Kwa Nini Ponografia Imeenea Sana?

HABARI za ashiki zinazokusudiwa kuchochea hisia za ngono zimekuwapo kwa maelfu ya miaka. Lakini kwa miaka mingi, haikuwa rahisi kutayarisha habari za ponografia na hivyo matajiri na watawala tu ndio waliozipata. Mambo yalibadilika habari zilipoanza kuchapishwa kwa wingi na picha na sinema zilipobuniwa. Maskini walianza kuipata ponografia kwa urahisi na kwa bei nafuu.

Kubuniwa kwa mashine za video kulichangia kuenea kwa ponografia. Tofauti na sinema na picha za zamani, kanda za video ziliweza kuhifadhiwa, kunakiliwa, na kusambazwa kwa urahisi. Pia zingeweza kutazamwa nyumbani. Hivi karibuni, kuenea kwa televisheni na Internet kumefanya iwe rahisi zaidi kutazama ponografia. Mtu anayeogopa kwamba jirani yake atamwona akiwa katika sehemu yenye kanda za ponografia katika duka la video, sasa anaweza “kukaa nyumbani na kuziagiza kwa kubonyeza tu kidude cha televisheni yake inayotumia kebo au setilaiti,” asema mchunguzi wa vyombo vya habari Dennis McAlpine. Alisema kwamba kupatikana kwa urahisi kwa programu hizo “kumefanya ponografia iwe yenye kukubalika zaidi.”

Ponografia Yakubalika

Watu wengi wana maoni tofauti kuhusu ponografia kwa sababu sasa inakubalika. “Tayari imeathiri sana utamaduni wetu kuliko drama za muziki, dansi, michezo ya kuigiza, muziki na sanaa yetu kwa ujumla,” asema mwandishi Germaine Greer. Mitazamo ya siku hizi kuelekea  ponografia inaweza kuonekana katika mitindo ya kikahaba inayovaliwa na watu mashuhuri, video za muziki zinazoendelea kuonyesha picha za ngono, na matangazo ya vyombo vya habari yanayohusiana na ponografia.” McAlpine amalizia: “Jamii inakubali kila kitu kinachoonyeshwa na vyombo vya habari. . . . Hilo linaendeleza wazo la kwamba ponografia ni nzuri.” Kwa sababu hiyo, “yaonekana watu hawashtuki,” analalamika Andrea Dworkin. “Ni kana kwamba hawajali.”

Kutetea Ponografia

Akitoa maelezo kama ya Dworkin, mpelelezi mstaafu wa Shirika la Ujasusi la Marekani (FBI) Roger Young anasema kwamba watu wengi “hawaoni matokeo mabaya ya picha chafu na matatizo yanayosababishwa nazo.” Wengine wanapotoshwa na wale wanaotetea ponografia, wakidai kwamba hakuna uthibitisho unaoonyesha kwamba picha za ponografia zinawadhuru watu. “Ponografia si halisi,” aandika mwandishi F. M. Christensen, “yaonekana wale wanaopinga ponografia hawatambui jambo hilo.” Lakini ikiwa jambo ambalo si halisi haliwezi kumwathiri mtu, basi matangazo ya biashara yanategemea nini? Kwa nini mashirika hutumia mamilioni ya dola kutayarisha matangazo ya biashara, video, na kuchapisha matangazo hayo ikiwa hayawezi kuwaathiri watu kwa muda mrefu?

Ukweli ni kwamba sawa na matangazo yoyote ya biashara yenye matokeo, kusudi kuu la ponografia ni kuamsha tamaa ambazo hazikuwapo. “Kusudi kuu la ponografia ni kuleta faida,” aandika mtafiti Steven Hill na Nina Silver. “Na kwa kuwa biashara hii imeenea sana, kitu chochote huonwa kuwa kinaweza kutumiwa kuleta  pesa, hasa miili ya wanawake na mahusiano ya ngono kati ya watu.” Greer analinganisha ponografia na chakula kinachopendwa sana ambacho hakina lishe na kimetiwa kemikali zenye kuongeza ladha. Anasema, “ngono zinazoweza kupatikana kwa urahisi kwenye vyombo vya habari si ngono halisi . . . Matangazo ya biashara kuhusu vyakula huwafanya watu wanunue chakula kisicho na lishe nayo matangazo ya habari za ngono huwafanya watu wapendezwe na ngono za kuwaziwa tu.”

Madaktari fulani hudai kwamba ponografia inaweza kuanzisha zoea ambalo ni vigumu kuacha hata kuliko zoea la kutumia dawa za kulevya. Matibabu ya wale waliozoea dawa za kulevya mara nyingi huanza kwa kuondoa dawa hizo mwilini. Lakini zoea la ponografia, aeleza Dakt. Mary Anne Layden wa Chuo Kikuu cha Pennsylvania, “hutokeza picha akilini ambazo hudumu daima katika akili ya mtazamaji na kutia mizizi katika ubongo.” Ndiyo sababu watu wanaweza kukumbuka dhahiri picha za ponografia walizoona miaka iliyopita. Anamalizia kwa kusema: “Hii ndiyo kasumba ya kwanza ambayo haina tiba.” Lakini je, hilo lamaanisha kwamba mtu hawezi kuacha zoea la ponografia? Na ponografia hutokeza madhara gani hususa?

[Sanduku katika ukurasa wa 5]

Ukweli Kuhusu Ponografia Kwenye Internet

▪ Karibu asilimia 75 ya ponografia kwenye Internet hutoka Marekani. Karibu asilimia 15 hutoka Ulaya.

▪ Inakadiriwa kwamba watu wapatao milioni 70 hutazama vituo vya ponografia kwenye Internet kila juma. Karibu milioni 20 ya watu hao wako Kanada na Marekani.

▪ Hivi majuzi uchunguzi mmoja ulionyesha kwamba katika kipindi cha mwezi mmoja, Ujerumani ndiyo nchi iliyokuwa na watazamaji wengi zaidi wa ponografia kwenye Internet huko Ulaya, ikifuatiwa na Uingereza, Ufaransa, Italia, na Hispania.

▪ Nchini Ujerumani, watazamaji wa ponografia kwenye Internet hutumia wastani wa dakika 70 kila mwezi wakitazama vituo mbalimbali vya ponografia.

▪ Barani Ulaya, watazamaji wa ponografia wenye umri unaozidi miaka 50 ndio hutumia wakati mwingi zaidi wakitazama ponografia kwenye Internet.

▪ Kulingana na gazeti moja, asilimia 70 ya watu wanaotazama ponografia kwenye Internet hufanya hivyo mchana.

▪ Watu fulani wanakadiria kwamba vituo 100,000 kwenye Internet vina ponografia inayohusisha watoto.

▪ Karibu asilimia 80 ya ponografia inayotumia watoto kwa makusudi ya kibiashara hutoka Japan.

[Picha katika ukurasa wa 4]

Ponografia inapatikana kwa urahisi zaidi