Vitu Vingi, Uradhi Haba

MAKALA moja katika gazeti Scientific American inasema kwamba watu nchini Marekani “wanaweza kuchagua kati ya vitu vingi au mambo mengi zaidi leo kuliko zamani.” Wanaweza kuchagua kati ya aina nyingi zaidi za bidhaa, huduma, kazi, na hata marafiki. Huenda mtu akafikiri kwamba watu wataridhika zaidi maishani wakiweza kuchagua kati ya vitu vingi au mambo mengi. Lakini, jambo la kushangaza ni kwamba mara nyingi jambo hilo huleta mfadhaiko. Kwa nini?

Makala hiyo ilisema kwamba mtazamo wa mtu kuhusu uchaguzi huathiri furaha. Kwa mfano, watu fulani wanapotaka kununua kitu, wao hutumia muda mrefu kusoma vibandiko na kuchunguza vitu vipya, ili wachague kilicho bora. Baadaye wao hulinganisha kitu walichonunua na vitu ambavyo wengine wamenunua. Wanunuzi wengine nao hununua tu “kitu kinachowafaa,” hata kama vitu vingine vizuri zaidi vinaweza kupatikana. Watu wenye mtazamo huo huacha kutafuta wanapopata kitu kinachofaa mahitaji yao.

Ni wazi kwamba kadiri ambavyo vitu vinaongezeka, ndivyo watu wanaotaka vitu bora wanavyotatizika kuchagua. Gazeti Scientific American linasema kwamba hatimaye watu kama hao wanapofanya uchaguzi, ‘wao hufikiria-fikiria vitu ambavyo hawakuwa na nafasi ya kuvichunguza. Hawaridhiki na maisha, wanakosa furaha, na kushuka moyo.’ Tunakata kauli gani? Makala hiyo inasema hivi: “Kuna sababu nzuri ya kuamini kwamba kuweza kuchagua kati ya vitu vingi sana huchangia kwa kadiri fulani ukosefu wa furaha unaoenea sana katika jamii ya kisasa.”

Hata hivyo, watafiti wa uchunguzi huo waliona kwamba mfadhaiko unaotokana na kufanya uchaguzi unaweza kupunguzwa. Vipi?

● Ikiwa uchaguzi hauhusu mambo muhimu sana hakuna haja kuyachunguza sana. Kwa mfano, unapotaka kununua mavazi, usiende kwenye maduka mengi.

● Chagua kitu kinachokufaa, badala ya kutafuta kitu ‘kilicho bora kabisa,’ ambacho ni vigumu kukipata. Kisha, usifikirie jambo hilo tena.

● Amua kutofikiria sana uzuri wa kitu ulichokataa. Jizoeze kuzingatia uzuri wa kitu ulichochagua.

● “Usipotarajia mengi, hutakata tamaa” ni usemi wa kawaida katika sehemu fulani za ulimwengu. Ni jambo la busara kufuata shauri hilo ukitaka kupata uradhi zaidi maishani.

[Chanzo cha habari katika ukurasa wa 31]

Inategemea: Scientific American