• “Nilihisi kana kwamba mume wangu alikuwa amefanya uzinzi tena na tena.”

• “Nilihisi nimefedheheshwa, kwamba sivutii, na sina thamani yoyote.”

• “Singeweza kuzungumza na mtu yeyote kuhusu jambo hilo. Niliteseka kimyakimya.”

• “Nilihisi kana kwamba Yehova hanijali.”

Maneno hayo yanaonyesha jinsi mke anavyohisi mume wake anapotazama ponografia. Na ikiwa amekuwa akifanya hivyo kisiri, labda kwa miezi au miaka mingi, huenda akahisi kwamba hawezi kumwamini tena. Mke mmoja alisema hivi, “Nilijiuliza hivi: ‘Je, kweli ninamjua mwanamume huyu? Je, kuna mambo mengine ambayo ananificha?’”

Makala hii imekusudiwa kwa ajili ya mke ambaye mume wake anatazama ponografia. a Itazungumzia kanuni za Biblia zinazotoa faraja, zinazomhakikishia mke kwamba Yehova atamtegemeza, na kumsaidia awe tena na hali nzuri kihisia na kiroho. b

Ingawa huwezi kudhibiti kila jambo ambalo mume wako anafanya, unaweza kuchukua hatua ili kupunguza hisia za uchungu na kuwa na amani zaidi. Fikiria mambo yafuatayo.

Epuka kujilaumu. Huenda mke akahisi kwamba yeye ndiye anayesababisha mume wake atazame ponografia. Alice c alihisi kwamba yeye si mwanamke mwenye kuvutia. Alijiuliza hivi, ‘Kwa nini mume wangu anapendelea kuwaangalia wanawake wengine badala ya kuniangalia mimi?’ Baadhi ya wake hujilaumu wakifikiri kwamba jinsi wanavyotenda baada ya kujua kuhusu tatizo hilo hufanya hali iwe mbaya zaidi. Danielle alisema hivi baada ya mume wake kutazama ponografia: “Nilihisi kwamba mimi ni mwanamke mwenye uchungu ambaye nilikuwa nikiharibu ndoa yetu kwa sababu ya hasira yangu.”

Ikiwa unahisi hivyo, kumbuka kwamba huwajibiki kwa Yehova kwa sababu ya matendo ya mume wako. Andiko la Yakobo 1:14 linasema: “Kila mtu  hujaribiwa kwa kuvutwa na kushawishiwa na tamaa yake mwenyewe.” (Rom. 14:12; Flp. 2:12) Badala ya kukulaumu, Yehova anathamini ushikamanifu wako kwake.​—2 Nya. 16:9.

Ni vizuri pia kujua kwamba mume anapotazama ponografia hilo halimaanishi mke wake havutii. Wataalamu wa jambo hilo wanasema kwamba ponografia humfanya mtu awe na hamu kubwa ya ngono ambayo hakuna mwanamke anayeweza kuitosheleza.

Epuka kuwa na wasiwasi kupita kiasi. Catherine anasema kwamba jambo alilokuwa akifikiria muda wote ni jinsi mume wake alivyokuwa akitazama ponografia. Frances anasema hivi: “Nilipatwa na wasiwasi kila wakati ambapo sikujua mume wangu yuko wapi. Nilikuwa na wasiwasi mwingi siku nzima.” Baadhi ya wake wamesema kwamba wanaaibika wanapokuwa na Wakristo wengine ambao huenda wanajua kuhusu tatizo la mume wao. Na wengine wamesema wanahisi upweke mwingi kwa sababu wanafikiri kwamba hakuna mtu anayeelewa hali yao.

Ni jambo la kawaida kuhisi hivyo. Lakini ukitumia muda wote kufikiria mambo hayo utapatwa na mahangaiko zaidi. Badala yake, jitahidi kukazia fikira uhusiano wako pamoja na Yehova. Kufanya hivyo kutakusaidia uvumilie.​—Zab. 62:2; Efe. 6:10.

Huenda ukanufaika kwa kusoma na kutafakari kuhusu masimulizi ya Biblia ya wanawake waliokuwa na mahangaiko na ambao walipata faraja waliposali kwa Yehova. Hakuondoa matatizo yao sikuzote, lakini aliwapatia amani. Kwa mfano, Hana alikuwa na “uchungu mwingi sana” kwa sababu ya hali yake. Lakini baada ya “[kusali] kwa muda mrefu mbele za Yehova,” alipata amani hata ingawa bado hakujua jinsi hali yake itakavyokuwa wakati ujao.​—1 Sam. 1:10, 12, 18; 2 Kor. 1:3, 4.

Tafuta msaada kwa wazee wa kutaniko. Wanaweza kuwa kama “kibanda cha kujificha kutokana na upepo, na mahali pa kukimbilia kutokana na dhoruba ya mvua.” (Isa. 32:2, maelezo ya chini) Hata wanaweza kukupendekezea dada ambaye unaweza kumweleza hisia zako na kupata faraja.​—Met. 17:17.

Je, unaweza kumsaidia mume wako ashinde zoea lake la kutazama ponografia? Labda unaweza. Biblia inasema kwamba katika kusuluhisha tatizo au kumshinda adui mwenye nguvu, “wawili ni afadhali kuliko mmoja.” (Mhu. 4:9-12) Utafiti  unaonyesha kwamba mara nyingi kunakuwa na matokeo mazuri wenzi wa ndoa wanaposhirikiana ili kushinda zoea la kutazama ponografia na kujenga tena hali ya kuaminiana katika ndoa yao.

Bila shaka, hilo litategemea hasa ikiwa mwenzi wako anatamani sana na ameazimia kuacha tabia yake ya kutazama ponografia. Je, amemsihi Yehova ampe nguvu na kutafuta msaada wa wazee wa kutaniko? (2 Kor. 4:7; Yak. 5:14, 15) Je, amefanya mipango ya jinsi ya kushinda kishawishi hicho—kwa mfano kudhibiti jinsi anavyotumia vifaa vya kielektroni na kuepuka hali zinazoweza kumshawishi? (Met. 27:12) Je, yuko tayari kukubali msaada wako na kuwa mnyoofu kabisa kwako? Ikiwa ndivyo, huenda unaweza kumsaidia.

Jinsi gani? Fikiria mfano ufuatao. Felicia alifunga ndoa pamoja na Ethan, ambaye alianza kuwa mraibu wa ponografia alipokuwa mtoto. Felicia anafanya iwe rahisi kwa mume wake kuzungumza naye kuhusu tamaa yake ya kutazama ponografia ambayo inarudi tena na tena. Ethan anaeleza hivi: “Ninazungumza na mke wangu waziwazi na kwa unyoofu. Ananisaidia kwa upendo kujiwekea mipaka na mara kwa mara ananiuliza jinsi ninavyoendelea. Na ananisaidia kudhibiti matumizi yangu ya Intaneti.” Inaeleweka kwamba Felicia anaumia kihisia kwa sababu Ethan anavutiwa na kutazama ponografia. Felicia anasema hivi: “Lakini hisia zangu za hasira na uchungu hazimsaidii kushinda zoea hilo baya. Baada ya sisi kuzungumzia changamoto yake, ananisaidia kushinda hisia zangu za uchungu.”

Mazungumzo kama hayo hayamsaidii tu mume ajiepushe na ponografia, bali pia yanamsaidia mke wake aanze kumwamini tena. Kwa kweli, mume anapokuwa tayari kuzungumza kuhusu tamaa zake, shughuli zake za kila siku, na sehemu anakoenda, anakuwa hamfichi mke wake jambo lolote na inakuwa rahisi zaidi kwake kumwamini.

Je, unaamini kwamba unaweza kumsaidia mume wako kwa njia kama hiyo? Ikiwa ndivyo, kwa nini msifanye mpango wa kusoma na kuzungumzia makala hii pamoja? Mume wako anaweza kujiwekea lengo la kuacha kutazama ponografia na kukupatia sababu za kuanza kumwamini tena. Badala ya mume wako kukasirika kwa sababu unataka kuzungumzia jambo hilo, anapaswa kujitahidi kuelewa jinsi tatizo hilo linavyokuhangaisha. Unahitaji kuunga mkono jitihada zake za kuacha zoea hilo, na kumpa nafasi ya kukupa sababu za kuanza kumwamini tena. Nyote wawili mtahitaji kujifunza kwa nini watu hutamani kutazama ponografia, na jinsi ya kushinda tatizo hilo. d

Ikiwa unaogopa kwamba mazungumzo yenu yatageuka na kuwa mabishano makali, mnaweza kumwomba  mzee ambaye nyote wawili mnamwamini ashiriki katika mazungumzo yenu kwa muda fulani. Kumbuka kwamba hata baada ya mwenzi wa ndoa kushinda zoea la kutazama ponografia, huenda ikachukua muda fulani kabla ya kuanza tena kumwamini. Usife moyo. Tambua hata maendeleo madogo katika uhusiano wenu. Uwe na matarajio kwamba kwa subira na kadiri muda unavyopita, mwishowe ndoa yenu itakuwa imara tena.​—Mhu. 7:8; 1 Kor. 13:4.

Ikiwa mume wako atatazama ponografia tena, je, hilo linamaanisha kwamba hajatubu na hakuna matumaini yoyote kwamba atafaulu kuacha? Si lazima iwe hivyo. Ikiwa ana uraibu wa kutazama ponografia, huenda akapambana na tatizo hilo katika maisha yake yote. Huenda akatazama ponografia hata baada ya kujiepusha kwa miaka kadhaa. Ili kuepuka hilo lisitokee tena, huenda akahitaji kujiwekea mipaka imara zaidi, labda kwa kuendelea kujiwekea vizuizi hata inapoonekana kwamba tayari amelishinda zoea hilo. (Met. 28:14; Mt. 5:29; 1 Kor. 10:12) Atahitaji kusitawisha ‘nguvu mpya zinazoongoza akili yake’ na kujifunza “kuchukia maovu,” yaani, ponografia na mazoea mengine machafu yanayohusiana nayo kama vile kupiga punyeto. (Efe. 4:23; Zab. 97:10; Rom. 12:9) Je, yuko tayari kufanya jitihada hizo? Ikiwa ndivyo, huenda hatimaye akafaulu kushinda zoea hilo. e

Namna gani ikiwa mwenzi wako hafanyi jitihada zozote za kushinda zoea hilo? Inaeleweka kwamba huenda mara kwa mara ukapatwa na hisia za kuvunjika moyo, kukasirika, au kuhisi umesalitiwa. Utapata amani ya akili kwa kumtupia Yehova mahangaiko yako. (1 Pet. 5:7) Endelea kumkaribia Yehova kwa kujifunza, kusali, na kutafakari. Unapofanya hivyo, uwe na hakika kwamba Yehova anazidi kukukaribia pia. Kama andiko la Isaya 57:15 linavyosema, Yehova anakaa na wale “waliopondwa na wenye roho ya unyenyekevu,” na anawasaidia wawe na shangwe tena. Jitahidi kuboresha kabisa sifa zako za Kikristo. Tafuta msaada kutoka kwa wazee wa kutaniko. Na uendelee kuwa na matumaini kwamba siku moja wakati ujao, huenda mume wako atafanya mabadiliko ya kweli kutoka moyoni.​—Rom. 2:4; 2 Pet. 3:9.