MAONI YA BIBLIA
Ubaguzi wa Kijamii
Ni nini chanzo cha jamii za wanadamu?
“Adamu akamwita mke wake jina lake Hawa, kwa sababu ndiye angekuja kuwa mama ya kila mtu anayeishi.”—Mwanzo 3:20.
WATAALAMU WANASEMA NINI?
Shirika la Umoja wa Mataifa la Elimu, Sayansi na Utamaduni (UNESCO) linasema kwamba “wanadamu wote ni jamii moja na wametokana na familia moja.”—Azimio la Umoja wa Mataifa Kuhusu Jamii na Ubaguzi wa Kijamii, 1978.
BIBLIA INASEMA NINI?
Mungu aliumba wanadamu wawili wa kwanza, Adamu na Hawa, na akawaambia hivi: “Zaeni, muwe wengi, mjaze dunia na kuitiisha.” (Mwanzo 1:28) Hivyo, Adamu na Hawa wakawa baba na mama wa wanadamu wote. Kisha, baada ya gharika ni familia nne tu zilizookoka, yaani, Noa na mke wake pamoja na wanawe watatu na wake zao. Biblia inafundisha kwamba sisi sote tulitokana na watoto wa Noa.—Mwanzo 9:18, 19.
Je, kuna jamii iliyo bora kuliko nyingine?
“[Mungu] alifanya kutoka kwa mtu mmoja kila taifa la watu, ili wakae juu ya uso wa dunia nzima.”—Matendo 17:26.
WATU HUSEMA NINI?
Katika karne ya 20, jamii fulani zilianza ubaguzi wa kijamii. Kwa mfano, Wanazi, walisema kulikuwa na uthibitisho wa kibiolojia unaoonyesha kwamba kuna jamii bora kuliko nyingine. Kwa upande mwingine, shirika la UNESCO lilisema kwamba kuna “umuhimu wa kuunganisha jamii ya wanadamu na kuleta usawa kati ya wanadamu wote.”
MAONI YA BIBLIA
Andiko la Matendo 10:34, 35 linasema hivi: “Mungu hana ubaguzi, bali katika kila taifa mtu ambaye anamwogopa na kutenda uadilifu anakubalika kwake.” Kwa hiyo, hakuna mtu anayeweza kudai kwamba kuna jamii iliyo bora kuliko nyingine.
Yesu aliwaambia wanafunzi wake hivi: “Ninyi nyote ni ndugu.” (Mathayo 23:8) Yesu alisali kwamba wanafunzi wake wawe na umoja na wapate “kukamilishwa kuwa kitu kimoja,” hakutaka wagawanyike wala kutengana.—Yohana 17:20-23; 1 Wakorintho 1:10.
Je, ubaguzi wa kijamii utakwisha?
“Katika siku za mwisho . . . mlima wa nyumba ya Yehova utawekwa imara . . . , na mataifa yote yatamiminika huko.”—Isaya 2:2.
WATU HUSEMA NINI?
Visa vya ubaguzi wa kijamii vinavyoendelea katika nchi nyingi huwafanya watu wajiulize ikiwa wanadamu wamefanya jitihada za kutosha ili kukomesha ubaguzi wa kijamii. Wengine wanaamini kwamba hakutawahi kamwe kuwa na usawa kati ya jamii.
BIBLIA INASEMA NINI?
Mungu hataendelea kuvumilia ubaguzi wa kijamii. Badala yake, chini ya Ufalme wake, wanaume na wanawake “kutoka mataifa yote na makabila na vikundi vya watu na lugha” watamtumikia kwa umoja, na kupendana kikweli. (Ufunuo 7:9) Ufalme wa Mungu si hali nzuri tu iliyo moyoni mwa mtu. Ni serikali itakayoleta mabadiliko duniani—mahali ambapo Mungu alikusudia watu wote waishi kwa umoja bila ubaguzi wowote. *
^ fu. 15 Kwa habari zaidi, ona sura ya 3 ya kitabu Biblia Inafundisha Nini Hasa? kilichochapishwa na Mashahidi wa Yehova. Pia, kinapatikana kwenye www.pr418.com/sw.
Huenda Ukapenda Pia
NDOA NA FAMILIA
Unaweza Kuzungumzaje na Watoto Wako Kuhusu Ubaguzi?
Ikitegemea umri wa mtoto wako unaweza kuzungumza naye ili kumlinda asiathiriwe na mtazamo wa ubaguzi.
MNARA WA MLINZI
Ubaguzi Utakwisha Lini?
Masimulizi ya maisha yanaonyesha jinsi Biblia inavyowasaidia watu kushinda ubaguzi. Ni wakati gani ambapo ubaguzi utaondolewa kabisa?
AMKENI!
Sisi Sote Ni Familia Moja
MAJIBU YA MASWALI YA BIBLIA
Biblia Inasema Nini Kuhusu Ndoa Kati ya Watu wa Rangi Tofauti?
Fikiria kanuni fulani za Biblia zinazohusiana na usawa wa kijamii na ndoa.
