niliye Shahidi wa Yehova katika familia yetu, na wengine katika familia yetu hawapendezwi na vichapo vyetu vinavyohusu habari za dini. Lakini makala hizo ni zenye kupendeza, na zinataja Muumba kwa njia ambayo watu wasio Mashahidi wanaweza kukubali. Asanteni sana kwa kazi yenu nzuri na magazeti yenye kuvutia mnayochapisha.

T. C., Marekani