Kutoka kwa Wasomaji Wetu

Akina Mama Asanteni sana kwa makala zilizoandikwa vizuri zenye kichwa “Daraka la Mama la Kufundisha.” (Februari 22, 2005) Gazeti hilo lilinigusa moyo sana na kunichochea nimpigie simu mama yangu punde tu nilipomaliza kulisoma. Mama yangu alitulea mimi na ndugu yangu akiwa peke yake. Alienda shule ya ziada ili aweze kutuandalia mahitaji yetu. Alihakikisha kwamba tulihudhuria mikutano ya Kikristo na kwenda kwenye huduma kwa ukawaida. Jitihada zake zilifanikiwa. Asanteni kwa kunikumbusha mfano wake mzuri sana.

M. S., Marekani

Nilikumbushwa jitihada ya kujidhabihu ambayo mama yangu alifanya ili kunipa elimu ya kiroho na ya maadili. Ingawa baba hakumpa utegemezo wa kihisia na wa kifedha, mama alinifundisha kumpenda Yehova. Pia alinitia moyo niwe mtumishi wa wakati wote. Ninafikiri kwamba sikuthamini sana jitihada za mama, lakini kama vile makala hizo zilivyoonyesha, anastahili kupongezwa. Nilimpigia simu akiwa mbali sana ili nimshukuru!

C.H.K., Jamhuri ya Korea

Baba yangu si Shahidi. Mama ndiye aliyenilea “katika nidhamu na mwongozo wa akilini wa Yehova.” (Waefeso 6:4) Hilo halikuwa rahisi kwake, hasa unapofikiria jinsi nilivyomtendea nyakati nyingine. Sasa nina umri wa miaka 24, nami ninashukuru kwamba hakuvunjika moyo lakini alivumilia na kuendelea kukazia kweli ya Biblia katika moyo wangu.

D. M., Italia

DNA Nilifurahia makala “Je, Kuna DNA Zisizohitajiwa?” (Februari 22, 2005) Miaka michache iliyopita nilijifunza somo la biolojia ya chembe. Nilikasirika kwa sababu kitabu nilichotumia kilisema kwamba asilimia 95 ya DNA zetu hazihitajiwi! Mtungaji wa kitabu hicho alitumia mifano ya ajabu kueleza kazi za DNA, na punde baada ya kufanya hivyo, akasema zilijitokeza zenyewe. Kwa hiyo unaweza kuwazia jinsi nilivyofurahi kusoma katika Amkeni! kuhusu zile DNA zinazosemekana kuwa hazihitajiwi.

J. C., Marekani

Vijana Huuliza Niliguswa moyo na makala ya “Vijana Huuliza . . . Ninawezaje Kudhibiti Hisia Zangu?” (Februari 22, 2005) Nina umri wa miaka 31 na nililelewa na wazazi Wakristo, lakini bado sijakomaa. Hivi karibuni nilifoka kwa hasira kwa njia iliyonishangaza. Mashauri kutoka kwa mama yangu na dada mwingine Mkristo yalinisaidia. Kisha makala hiyo ikaja kwa wakati unaofaa kabisa. Nimeisoma mara mbili na nitaiweka karibu ili nijifunze jinsi ya kudhibiti hisia zangu.

I. B., Ujerumani

Lugha ya Ishara Ninashangaa kwamba mara nyingi vichapo vyetu huwataja watu wasio na uwezo wa kusikia. Jambo hilo lilitajwa hivi karibuni zaidi katika sehemu ya “Kuutazama Ulimwengu” iliyokuwa na kichwa “Kutumia Lugha ya Ishara Kwenye Intaneti.” (Februari 8, 2005) Mimi ni mmoja wa Mashahidi wa Yehova, nami nimekuwa nikihubiri kwa ukawaida kwa miaka mingi. Hata hivyo, sijawahi kukutana na mtu asiye na uwezo wa kusikia muda wote ambao nimekuwa nikihubiri! Je, kweli kuna watu wengi sana hivyo wasio na uwezo wa kusikia?

Jina limebanwa, Marekani

“Amkeni!” lajibu: Kulingana na uchunguzi mmoja, nchini Marekani pekee kuna watu 8,000,000 hivi walio na umri wa zaidi ya miaka mitano ambao wana matatizo ya kusikia, kutia ndani wale wanaotumia vifaa vya kuwasaidia kusikia. Karibu watu 1,000,000 kati yao huwasiliana kwa kutumia lugha ya ishara. Uchunguzi mwingine katika nchi hiyohiyo ulidokeza kwamba kuna watu 28,000,000 hivi (wa kila umri) walio na matatizo ya kusikia ambao hawatumii vifaa vya kuwasaidia kusikia. Ni rahisi kukutana na mtu asiye na uwezo wa kusikia bila kujua, kwani watu wengi hawawezi kuwatambua. Isitoshe, ikiwa mtu asiye na uwezo wa kusikia anaishi na watu wanaoweza kusikia, mara nyingi mtu anayeweza kusikia ndiye hufungua mlango unapobishwa.