Unaweza Kufanikiwa!!
“Mimi hufurahi sana binti zangu wawili wanaponikumbatia bila mimi kutazamia na kuniambia, ‘Tunakupenda, Mama.’”—ANNA, MAMA ASIYE NA MWENZI, POLAND.
“Mara nyingi mimi hufurahi ninapoona watoto wangu wakinishukuru kwa mambo ninayowafanyia. Nyakati nyingine wao hunipa zawadi ndogo, kama vile picha waliyochora. Wanapofanya hivyo mimi huhisi kana kwamba jitihada zangu zote zimethaminiwa.”—MASSIMO, BABA ASIYE NA MWENZI, ITALIA.
“Nyakati nyingine ninapohisi nimeshuka moyo, mmoja wa wana wangu hunikumbatia, na kunibusu, kisha ananiambia kwamba ananipenda sana.”—YASMIN, MAMA ASIYE NA MWENZI, AFRIKA KUSINI.
HAYO ni baadhi ya mambo ambayo wazazi wengi wasio na wenzi walimwambia mwandishi wa Amkeni! katika uchunguzi uliofanywa sehemu mbalimbali ulimwenguni. Wazazi wengi wasio na wenzi, hasa akina mama, walisema kwamba walitamani kuwa na mwenzi mwenye upendo ambaye angewasaidia. * Hata hivyo, maelezo yao yaliyotolewa kwa unyoofu yanaonyesha pia kwamba wamefaulu kubadilikana kulingana na hali yao.
Ni nini ambacho kimewasaidia wazazi hao wasio na wenzi wabadilikane kulingana na hali na wafaulu kutimiza jukumu lao gumu? Katika makala zifuatazo, tutachunguza baadhi ya mapendekezo yao na maelezo yao ya unyoofu, na pia tutachunguza kanuni muhimu ambazo zimewasaidia. Ikiwa wewe ni mzazi asiye na mwenzi, tunatumaini kwamba makala hizi zitakusaidia ufanikiwe kutimiza jukumu lako gumu kwa shangwe na pia kwa njia inayoridhisha. Kwa kweli, hilo linaweza kuwa jambo gumu katika ulimwengu wa leo ulio na msukosuko na unaobadilika haraka. *
Makala hizi zitakazia fikira maeneo sita. Jinsi ambavyo wazazi wasio na wenzi wanaweza
Kutafuta msaada kutoka kwa watu wengine
Kuwasiliana kwa njia inayofaa zaidi na watoto wao
Kutanguliza mambo yanayofaa
Kuweka mipaka iliyo wazi kuhusu mwenendo
Kufundisha maadili yanayofaa
Kuhakikisha kwamba Mungu ni sehemu ya familia yao
