Kutoka kwa Wasomaji Wetu

Hali ya Hewa Ninawaandikia kuwashukuru kwa mfululizo “Kwa Nini Hali ya Hewa Imebadilika?” (Agosti 8, 2003) Nilishangaa niliposoma ile sehemu iliyosema: “Ingawa misiba hiyo husababisha shida nyingi, inaweza kuleta faida pia.” Lakini niliposoma sentensi iliyofuata: “Inaweza kuwachochea watu kuonyesha kwamba wanawapenda na kuwajali majirani zao,” nilikubali kabisa jambo hilo. Kila siku tunakabili taabu za kila aina, si misiba tu. Ninataka kukumbuka kwamba jambo lolote lile likitukia, kuna faida pia.

S. T., Japan

Msaada Nimesoma makala yenye kichwa “Kitu Kisichoweza Kuharibiwa na Dhoruba.” (Agosti 8, 2003) Nilithamini hata zaidi kuwa sehemu ya tengenezo hili kwa kuona jinsi Mashahidi wa Yehova walivyofanya wakati wa misiba hiyo ya asili. Asanteni kwa kuchapisha makala kama hizo, zinazotusaidia kuonyesha sifa ambazo haziwezi kuharibiwa na dhoruba yoyote ile.

M. P., Italia

Nimekumbwa na misiba mingi maishani, kutia ndani mafuriko na matetemeko ya nchi. Nilikuwa nikihubiri nyumba kwa nyumba wakati tetemeko la nchi lilipotokea mwaka wa 1989. Mvulana mmoja mwenye umri wa miaka 14 aliyekuwa pamoja nami alianza kukimbia kwa sababu ya wasiwasi! Nilimshika na kusali pamoja naye ili atulie. Muda si muda, nyaya za umeme zilianguka mahali tulipokuwa. Watu walishikwa na wasiwasi! Sakafu ya saruji ya nyumba yangu ilipasuliwa sana. Lakini alasiri hiyohiyo, tulirudi kuhubiri nyumba kwa nyumba ili kuwasaidia watu wakabiliane na hali hiyo. Makala hiyo ilinikumbusha vizuri sana yaliyopita!

B. S., Marekani

Asanteni sana kwa kuchapisha makala zenye kutia moyo kama vile “Kitu Kisichoweza Kuharibiwa na Dhoruba.” Nililia nilipokuwa nikiisoma. Bila shaka, hakuna kitu kinachoweza kuharibu upendo mwingi tulio nao kwa ajili ya Wakristo wenzetu na jirani zetu.

I. A., Japan

Dawa za Kulevya Asanteni sana kwa makala “Ufanye Nini Kijana Wako Akitumia Dawa za Kulevya?” (Aprili 8, 2003) Nimejifunza Biblia na Mashahidi wa Yehova kwa muda fulani sasa, lakini sijafanya maendeleo kwa sababu ya tatizo hilo. Niliposoma sanduku “Msaada kwa Wale Wanaojaribu Kuacha Kutumia Dawa za Kulevya,” nilitambua kwamba kusoma Biblia kila siku na kutumia kanuni zake kutanisaidia ninapojaribu kuacha zoea hilo. Pia, nimefarijiwa sana kujua kwamba kweli Mungu ananijali.

R.S.A., Brazili

Watoto Wanaofadhaishwa Ningependa kushukuru sana kwa mfululizo wa makala “Je, Watoto Wanakua Haraka Mno?” (Aprili 22, 2003) Hicho ndicho kitu nilichohitaji. Kwa kuwa mimi ni mama katika familia yenye mzazi mmoja na mhubiri wa wakati wote, nina shughuli nyingi sana. Mara nyingi mimi hujiuliza, ‘Je, mimi ni mama mzuri? Je, mimi hudai mengi mno kutoka kwa binti yangu?’ Ninafarijiwa kujua maendeleo ninayohitaji kufanya. Ninataka kutumia wakati na binti yangu akiwa mtoto, na ninataka afurahie maisha yake ya utotoni. Ijapokuwa makala zenu zote hunijenga, makala kama hizi hunitia moyo sana.

M.D.E., Mexico

Mtoto Amtafuta Mungu Nina umri wa miaka 11. Nilisoma makala yenye kichwa “Ninataka Kujua Mengi Zaidi Kumhusu Yehova.” (Aprili 22, 2003) Nilitiwa moyo sana kujua kwamba msichana anayenizidi umri kwa mwaka mmoja tu alijitahidi kujifunza kumhusu Yehova. Sasa ninataka kuwahubiria wengine.

Y. T., Japan