Alifunzwa na Amkeni!

PERLA ni msichana mwenye umri wa miaka minane, na yuko katika darasa la pili katika jimbo la Veracruz huko Mexico. Siku moja mwalimu wake aliuliza ikiwa kuna yeyote anayejua nyangumi ana urefu gani. Mwanzoni hakuna aliyejibu. Kisha Perla akainua mkono wake na kusema, “Nyangumi mwenye rangi ya kijivu anaweza kuwa na urefu wa meta 14 na uzito wa tani 16.”

Mwalimu alishangaa na kumwuliza, “Ulijifunza wapi jambo hilo?”

Alimwambia: “Kutoka katika gazeti la Amkeni! Ukipenda, nitakuonyesha gazeti hilo.” Kwa kawaida Perla huwa na nakala za karibuni za Amkeni! katika mfuko wake wa shule ili awatolee wengine. Alikuwa na gazeti la Septemba 8, 2003, lililokuwa na makala yenye kichwa “Twakutana na Nyangumi wa Kijivu wa Ajabu.”

Mwalimu wa Perla alivutiwa na kuchukua nakala moja ya gazeti hilo, akalisoma na kulihifadhi. Wanafunzi wengine pia walitaka gazeti hilo, kwa hiyo Perla akawaletea wanafunzi tisa nakala zao. Perla amesifiwa sana na mwalimu wake. Yeye humpelekea mwalimu huyo gazeti la Amkeni! baada ya kila majuma mawili.

Baada tu ya tukio hilo, Perla alihudhuria kusanyiko la wilaya la Mashahidi wa Yehova. Kabla ya kwenda, mwalimu alimwambia Perla kwamba angependa kupokea zawadi kutoka katika kusanyiko hilo. Kwa hiyo Perla alimpelekea kitabu Jifunze Kutoka kwa Mwalimu Mkuu, kilichotolewa katika kusanyiko hilo.

Baadaye mwalimu huyo aliwaambia wanafunzi wengine hivi: “Perla ni mfano mzuri sana kwani yeye hasomi tu vitabu vyake vya shule bali yeye husoma habari nyingine zenye faida na kutueleza mambo anayojifunza.”