“Video Hii Huokoa Uhai!”

MNAMO 1999, Mashahidi wa Yehova walitayarisha video hasa kwa ajili ya vijana yenye kichwa Young People Ask—How Can I Make Real Friends? Kufikia sasa, video hiyo imetolewa katika zaidi ya lugha 30. Mwangalizi mmoja wa kutaniko huko Ukrainia anaandika hivi: “Video hiyo imekuwa na uvutano mkubwa kwetu sote! Wengine waliitazama mara tano, na bado wengine wakaitazama hata mara saba! Baadaye, vijana wengi walifurahi kuzungumzia mambo makuu. Wengi wao walitokwa na machozi. Sote tuliguswa sana kuona jinsi Yehova anavyowapenda na kuwajali vijana kikweli. Sasa ninaelewa mahitaji ya vijana vizuri zaidi, na ninataka kuwasaidia sana na kuwa rafiki yao wa karibu.”

Vijana kutoka sehemu mbalimbali za ulimwengu waliguswa moyo sana na video hiyo. Kwa mfano, Leticia mwenye umri wa miaka 17 kutoka Uruguai (aliye kwenye picha kushoto) anaandika hivi: “Niliguswa moyo sana, si kwa sababu tu ya habari iliyomo kwenye video hiyo, bali pia kuona jinsi Yehova na tengenezo lake hupendezwa nasi vijana. Sina maneno ya kueleza shukrani zangu kwa video hiyo muhimu. Kwa ufupi, asanteni sana!”

Shahidi mmoja ambaye ni mtu mzima huko Marekani alitazama video hiyo mara kadhaa na aliweza kuitumia kumsaidia msichana mmoja ambaye alikuwa akiishi maisha maradufu. Anaandika hivi: “Annette alikuwa na marafiki wabaya, alilewa, na hata alijaribu kutumia dawa za kulevya. * Lakini video hiyo ilimsaidia sana. Baada ya muda mfupi, aliacha marafiki wake wabaya na tabia zake mbaya. Miezi sita baadaye akabatizwa. Kwa kweli, video hii huokoa uhai!”

▪ Mnamo 2004, Mashahidi wa Yehova walitoa video nyingine kwa ajili ya vijana. Ina kichwa, Young People Ask—What Will I Do With My Life? Inatumainiwa kwamba video hiyo ambayo iko kwenye DVD, itawachochea vijana wengi kutanguliza ibada ya Yehova Mungu maishani mwao.—Mathayo 6:33.

[Maelezo ya Chini]