Ukosefu wa Makao—Suluhisho Ni Nini?

“MPE mtu samaki, na utamlisha kwa siku moja. Mfunze mtu kuvua samaki, na utamlisha muda wote wa maisha yake.” Msemo huo unaonyesha ukweli wa kwamba kutosheleza tu mahitaji ya kimwili ya wakati huu hakuna manufaa ya kudumu. Ni afadhali kuwasaidia watu wajifunze jinsi ya kutatua matatizo na kutosheleza mahitaji yao. Watu wengi wanahitaji kufundishwa ustadi unaohitajika ili kufanikiwa maishani au hata kuwa na mtazamo tofauti kabisa wa maisha.

Mashahidi wa Yehova wanasadiki kwamba njia yenye matokeo zaidi ya kuwasaidia watu wenye tatizo la ukosefu wa makao ni kuwafundisha watu njia bora zaidi ya maisha. Hilo linamaanisha kufuata mashauri bora zaidi, yaani, mashauri yanayotolewa na Muumba wa wanadamu. Hakuna mtu mwingine yeyote anayestahili zaidi kutoa mashauri kama hayo. Mashauri yake yanawasaidia watu kuepuka matatizo ambayo husababisha ukosefu wa makao. Pia yanawasaidia watu wanyoofu wasio na makao kutatua  tatizo hilo. Bila shaka, kusoma Biblia tu hakuwezi kuondoa matatizo yote tunayokabili. Hata hivyo, Biblia inaweza kuwasaidia watu waache mazoea mabaya yanayowafanya watumie pesa nyingi, wajiheshimu kwa kiasi fulani, na waishi maisha mazuri.

Watu wengi wamepoteza makao yao kwa sababu ya mambo mbalimbali kama vile kutumia vibaya kileo na dawa za kulevya, uhalifu, matatizo ya kifedha, au kuvunjika kwa familia. Biblia hutoa mashauri yanayofaa kuhusu mambo hayo yote. Kufuata mashauri hayo kumewasaidia mamilioni ya watu wabadili mtazamo wao kuhusu maisha na kuboresha utu wao. Bila shaka, kufuata tu mashauri ya Biblia hakutatatua matatizo yote yanayohusiana na ukosefu wa makao. Kwa sasa, misiba ya asili, magonjwa, kuenea kwa umaskini, uraibu, na matatizo kama hayo, yanahitaji kutatuliwa kwa njia tofauti. Ingawa Mashahidi wa Yehova hufanya yote wawezayo kuwasaidia watu wanaoteseka kwa sababu ya matatizo hayo, wanatambua kwamba ni Mfanyi wa wanadamu pekee anayeweza kutatua matatizo hayo kabisa. Je, atayatatua?

Kusudi la Mungu la Awali

Kuna sababu nzuri ya kutumaini kwamba tatizo la ukosefu wa makao litakoma hivi karibuni. Tuna msingi gani? Fikiria hili: Yehova Mungu aliwaandalia makao mazuri wanadamu wa kwanza wawili. Mungu aliwaweka katika paradiso ambapo walikuwa na kila kitu walichohitaji. Kama wangefuata mwongozo wa Mfanyi wao, wangepanua Paradiso duniani pote. Wazao wao wangefurahia vitu vingi, na makao mazuri. Kila mshiriki wa familia ya kibinadamu angeweza kutegemezwa na upendo na ushirikiano wa kila mtu. Hilo ndilo lililokuwa kusudi la Mungu la awali. Hajabadili kusudi lake.—Zaburi 37:9-11, 29.

Isitoshe, lolote ambalo Mungu anakusudia litatimia kabisa. (Isaya 55:10, 11) Biblia inatabiri wakati ambapo kila mtu atakuwa na makao yake mwenyewe na vyakula na vitu vingi. Ni kweli kwamba, ili mambo hayo yawezekane, lazima kuwe na mabadiliko katika jamii ya sasa ya wanadamu. Badiliko hilo litaletwa wakati Mungu atakapoingilia kati mambo ya wanadamu. Yesu alikuwa akifikiria jambo hilo alipowaambia wanafunzi wake wasali hivi: “Ufalme wako na uje. Mapenzi yako na yatendeke duniani kama ilivyo mbinguni.”—Mathayo 6:9, 10.

Chini ya utawala wenye haki wa Ufalme wa Mungu, wanadamu watiifu wataona utimizo wa unabii huu unaochangamsha moyo: “Hakika wao watajenga nyumba na kukaa ndani yake . . . Hawatajenga na mtu mwingine akae ndani yake; hawatapanda na mtu mwingine ale. . . . Watu wangu waliochaguliwa wataitumia kazi ya mikono yao wenyewe kikamilifu.” (Isaya 65:21, 22) Kwa ufupi, hakuna mtu atakayekosa makao.

Mashahidi wa Yehova wanajitahidi kuwatolea watu msaada wa kiroho wanaohitaji sasa hivi. Wanatamani kuwapa wengine uangalifu wenye upendo ambao Yesu alipendekeza. (Mathayo 22:36-39) Kuwahangaikia wengine kwa njia hiyo huwachochea wawasaidie wale ambao wamepoteza makao yao kwa sababu ya misiba ya asili. *

Mashahidi wanatambua kwamba haiwezekani kusaidia kila mtu. Jacek, kutoka Poland, ambaye anaishi katika makao ya manispaa ya watu wasio na makao anasema hivi kuhusu watu wasio na makao: “Baadhi yao ni wakali au hutumia dawa za kulevya. Wengine huchukia kuzungumzia mambo ya kidini, wakifikiri kwamba Mungu hapendezwi  nao. Lakini kuna wale wanaosikiliza Neno la Mungu.” Kwa mfano, Jacek amefanya hivyo. Ameanza kujifunza mengi zaidi kuhusu mafundisho ya Biblia.

Mtu mwingine asiye na makao ambaye alisikiliza Neno la Mungu ni Roman anayeugua UKIMWI ambaye ameishi barabarani hadi hivi majuzi. Anasema: “Nilipowasili kwenye kituo kinachotoa Huduma za Kijamii, sikujua kwamba Mashahidi wa Yehova walikuwa wakikutana karibu na mahali hapo. Punde si punde wakaanza kuzungumza nami barabarani na kunieleza kwamba Mungu husikia vilio vya kuomba msaada vya watu wasio na makao. Pia walinikaribisha kwenye mmoja wa mikutano yao.”—Zaburi 72:12, 13

Mambo aliyosikia yalimwathirije? “Nilijifunza kwamba ninaweza kuishi milele katika Paradiso duniani na kwamba mimi ni mwenye thamani machoni pa Mungu. Nikiwa na marafiki wengi wapya na wenye kujali, niliacha kufikiria hali yangu na nikaanza kubadili utu wangu. Kwa sababu ya kumpenda Mungu, niliacha kuvuta sigara na katika sala nikaazimia kwamba ningetembea katika njia ya uadilifu.”

Roman alifanya maendeleo ya kiroho na baada ya muda akabatizwa na kuwa mmoja wa Mashahidi wa Yehova. Kwa msaada wa waamini wenzake na wenye mamlaka, aliweza kuhamia makao yanayofaa. Roman anasema hivi kwa furaha: “Nina furaha isiyo na kifani moyoni. Nimemkaribia Mungu mwenye upendo ambaye amefanya maisha yangu yawe na kusudi tena. Alinipa ndugu na dada wazuri sana na pia makao mazuri!”

Wakati Ujao wa Watu Wasio na Makao

Mashahidi wa Yehova hujitahidi kuwaonyesha huruma jirani zao wote, kutia ndani watu wasio na makao. Wanatamani kuwaeleza wengine kweli za Biblia kuhusu wakati ujao mzuri zaidi, kweli ambazo hata sasa zinaweza kubadili maisha.—Yohana 8:32.

Biblia inasema: “Lililopotoshwa haliwezi kunyooshwa.” (Mhubiri 1:15) Naam, licha ya nia nzuri ya wajitoleaji na wenye mamlaka, ni vigumu kuondoa matatizo ya kijamii yaliyokita mizizi kama vile ukosefu wa makao na umaskini. Hata hivyo, Biblia inatuhakikishia kwamba hivi karibuni, chini ya utawala wa Ufalme wa Mungu, wanadamu wote watiifu watafurahia kuishi katika hali nzuri kabisa.

[Maelezo ya Chini]

[Picha katika ukurasa wa 8]

Mama mkimbizi kutoka Somalia akiwa na kadi ya kupokea chakula

[Hisani]

© Trygve Bolstad/Panos Pictures

[Picha katika ukurasa wa 9]

Zaidi ya yote, watu wasio na makao wanahitaji tumaini la wakati ujao

[Picha katika ukurasa wa 10]

Chini ya Ufalme wa Mungu kila mtu atakuwa na makao