Jina la Mungu Linajulishwa!

● Unapotembea kwenye Kisiwa maridadi cha Orleans, karibu na Quebec City nchini Kanada, majengo yake yatakuonyesha kwamba watu walioishi katika eneo hilo zamani walikuwa watu wa kidini sana. Makanisa ya zamani sana yanaweza kuonekana kando ya barabara inayozunguka kisiwa hicho.

Katika mji wa Saint-Pierre, kuna kanisa la zamani zaidi huko Quebec lililojengwa katika mwaka wa 1717. Kanisa hilo ambalo sasa ni jumba la sanaa, lina kitu fulani cha pekee. Juu ya madhabahu kuna Tetragramatoni, yaani, zile herufi nne za Kiebrania zinazofanyiza jina la kibinafsi la Mungu anayetajwa katika Biblia, Yehova.

Leo, ni vigumu sana kusikia jina la Mungu likitajwa ndani ya kanisa la Katoliki, sembuse kuliona limeandikwa. Kwa kweli, hati moja iliyotolewa na Vatikani katika mwaka wa 2008 ilisema kwamba papa aliagiza kwamba jina la Mungu “halipaswi kutumiwa au kutajwa” katika ibada za kidini, nyimbo, au sala za Wakatoliki. Hata hivyo, Biblia inaonyesha wazi kwamba Yehova Mungu anataka jina lake “litangazwe katika dunia yote.”—Kutoka 9:16.

Mashahidi wa Yehova wanahisi kwamba kumpendeza Mungu kunahusisha mengi zaidi ya kuweka jina lake ndani ya jengo fulani. Kila mwaka ulimwenguni pote, wanatumia zaidi ya saa bilioni 1.5 kuwafundisha watu jina na kusudi la Mungu. Pia wamelirudisha jina la Mungu, Yehova, mahali pake panapofaa. Biblia ambayo wamechapisha—Biblia Takatifu—Tafsiri ya Ulimwengu Mpya—inafuata kwa ukaribu maandishi ya lugha ya awali ambayo yalionyesha jina Yehova mara 7,000 hivi. Kufikia leo, zaidi ya nakala 165,000,000 za Tafsiri ya Ulimwengu Mpya zikiwa nzima au sehemu, zimechapishwa katika lugha 83. Kwa kweli, kuhusiana na jina la Mungu, Yehova, swali halipaswi kuwa Tuna msingi gani wa kulitumia jina hilo? bali swali linapaswa kuwa Tuna msingi gani wa kutolitumia?

[Picha katika ukurasa wa 21]

Tafsiri ya Ulimwengu Mpya, inayoonyesha jina la Yehova mara 7,000 hivi, imechapishwa ikiwa nzima au sehemu katika lugha 83