1-2. Watumishi wengi wa Yehova hukabili hali gani, nazo zinaweza kuwaathirije?

FIKIRIA hali tatu zifuatazo: Ndugu kijana anaambiwa na daktari kwamba ana ugonjwa mbaya wenye kudhoofisha. Ndugu mchapakazi mwenye umri wa zaidi ya miaka 50 anapoteza kazi yake, na licha ya jitihada nyingi, bado hajafanikiwa kupata kazi nyingine. Dada mwaminifu aliyezeeka anashindwa kutimiza mengi katika utumishi wa Yehova kama alivyokuwa akifanya awali.

² Ikiwa unapitia mojawapo ya hali hizo tulizotaja, huenda ukahisi kwamba huna thamani au faida yoyote. Hali hizo zinaweza kusababisha upoteze shangwe, heshima yako, na hata kuathiri uhusiano wako na watu wengine.

3. Shetani na wale wanaoathiriwa na mtazamo wake wana maoni gani kuhusu uhai wa mwanadamu?

³ Ulimwengu huu hufunua mtazamo wa Shetani kuhusu uhai wa mwanadamu. Sikuzote Shetani amekuwa akiwatendea wanadamu kana kwamba hawana thamani yoyote. Kwa ukatili, alimwambia Hawa kwamba angepata uhuru huku akijua vizuri kabisa kwamba adhabu ya kutomtii Mungu ni kifo. Sikuzote Shetani amekuwa akiongoza mifumo ya kibiashara, ya kisiasa, na ya kidini ya ulimwengu huu. Hivyo, haishangazi kwamba wafanyabiashara, wanasiasa, na viongozi wa kidini huonyesha mtazamo wa Shetani kwa kutoheshimu uhai au utu wa mwanadamu.

4. Tutazungumzia nini katika makala hii?

 ⁴ Kwa upande mwingine, Yehova anataka tujione kuwa wenye thamani, naye hutusaidia tunapokabili hali zinazotufanya tuhisi hatuna thamani yoyote. (Zab. 136:23; Rom. 12:3) Makala hii itazungumzia jinsi Yehova anavyotusaidia katika hali zifuatazo: (1) Tunapokuwa wagonjwa, (2) tunapokabili hali ngumu za kiuchumi, na (3) tunapohisi kwamba hatuna chochote chenye thamani tunachoweza kutimiza katika utumishi wa Yehova kwa sababu tumezeeka. Hata hivyo, acheni kwanza tuzungumzie kwa nini tunaweza kuwa na uhakika kwamba kila mmoja wetu ni mwenye thamani mbele za Yehova.

5. Ni nini kinachokuthibitishia kwamba Yehova anawathamini wanadamu?

⁵ Hata ingawa tuliumbwa kutokana na mavumbi ya ardhi, sisi ni wenye thamani sana kuliko udongo. (Mwa. 2:7) Fikiria baadhi ya sababu zinazotusadikisha kwamba sisi ni wenye thamani kwa Yehova. Yehova aliwaumba wanadamu wakiwa na uwezo wa kuiga sifa zake. (Mwa. 1:27) Kwa kufanya hivyo, alitukweza juu ya uumbaji mwingine duniani, akitupatia mamlaka juu ya wanyama na dunia yote.—Zab. 8:4-8.

6. Tuna sababu gani nyingine inayotusadikisha kwamba Yehova anawathamini wanadamu wasio wakamilifu?

⁶ Yehova aliendelea kuwathamini wanadamu hata baada ya Adamu kutenda dhambi. Anatuthamini sana hivi kwamba alimtoa Yesu, Mwana wake mpendwa kuwa fidia kwa ajili ya dhambi zetu. (1 Yoh. 4:9, 10) Akitumia faida za fidia hiyo, Yehova atawafufua watu waliokufa kwa sababu ya dhambi ya Adamu, “waadilifu na wasio waadilifu pia.” (Mdo. 24:15) Neno lake linaonyesha kwamba sisi ni wenye thamani kwake hata iwe tuna hali gani ya kiafya, kiuchumi, au umri tulio nao.—Mdo. 10:34, 35.

7. Watumishi wa Yehova wana sababu zipi nyingine za kuamini kwamba Yehova anawathamini?

⁷ Tuna sababu nyingine za kuamini kwamba Yehova anatuthamini. Ametuvuta kwake na alijali jinsi tulivyoitikia habari njema. (Yoh. 6:44) Tulipoanza kumkaribia Yehova, Yehova alizidi kutukaribia. (Yak. 4:8) Pia, Yehova anatumia wakati na jitihada kutuelimisha, na jambo hilo linaonyesha kwamba sisi ni wenye thamani machoni pake. Anajua jinsi tulivyo sasa na tunavyoweza kuwa wakati ujao. Naye hututia nidhamu kwa sababu anatupenda. (Met. 3:11, 12) Huo ni uthibitisho wenye nguvu sana kwamba Yehova anatuthamini!

8. Maneno ya Zaburi 18:27-29 yanaweza kutusaidiaje kuwa na mtazamo unaofaa kuhusu changamoto tunazokabili?

⁸ Baadhi ya watu walimwona Mfalme Daudi kuwa mtu asiye na thamani, lakini Daudi alijua kwamba Yehova alimpenda na kumtegemeza. Kujua hilo kulimsaidia Daudi kuwa na mtazamo unaofaa kuhusu hali yake. (2 Sam. 16:5-7) Tunaposhuka moyo au tunapokabili changamoto, Yehova anaweza kutusaidia kuona mambo kwa njia tofauti na anaweza kutusaidia tushinde vipingamizi vyovyote. (Soma Zaburi 18:27-29.) Yehova anapotutegemeza, hakuna chochote kinachoweza kutuzuia kumtumikia kwa shangwe. (Rom. 8:31) Acheni sasa tuzungumzie hali tatu hususa ambazo tunahitaji kukumbuka kwamba Yehova anatupenda na anatuthamini.

9. Ugonjwa unaweza kuathirije mtazamo wetu kujihusu?

⁹ Ugonjwa unaweza kutulemea sana kihisia, na kutufanya tuhisi kana kwamba  hatuthaminiwi na yeyote. Huenda tukahisi aibu watu wanapoona kwamba hali yetu si nzuri au kwamba ni lazima tuwategemee wengine ili watusaidie. Hata ikiwa wengine hawajui kuhusu ugonjwa wetu, huenda tukapambana na hisia za aibu kwa sababu hatuwezi kufanya mambo tuliyokuwa tukifanya awali. Katika kipindi hicho kigumu, Yehova hutuinua. Jinsi gani?

10. Kulingana na Methali 12:25, ni nini kinachoweza kutusaidia tunapokuwa wagonjwa?

¹⁰ Tunapokuwa wagonjwa, “neno jema” linaweza kututia moyo. (Soma Methali 12:25.) Katika Biblia, Yehova amehifadhi maneno mazuri yanayotukumbusha kwamba sisi ni wenye thamani kwake licha ya ugonjwa tulio nao. (Zab. 31:19; 41:3) Tukisoma, na hata kusoma tena na tena maneno hayo yaliyoongozwa na roho takatifu, Yehova atatusaidia kukabiliana na hisia zisizofaa zinazoletwa na ugonjwa wetu.

11. Ndugu mmoja alijionea jinsi gani msaada wa Yehova?

¹¹ Mfikirie Jorge. Akiwa kijana, Jorge alipatwa na ugonjwa mbaya uliomdhoofisha kwa kasi na kusababisha ahisi kwamba hana thamani. Jorge anasema: “Sikutarajia kwamba ugonjwa huo ungenifanya nihisi hivyo au niaibike kwa jinsi watu walivyonitazama. Kadiri hali yangu ilivyozidi kuwa mbaya, nilifikiria jinsi maisha yangu yatakavyobadilika. Nilihuzunika sana, na nilimsihi Yehova anisaidie.” Yehova alimtegemezaje? Jorge anasema: “Kwa kuwa ilikuwa vigumu kwangu kukaza fikira, nilitiwa moyo kusoma mistari michache ya kitabu cha Zaburi iliyoonyesha jinsi Yehova anavyowajali watumishi wake. Kila siku nilisoma tena na tena mistari hiyo michache, nayo ilinifariji na kuniliwaza. Baada ya muda mfupi, wengine walianza kuona nikitabasamu zaidi. Hata walisema kwamba  mtazamo wangu mzuri uliwatia moyo. Nilitambua kwamba Yehova alikuwa amejibu sala zangu! Alikuwa amenisaidia kubadili mtazamo niliokuwa nao kujihusu. Nilianza kukazia fikira mambo ambayo Neno lake linasema kuhusu jinsi anavyoniona licha ya ugonjwa wangu.”

12. Unaweza kujionea msaada wa Yehova jinsi gani unapokuwa mgonjwa?

¹² Ikiwa wewe ni mgonjwa, uwe na hakika kwamba Yehova anajua hali yako. Msihi akusaidie ili usitawishe mtazamo mzuri kuhusu hali yako. Kisha tumia Biblia kupata maneno yenye kufariji ambayo Yehova amehifadhi kwa ajili yako. Kazia fikira mistari inayoonyesha jinsi Yehova anavyowathamini sana watumishi wake. Unapofanya hivyo, utaona jinsi Yehova alivyo mwema kwa wale wote wanaomtumikia kwa uaminifu.—Zab. 84:11.

13. Kichwa cha familia anaweza kuhisije anapopoteza kazi?

¹³ Kila kichwa cha familia angependa kuwa na uwezo wa kuiandalia familia yake mahitaji muhimu ya maisha. Lakini tuseme kwamba ndugu anapoteza kazi hata ingawa hakufanya kosa lolote. Anatafuta kazi nyingine kwa bidii bila mafanikio. Kwa sababu ya hali hiyo, anahisi hana thamani yoyote. Kukazia fikira ahadi za Yehova kunaweza kumsaidiaje?

14. Kwa nini Yehova hutimiza ahadi zake?

¹⁴ Sikuzote Yehova hutimiza ahadi zake. (Yos. 21:45; 23:14) Anafanya hivyo kwa sababu kadhaa. Kwanza, jina lake au sifa yake inaweza kuchafuliwa. Yehova ameahidi kwamba atawatunza watumishi wake washikamanifu, naye anahisi ana wajibu wa kutimiza ahadi hiyo. (Zab. 31:1-3) Isitoshe, Yehova  anajua kwamba tutavunjika moyo sana ikiwa hatawatunza wale walio sehemu ya familia yake. Ameahidi kutuandalia mahitaji yetu ya kimwili na ya kiroho, na hakuna kitu chochote kitakachomzuia kutimiza ahadi hiyo!—Mt. 6:30-33; 24:45.

15. (a) Wakristo wa karne ya kwanza walikabili matatizo gani? (b) Andiko la Zaburi 37:18, 19 linatupatia uhakika gani?

¹⁵ Tunapokumbuka sababu zinazomfanya Yehova atimize ahadi zake, tunaweza kukabiliana na matatizo ya kiuchumi tukiwa na uhakika. Fikiria mfano wa Wakristo wa karne ya kwanza. Kutaniko la Yerusalemu lilipokabili mateso makubwa, ‘wote isipokuwa mitume walitawanyika.’ (Mdo. 8:1) Unafikiri hali ingekuwaje? Matatizo ya kiuchumi! Huenda Wakristo walipoteza nyumba na biashara zao. Licha ya hayo, Yehova hakuwaacha na hawakupoteza shangwe yao. (Mdo. 8:4; Ebr. 13:5, 6; Yak. 1:2, 3) Yehova aliwategemeza Wakristo hao waaminifu, naye atatutegemeza sisi pia.—Soma Zaburi 37:18, 19.

16. Ni hali gani inayoweza kutufanya tutilie shaka ikiwa Yehova anathamini ibada yetu?

¹⁶ Kadiri tunavyozeeka, huenda tukaanza kuhisi kwamba hatuna mengi ya kumpa Yehova. Huenda Mfalme Daudi alikabiliana na hisia kama hizo umri wake ulivyozidi kusonga. (Zab. 71:9) Yehova anaweza kutusaidiaje?

17. Simulizi la dada anayeitwa Jheri linatufundisha nini?

¹⁷ Mfikirie dada anayeitwa Jheri. Alialikwa kuhudhuria programu ya mazoezi ya udumishaji wa Jumba la Ufalme, lakini hakutaka kwenda. Alisema: “Mimi ni mjane aliyezeeka na sina ustadi wowote ambao Yehova anaweza kutumia. Sifai kitu.” Usiku wa kuamkia programu hiyo ya mazoezi, alimmiminia Yehova moyo wake katika sala. Alipofika  kwenye Jumba la Ufalme siku iliyofuata, bado alikuwa akijiuliza ikiwa kweli alistahili kuwa hapo. Katika programu hiyo, mmoja wa wasemaji alikazia kwamba ustadi muhimu zaidi tulio nao ni utayari wetu wa kufundishwa na Yehova. Jheri anakumbuka hivi: “Nilijiambia, ‘Mimi nina ustadi huo!’ Nilianza kulia nilipotambua kwamba Yehova alikuwa akijibu sala yangu. Alikuwa akinihakikishia kwamba nina kitu chenye thamani ninachoweza kumpa na kwamba alikuwa tayari kunifundisha!” Anapokumbuka wakati huo, Jheri anasema hivi: “Nilifika kwenye mazoezi hayo nikiwa na wasiwasi, nimevunjika moyo, na nikihisi sina thamani. Lakini nilitoka nikiwa na uhakika, nimetiwa moyo, na kuhisi kwamba ninathaminiwa!”

18. Biblia inaonyeshaje kwamba Yehova bado huthamini ibada yetu hata tunapozeeka?

¹⁸ Kadiri tunavyozeeka, tunaweza kuwa na hakika kwamba bado Yehova ana kazi kwa ajili yetu. (Zab. 92:12-15) Yesu alitufundisha kwamba hata ikiwa hatuwezi kutimiza mengi au tunahisi kuwa jitihada zetu ni ndogo, Yehova anathamini chochote tunachoweza kufanya katika utumishi wake. (Luka 21:2-4) Hivyo, kazia fikira mambo unayoweza kufanya. Kwa mfano, unaweza kuzungumza kuhusu Yehova, kusali kwa ajili ya ndugu zako, na kuwatia moyo wengine waendelee kuwa waaminifu. Yehova hakuoni kuwa mfanyakazi mwenzi kwa sababu ya mambo unayotimiza, bali kwa sababu ya utayari wako wa kumtii yeye.—1 Kor. 3:5-9.

19. Andiko la Waroma 8:38, 39 linatupatia uhakika gani?

¹⁹ Tunashukuru sana kwamba tunamwabudu Yehova, Mungu anayewathamini kikweli wale wanaomtumikia! Alituumba ili tufanye mapenzi yake, na ibada yake ya kweli ndiyo inayotupatia kusudi la kweli maishani mwetu. (Ufu. 4:11) Ingawa huenda ulimwengu ukatuona kuwa watu wasio na thamani, Yehova hatuaibikii. (Ebr. 11:16, 38) Tunapohisi kwamba tumelemewa na ugonjwa, hali ngumu za kiuchumi, au uzee, acheni tukumbuke kwamba hakuna kitu chochote kinachoweza kututenga na upendo wa Baba yetu aliye mbinguni.—Soma Waroma 8:38, 39.