Kutoka kwa Wasomaji Wetu

Je, Unakabili Hatari ya Kunaswa na Kileo? (Oktoba 8, 2005) Mara nyingi nimesoma maneno haya katika barua kutoka kwa wasomaji: “Makala hiyo ilikuja kwa wakati unaofaa kabisa.” Sikuwahi kufikiri kwamba wakati mmoja hata mimi ningehisi hivyo, lakini hivyo ndivyo nilihisi niliposoma makala hizo za mfululizo. Kwa muda fulani, nimekuwa nikisumbuliwa na dhamiri kwa sababu ya kunywa kileo kila siku hata ingawa silewi. Kisha nikapata makala hizo. Baada ya kusoma kuhusu hatari zinazohusika, nilihisi kwamba wakati ulikuwa umewadia wa kuacha uraibu huo.

K. W., Ujerumani

Makala hizo zilimtaja Hilario, ambaye amekuwa akinywa kwa miaka 30, naye ‘alirudia tatizo hilo mara nyingi.’ Alisema kwamba watu kutanikoni ‘sikuzote walimsaidia na kumtia moyo.’ Lakini, je, hakupaswa kukaripiwa au hata kufukuzwa kutoka kwenye kutaniko la Kikristo?

R. L., Marekani

“Amkeni!” lajibu: Simulizi fupi la Hilario halikutaja ni wakati gani alikuwa Mkristo aliyebatizwa katika kile kipindi cha miaka 30 alipokuwa akijaribu kushinda tatizo la ulevi. Wala halikutaja kama aliwahi kukaripiwa na wazee wa kutaniko. Hata hivyo, makala hiyo inataja kwamba Hilario alipewa “shauri la wakati unaofaa kutoka katika Biblia.” Mara kwa mara, shauri hilo hutolewa katika halmashauri za hukumu. Huenda watu wanaojaribu kuacha uraibu wa kileo wakarudia tatizo hilo mara nyingi, kama ilivyokuwa katika kisa cha Hilario. Ili kujua jinsi ambavyo visa kama hivyo hushughulikiwa ikiwa mtu anayehusika ni Mkristo aliyebatizwa, tafadhali soma gazeti “Mnara wa Mlinzi,” Mei 1, 1983, ukurasa wa 8-11, la Kiingereza.

Vijana Huuliza . . . Kwa Nini Ninavutiwa na Watu Wasiofaa? (Julai 22, 2005) Makala hiyo ilinisaidia kuona kwamba siwezi kuyumba-yumba kuhusu miradi yangu. Ilinichochea nishikilie azimio langu la kujitenga na marafiki wabaya. Sasa nina uhusiano wa karibu na wengi kutanikoni, vijana kwa wazee. Hilo limefanya nihisi ninapendwa wa wale wanaompenda Yehova, nao hunitia moyo niendelee kutembea katika njia ya uzima.

M. D., Mexico

Naazimia Kufikia Mradi Wangu (Juni 22, 2005) Nilitiririkwa na machozi nilipokuwa nikisoma simulizi la Martha. Mimi pia ninaugua kifafa. Nimekuwa mweneza-injili wa wakati wote kwa miaka kumi, na nyakati nyingine hali huwa ngumu hasa ninapogaragara. Simulizi la Martha liliimarisha azimio langu la kutoacha utumishi wa wakati wote. Simulizi hilo lilinifariji sana.

J. S., Poland

Nina tatizo kama la Martha. Baada ya kusoma simulizi lake, nimeanza kuwa mwangalifu kuhusu vyakula ninavyokula. Kwa zaidi ya miaka kumi, niliruhusu ugonjwa wa kifafa unizuie nisimtumikie Yehova kikamili. Miaka mitatu hivi iliyopita, niliamua kuwa mweneza-injili wa wakati wote, nami sijajuta kamwe kufanya uamuzi huo. Yehova na awabariki kwa kuchapisha masimulizi kama hayo yenye kutia moyo.

B.C.C., Brazili

Jambo lililonitia moyo zaidi katika makala hiyo ni kwamba Martha hakukata tamaa kamwe. Nilitiwa moyo kwamba hata ingawa aliacha utumishi wake kwa muda fulani, alikuwa na mtazamo uliosawazika na alikuwa na uhakika kwamba Yehova anapendezwa na utumishi wetu wa nafsi yote.

S. H., Japani

Mimi pia ninakabili hali kama ya Martha, na lazima nitambue mipaka yangu. Pia, kama Martha nimeweza kutumikia nikiwa mweneza-injili wa wakati wote. Kwa hiyo simulizi lake lilinitia moyo sana.

F. G., Uswisi