Maoni ya Biblia

Je, Unajimu Unaweza Kukufunulia Wakati Ujao?

UNAWEZAJE kuboresha maisha yako na kufanikiwa katika kutafuta mapenzi na pesa? Watu wengi hutumia unajimu kupata jibu. Kila siku mamilioni ya watu huchunguza nyota katika magazeti ili kuboresha matumaini ya kufanikiwa. Hata inajulikana kwamba viongozi wa ulimwengu wametumia nyota kufanya maamuzi yao.

Je, unajimu unaweza kutegemeka? Wataalamu wa nyota hutabirije mambo? Je, Wakristo wanapaswa kutumia nyota kufanya maamuzi maishani?

Unajimu Ni Nini?

Kulingana na kichapo The World Book Encyclopedia, unajimu “unategemea imani kwamba nyota hufanyiza maumbo yanayoweza kufunua utu au wakati ujao wa mtu.” Wanajimu hudai kwamba mahali hususa ambapo sayari na ishara ya nyota za unajimu huwa mtu anapozaliwa zinaweza kuathiri maisha yake. *

Tangu zamani watu wameamini unajimu. Miaka 4,000 hivi iliyopita, Wababiloni walianza kutabiri wakati ujao kwa kutegemea mahali jua, mwezi, na sayari tano zinazoweza kuonekana vizuri zilipokuwa. Walidai kuwa nyota hizo zilitokeza nguvu fulani zilizoathiri tabia ya wanadamu. Baadaye walitumia ishara ya nyota za unajimu katika utabiri wao.

Hazijafaulu kwa Muda Mrefu

Biblia hutaja uhusiano kati ya Babiloni na unajimu, nayo hutaja mara chache wanajimu wa Babiloni. (Danieli 4:7; 5:7, 11) Katika siku za nabii Danieli, unajimu ulikuwa umeenea sana huko Kaldayo (Babilonia) hivi kwamba kutumia neno “Wakaldayo” kulimaanisha wanajimu.

Danieli hakuona tu matumizi ya unajimu huko Babiloni bali pia aliona kushindwa kwa wanajimu wake kutabiri kuanguka kwa jiji hilo. (Danieli 2:27) Ona kile ambacho nabii Isaya alikuwa ametabiri kwa usahihi karne mbili mapema. “Basi, na wajitokeze hao wanajimu wakuokoe! Wao huzigawa mbingu sehemusehemu, huzichunguza nyota na kubashiri kila mwezi yatakayokupata,” akaandika Isaya kwa kejeli. “Hawawezi  hata kujiokoa wenyewe.”—Isaya 47:13, 14, Biblia Habari Njema.

Ni wazi kwamba wanajimu wa Babiloni hawangeweza kutabiri kuanguka kwa jiji hilo hata saa chache tu mapema. Na hukumu kali ya Mungu ilipotokea ukutani mwa jumba la kifalme la Mfalme Belshaza, wanajimu walishindwa kufasiri maandishi hayo yenye kutatanisha.—Danieli 5:7, 8.

Leo, wanajimu wameshindwa pia kutabiri matukio muhimu. Walipochunguza zaidi ya matabiri 3,000 ya wanajimu, wapelelezi wa kisayansi R. Culver na Philip Ianna walifikia mkataa kwamba ni asilimia 10 pekee yaliyokuwa sahihi. Mtu yeyote mwenye uwezo wa kuchanganua mambo na mwenye habari fulani kuhusu mambo yanayoendelea anaweza kutabiri matukio kwa usahihi zaidi.

Hupingana na Mafundisho ya Biblia

Hata hivyo, manabii Waebrania hawakupinga unajimu kwa sababu tu ulishindwa kutabiri wakati ujao kwa usahihi. Sheria ambayo Mungu alimpa Musa iliwaonya Waisraeli kihususa kwamba hawakupaswa kutafuta ishara za bahati. Sheria ilisema hivi: “Asipatikane ndani yako . . . yeyote anayefanya uaguzi . . . au yeyote anayetafuta ishara za bahati. . . . Kila mtu anayefanya mambo hayo ni chukizo kwa Yehova.”—Kumbukumbu la Torati 18:10, 12.

Ingawa neno unajimu halijatajwa katika andiko hilo, ni wazi kwamba ulitiwa katika katazo hilo. Kichapo Encyclopædia Britannica kinasema kwamba unajimu ni “aina ya uaguzi unaohusisha kutabiri matukio ya dunia na ya wanadamu kwa kutazama na kufasiri nyota zilizopo daima, Jua, Mwezi, na sayari.” Aina zote za uaguzi, ziwe zinategemea nyota au vitu vingine, hupingana na miongozo ya Mungu. Kwa nini? Kuna sababu nzuri.

Badala ya kusema kwamba kufanikiwa au kushindwa kwetu hutegemea nyota, Biblia inasema hivi waziwazi, “lolote lile analopanda mtu, atavuna hilo pia.” (Wagalatia 6:7) Mungu huona kila mtu anapaswa kuwajibika kwa matendo yake kwani sisi ni viumbe wenye hiari. (Kumbukumbu la Torati 30:19, 20; Waroma 14:12) Ni kweli, tunaweza kupatwa na aksidenti au ugonjwa kutokana na matukio tusiyoweza kudhibiti. Lakini Maandiko yanaonyesha kuwa misiba kama hiyo hutukia kwa sababu ya “wakati na tukio lisilotazamiwa,” bali si kwa sababu ya nyota yetu.—Mhubiri 9:11.

Kuhusu uhusiano wetu na wanadamu wenzetu, Biblia inatusihi tujivike sifa kama vile huruma, fadhili, unyenyekevu wa akili, upole, ustahimilivu, na upendo. (Wakolosai 3:12-14) Sifa hizo ni muhimu ili kusitawisha urafiki wenye kudumu na kuimarisha ndoa. Matabiri ya nyota si mwongozo unaofaa wa kuchagua mwenzi wa ndoa. Mwanasaikolojia Bernard Silverman alichanganua ishara za nyota za wenzi wa ndoa wapatao 3,500 ambao asilimia 17 kati yao walikuwa wametalikiana. Aliona kwamba idadi ya talaka haikuwa ya chini kati ya wenzi waliokuwa na ishara za nyota zinazofanana.

Kwa wazi, unajimu hautegemeki na unapotosha. Unaweza kutufanya tulaumu nyota badala ya kujilaumu wenyewe tunapokosea. Zaidi ya yote, Neno la Mungu hushutumu tendo hilo waziwazi.

[Maelezo ya Chini]