“Kifaa Kizuri cha Kufundishia!”

Hivyo ndivyo mtumishi wa wakati wote wa Mashahidi wa Yehova huko Panama alivyoandika kuhusu kitabu Biblia Inafundisha Nini Hasa? kilicho na kurasa 224 na picha zenye kupendeza, ambacho sasa kinatumiwa sana kujifunza Biblia. “Kinazungumzia mambo kwa njia ya moja kwa moja, kwa mpangilio mzuri, na kwa njia yenye kusadikisha,” akaandika. “Njia ambayo marejeo na nyongeza zimetumiwa humchochea mtu mara moja kuchunguza zaidi yanayofundishwa na Biblia.”

Mwalimu wa Biblia huko Missouri, Marekani, alisema: “Ninavutiwa na jinsi ambavyo kitabu hicho kimeandikwa kwa njia rahisi. Habari zimepangwa kwa njia inayopatana na akili kabisa.” Mara tu baada ya kitabu Biblia Inafundisha kutolewa, mwalimu huyo alimpelekea nakala mwanamke fulani ambaye hapo awali alikuwa ameanza kujifunza Biblia lakini akavunjika moyo.

“Hata kabla hajamaliza kusoma sura ya kwanza,” mwalimu huyo alieleza, “alinipigia simu ili anieleze jinsi alivyokuwa akifurahia kukisoma.” Mwanafunzi huyo alisema kwamba alihisi kana kwamba kitabu hicho kilikuwa kimeandikwa hasa kwa ajili yake na kwamba alitaka kuanza kujifunza Biblia tena. Mwalimu alieleza kwamba baada ya kumaliza kujifunza sura kumi za kwanza, ilipendeza sana kuona shangwe ambayo mwanafunzi huyo alikuwa nayo kwa sababu ya mambo aliyokuwa akijifunza.

Ingawa miaka miwili haijaisha tangu kitabu Biblia Inafundisha kilipotolewa, zaidi ya nakala milioni 50 zimechapishwa katika lugha zaidi ya 150. Unaweza kuomba kitabu hicho kwa kujaza sehemu iliyoonyeshwa hapa chini na kuituma ukitumia anwani iliyoonyeshwa au anwani ifaayo kati ya zile zilizoorodheshwa kwenye ukurasa wa 5 wa gazeti hili.

□ Ningependa kupokea kitabu kilichoonyeshwa hapa bila masharti.

□ Ningependa kujifunza Biblia nyumbani kwangu bila malipo.