Kutoka kwa Wasomaji Wetu

Maputo Nilifurahia kusoma makala yenye kichwa “Tamasha Kubwa Zaidi ya Maputo Ulimwenguni!” (Machi 8, 2004) Mama yangu anasema kwamba angependa kusafiri ndani ya puto nami pia ningependa kufanya hivyo. Niliposoma makala hiyo, nilishangaa kujua kwamba kuna maputo mengi sana! Nilifurahia picha zilizokuwa katika makala hiyo. Nina umri wa miaka minane.

J. L., Marekani

Mmea wa Ajabu Sijawahi kusoma habari inayopendeza kama ile makala yenye kichwa “Unastahimili Hali Ngumu.” (Machi 8, 2004) Welwitschia ni mmea wenye kustaajabisha sana. Mmea huo unawezaje kuishi kwa muda mrefu chini ya hali ngumu? Makala kama hizo hutufunulia vizuri zaidi hekima ya Muumba wetu mwenye akili, Yehova.

A. C., Urusi

Nililelewa katika nchi ya Angola nami nilikuwa na nafasi ya kuona mmea wa welwitschia mara kadhaa. Kila mara, mmea huo wa ajabu ulinivutia sana. Lakini maoni ya watu wengi kuhusu mmea huo yalinifanya nijiulize maswali mengi. Sasa, miaka 27 baadaye, nimepata majibu ya maswali yangu.

A. O., Uswisi

Nimekuwa nikisoma Amkeni! kwa zaidi ya miaka 15. Kwa kuwa hali zangu haziniruhusu kusafiri, makala kama hizo hunifundisha mengi kuhusu uumbaji wa Yehova. Singeweza kujua kwamba mmea wa welwitschia huishi kwa muda mrefu, ikiwa singesoma gazeti la Amkeni!

L. Z., Ufaransa

Eneo la Burren Nchini Ireland Mwaka uliopita mimi na mume wangu tulipata nafasi ya kutembelea nchi ya Ireland. Kwa hiyo, makala yenye kichwa “Eneo la Ireland Lenye Kuvutia,” ilitupendeza sana. (Machi 8, 2004) Vitabu vingi ambavyo wasafiri hupewa havina habari nyingi kuhusu eneo hilo la Burren. Mchunguzi aliyeitwa Ludlow aliliita eneo hilo, “nchi isiyokalika” ijapokuwa eneo hilo linavutia kwa sababu ya kuwa na miamba mingi. Hata hivyo, tulivutiwa sana kuwaona Mashahidi wa Yehova wakihubiri nyumba kwa nyumba. Tulipojitambulisha kuwa Mashahidi wenzao, walifurahi sana. Safari yetu ya Ireland ilituwezesha kupata marafiki wapya na pia mambo ya kukumbuka kuhusu eneo la Burren.

B. E., Marekani

Damu Asanteni sana kwa makala yenye kichwa “Maoni ya Biblia: Je, Utu Wako Unategemea Damu Yako?” (Februari 8, 2004) Jambo hilo lilinitatanisha. Shuleni niliambiwa kwamba utu wa mtu hautegemei damu yake. Pia katika vitabu fulani niliona kwamba kuamua utu wa mtu kwa kutegemea damu kunahusiana na zoea la kuwasiliana na roho. Lakini ninajua watu fulani ambao walisema sana kuhusu damu na kuwahukumu wengine kwa msingi wa damu yao. Makala hiyo ilitolewa wakati nilipokuwa nikiwaza kuhusu jambo hilo, na sasa ninafahamu vizuri maoni ya Biblia.

R. K., Japani

Makala hiyo ilinipendeza sana. Watu shuleni husema kwamba mtu mwenye damu aina ya A ni mwangalifu na mwenye hisia na mtu mwenye damu aina ya B ni mpole. Mara nyingi nimejiuliza ikiwa mimi niko hivyo. Lakini nilifurahi kujua kwamba kila mtu ana utu wake mwenyewe. Nilitambua pia kwamba tunaweza kubadili nyutu zetu kwa kuruhusu roho takatifu ya Mungu ituongoze.

N. I., Japani

Maporomoko ya Maji Ningependa kuwashukuru kwa makala yenye kichwa “Kutembelea Maporomoko Makubwa ya Maji.” (Februari 22, 2004) Nchi ya Zambia ina maziwa, mito, misitu, na milima mingi sana. Nayo maporomoko yake yanapendeza sana. Makala hiyo ilinifanya nimshukuru Yehova, Baba yetu wa mbinguni, kwa sababu ya vitu alivyoumba.

G. M., Zambia