‘Unapaswa Kujivunia Jambo Hilo’

WATUMISHI wa kweli wa Mungu hutambua umuhimu wa kuwa wanyoofu. Wao huchochewa kuhisi hivyo kwa kuwa wanampenda Muumba wao. Kwa mfano, fikiria kisa cha Lázaro. Wakati fulani alipokuwa ameajiriwa katika hoteli moja huko Huatulco, Mexico, alipata dola 70 zilizokuwa zimeanguka katika ukumbi wa mapokezi. Mara moja alimpa pesa hizo meneja aliyekuwa kazini siku hiyo. Muda mfupi baadaye alipata kibeti katika bafu. Alipeleka kibeti hicho kwenye meza ya mapokezi naye mtu aliyekuwa amepoteza kibeti hicho alishangaa na kufurahi kukipata.

Habari hizo zilimfikia meneja mkuu naye akamwuliza Lázaro kilichomchochea kurudisha pesa hizo na kibeti hicho. Lázaro alimwambia kwamba kanuni za kiadili alizojifunza kutoka kwenye Biblia hazikumruhusu achukue kitu chochote kisichokuwa chake. Meneja huyo alimwandikia Lázaro barua ya kumshukuru iliyosema hivi: “Siku hizi si rahisi kuwapata watu wanaoshikilia viwango vya juu vya maadili. Tunakushukuru kwa mtazamo wako. Umejionyesha kuwa mtu mwenye kuheshimika na kielelezo kizuri kwa wafanyakazi wenzako. Wewe na familia yako mnapaswa kujivunia jambo hilo.” Lázaro alitangazwa kuwa mfanyakazi bora mwezi huo.

Baadhi ya wafanyakazi wenzake waliona kwamba Lázaro alikosea aliporudisha vitu hivyo. Lakini walipoona jinsi mwajiri wao alivyoitikia, walimpongeza Lázaro kwa kushikilia kanuni zake za maadili.

Biblia inawahimiza wafuasi waaminifu wa Yesu ‘wawatendee wote mema’ na ‘wajiendeshe kwa unyoofu katika mambo yote.’ (Wagalatia 6:10; Waebrania 13:18) Bila shaka, Wakristo wanapokuwa wanyoofu wanamletea sifa Yehova, yule Mungu “mwadilifu na mnyoofu” wa Biblia.—Kumbukumbu la Torati 32:4.