Kilimchochea Kijana Achunguze Maisha Yake

▪ Mwaka jana, kijana fulani aliandika barua kwa ofisi moja ya tawi ya Mashahidi wa Yehova. Alieleza kwamba nyanya yake alikuwa amempa kitabu Yule Mtu Mkuu Zaidi Aliyepata Kuishi. “Nilikiweka kwenye rafu,” akasema. Lakini hivi karibuni alikuwa mgonjwa sana hivi kwamba alifikiri atakufa.

Alisema, “kitu fulani kilinichochea nichukue kitabu hicho. Nilianza kukisoma nikiwa na shaka fulani. Lakini baada ya kumaliza kukisoma, nilikata kauli kwamba sikuwa nikiishi maisha mazuri. Nilianza kusali kwa Mungu.”

Anasema: “Baada ya kupona, niliamua kusoma kitabu hicho mara ya pili. Nilishangaa kuona kwamba bado nilijifunza mambo mapya. Nilianza kutambua kwamba ingawa ni vizuri kusali kwa Mungu na kusoma vichapo vinavyotegemea Biblia, kufanya hivyo tu hakutoshi. Jambo kuu ni kujitoa kumtumikia Mungu na kusaidia watu wengine wamwamini. Kama nilivyojifunza kutokana na mfano wa zile mina, lazima tufanye kazi ili kuzidisha mambo yanayohusu Ufalme wa Mungu.”—Luka 19:13-27.

Kwa kumalizia, mwanamume huyo aliandika hivi: “Ningependa kuwashukuru Mashahidi wa Yehova kwa kitabu hiki kizuri ambacho kimebadili maisha yangu. Ningependa kupata habari zaidi na kujifunza Biblia. Lakini tamaa yangu kubwa zaidi ni kumtumikia Mungu muda wote wa maisha yangu, nikiwasaidia wengine wamwamini.”

Kitabu Yule Mtu Mkuu Zaidi Aliyepata Kuishi kinatia ndani hotuba ambazo Yesu alitoa na pia mifano na miujiza aliyofanya. Kitabu hicho kimejaribu kusimulia matukio kama yalivyofuatana. Na kitabu hicho kina picha zinazotegemea habari halisi zinazoonyesha jinsi ambavyo Yesu na watu walioishi wakati wake walihisi.

Unaweza kuomba kitabu hiki chenye kurasa 448 kwa kujaza sehemu iliyo hapa chini na kuituma ukitumia anwani iliyoonyeshwa au anwani ifaayo kati ya zile zilizoorodheshwa kwenye ukurasa wa 5 wa gazeti hili.

□ Ningependa kupokea kitabu Yule Mtu Mkuu Zaidi Aliyepata Kuishi bila malipo.

□ Ningependa kujifunza Biblia nyumbani kwangu bila malipo.