1. Tunapaswa kufanya nini ili tuokoke siku ya Yehova?

 BIBLIA inapozungumza kuhusu “siku ya Yehova,” inarejelea wakati ambapo Yehova anawaharibu maadui wake na kuwaokoa watu wake. Zamani, pindi fulani, Yehova alileta hukumu juu ya mataifa. (Isa. 13:1, 6; Eze. 13:5; Sef. 1:8) Katika nyakati zetu, “siku ya Yehova” itaanza wakati ambapo Babiloni Mkubwa atashambuliwa na itakwisha katika vita vya Har–Magedoni. Ili tuokoke “siku” hiyo, tunahitaji kujitayarisha sasa. Yesu alitufundisha kwamba hatupaswi tu kuwa tayari kwa ajili ya “dhiki kuu” bali pia ‘tuendelee kuwa tayari.’​—Mt. 24:21; Luka 12:40.

2. Kwa nini tunaweza kunufaika kutokana na Wathesalonike ya Kwanza?

² Katika barua yake ya kwanza iliyoongozwa na roho takatifu ambayo aliwaandikia Wathesalonike, mtume Paulo alitumia mifano kadhaa kuwasaidia Wakristo waendelee kuwa tayari kwa ajili ya siku kuu ya Yehova ya hukumu. Paulo alijua kwamba siku ya Yehova haingefika wakati huo. (2 The. 2:1-3) Ingawa hivyo, aliwahimiza ndugu zake wajitayarishe kwa ajili ya siku hiyo kana kwamba ingekuja kesho, na sisi pia tunahitaji kufuata shauri hilo. Acheni tuchunguze jinsi alivyofafanua mambo yafuatayo: (1) jinsi ambavyo siku ya Yehova itafika, (2) wale ambao hawataokoka siku hiyo, na (3) jinsi tunavyoweza kujitayarisha ili tuokoke.

3. Siku ya Yehova itakujaje kama vile mwizi anavyokuja usiku? (Tazama pia picha.)

³ “Kama vile mwizi anavyokuja usiku.” (1 The. 5:2) Huo ni mfano wa kwanza ambao Paulo alitumia ili kufafanua jinsi ambavyo siku ya Yehova itafika. Mara nyingi, wezi huvamia  haraka usiku wakati ambapo watu hawatarajii. Siku ya Yehova pia itakuja ghafla na kuwashangaza watu wengi. Hata Wakristo wa kweli huenda wakashangazwa na jinsi matukio yanavyotukia upesi. Lakini tofauti na waovu, sisi hatutaangamizwa.

4. Ni kwa njia gani siku ya Yehova ni kama maumivu ya kuzaa?

⁴ “Kama vile maumivu ya kuzaa ya mwanamke mwenye mimba.” (1 The. 5:3) Mama mjamzito hawezi kutabiri wakati hususa ambapo atapatwa na maumivu ya kuzaa. Hata hivyo, hana shaka kwamba atapatwa na maumivu hayo. Wakati huo unapofika, maumivu hayo hutokea ghafla, ni makali, na hayawezi kuzuiwa. Vivyo hivyo, hatujui siku na saa ambayo siku ya Yehova itaanza. Ingawa hivyo, tuna uhakika kwamba inakuja na hukumu ya Mungu juu ya waovu itakuja ghafla na hakuna mwovu atakayeponyoka.

5. Dhiki kuu inawezaje kulinganishwa na mapambazuko?

⁵ Kama mapambazuko. Mfano wa tatu wa Paulo pia unahusu jinsi wezi wanavyoiba usiku. Lakini Paulo anakazia jambo tofauti, na ni kana kwamba analinganisha siku ya Yehova na mapambazuko. (1 The. 5:4) Wezi wanaovamia usiku huenda wakakengeuka fikira hivi kwamba wanasahau kuzingatia muda. Huenda kukapambazuka nao wakakamatwa bila kutarajia. Vivyo hivyo, dhiki kuu itawafunua wale ambao kama wezi, wanabaki gizani kwa kuendelea kufanya matendo yanayomchukiza Mungu. Tofauti na watu hao, tunaweza kuwa tayari kwa kukataa mwenendo unaomchukiza Yehova na kufuatia “kila namna ya wema na uadilifu na kweli.” (Efe. 5:8-12) Kisha Paulo anatumia mifano miwili inayohusiana ili kuwafafanua wale ambao hawataokoka.

6. Ni kwa njia gani watu wengi wamelala usingizi? (1 Wathesalonike 5:6, 7)

⁶ “Wale wanaolala usingizi.” (Soma 1 Wathesalonike 5:6, 7.) Paulo aliwalinganisha wale ambao hawataokoka siku ya Yehova na watu wanaolala usingizi. Hawajui mambo yanayoendelea katika mazingira yanayowazunguka na pia hawajui muda. Hivyo, hawawezi kutambua matukio muhimu au kuchukua hatua inayofaa. Leo, watu wengi wamelala usingizi wa kiroho. (Rom. 11:8) Hawaamini mambo yanayothibitisha kwamba tunaishi katika “siku za mwisho” na kwamba dhiki kuu itakuja hivi karibuni. Huenda matukio makubwa ya ulimwenguni yakawaamsha baadhi yao kutoka katika usingizi wa kiroho na kuwachochea wapendezwe na ujumbe wetu wa Ufalme. Ingawa hivyo, wengi wanaanza kulala tena badala ya kuendelea kukaa macho. Hata baadhi ya wale ambao wanaamini kutakuwa na siku ya hukumu wanafikiri iko mbali sana. (2 Pet. 3:3, 4) Hata hivyo, sisi tunatambua kwamba shauri lililoongozwa na roho la kuendelea kukaa macho linaendelea kuwa muhimu zaidi kadiri siku zinavyopita.

7. Kwa nini watu watakaoangamizwa na Mungu ni kama walevi?

⁷ “Wale wanaolewa.” Paulo alisema kwamba wale watakaoangamizwa na Mungu ni kama walevi. Watu ambao wamelewa hawachukui hatua haraka kuhusu mambo yanayowazunguka, nao hufanya maamuzi mabaya. Vivyo hivyo, waovu hawachukui hatua wanaposikia maonyo kutoka kwa Mungu. Wanachagua kuishi maisha ambayo yatawaongoza kwenye uharibifu. Lakini Wakristo wanaambiwa watunze akili zao, na wafikirie mambo kwa njia nzuri. (1 The. 5:6) Msomi mmoja wa Biblia anafafanua njia hiyo nzuri ya kufikiri kuwa “mtazamo wa akili wenye utulivu, ulio thabiti, na unaochanganua mambo kwa njia sahihi na hivyo kutusaidia kufanya uamuzi sahihi.” Kwa nini tunapaswa kuendelea kuwa watulivu na thabiti? Ili tusianze kujihusisha na mambo ya kisiasa au ya kijamii katika ulimwengu huu. Mkazo wa kuunga mkono upande fulani kuhusiana na mambo hayo utazidi kuongezeka kadiri siku ya Yehova inavyokaribia. Ingawa hivyo, hatupaswi kuhangaika kuhusu jinsi tutakavyotenda. Roho ya Mungu inaweza kutusaidia kuwa na utulivu na kuwa thabiti kiakili na hivyo tufanye maamuzi kwa hekima.​—Luka 12:11, 12.

8. Andiko la 1 Wathesalonike 5:8 linatumia mfano gani kuonyesha sifa zitakazotusaidia kukaa macho na kutunza akili zetu? (Tazama pia picha.)

⁸ Kwa “kuvaa bamba la kifuani . . . na . . . kofia ya chuma.” Paulo anatulinganisha na wanajeshi walio chonjo na waliovaa mavazi ya kivita. (Soma 1 Wathesalonike 5:8.) Mwanajeshi aliye kwenye zamu anatarajiwa kuwa tayari kwa ajili ya vita wakati wowote. Hali yetu iko hivyo pia. Tunaendelea kuwa tayari kwa ajili ya siku ya Yehova kwa kuvaa bamba la kifuani la imani na upendo na kofia ya chuma ya tumaini. Sifa hizo zinaweza kutusaidia sana.

9. Imani yetu inatulinda jinsi gani?

⁹ Bamba la kifuani lililinda moyo wa mwanajeshi. Imani na upendo hulinda moyo wetu wa mfano. Sifa hizo zitatusaidia kuendelea kumtumikia Mungu na kumfuata Yesu. Imani inatuhakikishia kwamba Yehova atatuthawabisha tukiendelea kumtafuta kwa moyo wetu wote. (Ebr. 11:6) Itatuchochea kuendelea kuwa washikamanifu kwa Kiongozi wetu, Yesu, hata ikiwa tutakabili hali ngumu. Tunaweza kuimarisha imani yetu ili tukabiliane na  hali ngumu maishani kwa kujifunza kutokana na mifano ya siku zetu ya watu waliodumisha utimilifu wao licha ya mateso au hali ngumu za kiuchumi. Na tunaweza kuepuka mtego wa kujikusanyia vitu vya kimwili kwa kuwaiga wale ambao walirahisisha maisha yao ili kutanguliza masilahi ya Ufalme. b

10. Kumpenda Mungu na jirani zetu kunatusaidiaje kuvumilia?

¹⁰ Pia, tunahitaji upendo ili tukae macho na kuendelea kutunza akili zetu. (Mt. 22:37-39) Kumpenda Mungu kunatusaidia kuendelea kuhubiri licha ya changamoto zozote ambazo huenda tukakabili. (2 Tim. 1:7, 8) Kwa kuwa tunawaonyesha upendo hata watu ambao hawamtumikii Yehova, tunaendelea kuhubiri katika maeneo yetu, hata kutoa ushahidi kupitia simu na barua. Tunaendelea kutumaini kwamba siku moja jirani zetu watafanya mabadiliko na kuanza kutenda mambo yanayofaa.​—Eze. 18:27, 28.

11. Kuwapenda ndugu na dada zetu kunatusaidiaje? (1 Wathesalonike 5:11)

¹¹ Pia, tunawapenda ndugu na dada zetu. Tunaonyesha upendo huo kwa “kutiana moyo na kujengana.” (Soma 1 Wathesalonike 5:11.) Kama wanajeshi wanaotumikia vitani bega kwa bega, sisi pia tunatiana moyo. Bila shaka, huenda mwanajeshi akamuumiza mwanajeshi mwenzake bila kukusudia wanapokuwa vitani, lakini hawezi kamwe kumuumiza kimakusudi. Vivyo hivyo, hatuwezi kamwe kuwaumiza kimakusudi ndugu na dada zetu au kulipa ubaya kwa ubaya. (1 The. 5:13, 15) Pia, tunaonyesha upendo kwa kuwaheshimu ndugu wanaoongoza kutanikoni. (1 The. 5:12) Paulo alipoandika barua hiyo, mwaka mmoja haukuwa umepita tangu kutaniko la Thesalonike lilipoanzishwa. Inaonekana kwamba wanaume waliowekwa rasmi hawakuwa na uzoefu na huenda walifanya makosa. Ingawa hivyo, walistahili kuheshimiwa. Dhiki kuu inapokaribia, huenda tukategemea hata zaidi mwongozo kutoka kwa wazee wa kutaniko kuliko ilivyo sasa. Huenda  tukapoteza mawasiliano na makao makuu ya ulimwenguni pote au ofisi ya tawi; basi, ni jambo muhimu kujifunza sasa kuwapenda na kuwaheshimu wazee wa kutaniko. Hata jambo gani litokee, acheni tuendelee kutunza akili zetu, tusikazie fikira udhaifu wao, bali tukazie fikira kwamba Yehova anawaongoza wanaume hao waaminifu kupitia Kristo.

12. Tumaini letu linalinda mawazo yetu jinsi gani?

¹² Kama vile kofia ya chuma ilivyolinda kichwa cha mwanajeshi, tumaini letu la wokovu hulinda mawazo yetu. Kwa kuwa tuna tumaini lenye nguvu, tunatambua kwamba mambo yaliyo katika ulimwengu huu hayana thamani yoyote. (Flp. 3:8) Tumaini letu linatusaidia kuendelea kuwa watulivu na thabiti. Wallace na Laurinda, wanaotumikia barani Afrika, walijionea jambo hilo. Katika kipindi cha majuma matatu, kila mmoja wao alimpoteza mzazi katika kifo. Kwa sababu ya janga la COVID-19, hawakuweza kurudi nyumbani ili kuwa pamoja na familia zao. Wallace aliandika hivi: “Tumaini la ufufuo linanisaidia kufikiria, si jinsi walivyokuwa katika siku zao za mwisho kwenye ulimwengu huu, bali jinsi watakavyokuwa katika siku za mwanzo za ulimwengu mpya. Tumaini hilo hunipa utulivu ninapopambana na hisia za huzuni au majonzi ya kufiwa.”

13. Tunaweza kufanya nini ili tupokee roho takatifu?

¹³ “Msiuzime moto wa roho.” (1 The. 5:19) Mtume Paulo alilinganisha roho takatifu na moto ulio ndani yetu. Tunapokuwa na roho ya Mungu, tunawaka kwa kuwa na bidii na shauku kuelekea mambo yanayofaa na tunapata nguvu za kufanya kazi ya Yehova. (Rom. 12:11) Tunaweza kufanya nini ili tupokee roho takatifu? Tunaweza kusali ili tupate roho takatifu, kujifunza Neno la Mungu lililoongozwa na roho, na kushirikiana na tengenezo lake linaloongozwa na roho. Kufanya hivyo, kutatusaidia kusitawisha sifa za “tunda la roho.”​—Gal. 5:22, 23.

14. Tunapaswa kuepuka nini ili tuendelee kupokea roho ya Mungu? (Tazama pia picha.)

¹⁴ Baada ya Mungu kutupatia roho yake takatifu, tunapaswa kuwa waangalifu ili ‘tusiuzime  moto wa roho.’ Mungu huwapa roho yake wale tu ambao wanadumisha mawazo safi na mwenendo safi. Hataendelea kutupatia roho yake ikiwa tutaendelea kuwa na mawazo yasiyo safi na kutenda kulingana na mawazo hayo. (1 The. 4:7, 8) Ili tuendelee kupokea roho takatifu, pia hatupaswi ‘kuutendea unabii kwa dharau.’ (1 The. 5:20) Hapa “unabii” unamaanisha ujumbe uliotokezwa na roho ya Mungu, kutia ndani ujumbe kuhusu siku ya Yehova na uhitaji wa kutenda haraka katika nyakati zetu. Hatuahirishi siku hiyo katika akili zetu na kufikiri kwamba Har–Magedoni haitakuja tukiwa hai. Badala yake, tunaharakisha siku hiyo—tukiiweka karibu akilini—kwa kudumisha mwenendo unaofaa na kuendelea kuwa na bidii katika “vitendo vya ujitoaji-kimungu” kila siku.​—2 Pet. 3:11, 12.

15. Tunawezaje kuepuka kudanganywa na habari za uwongo na propaganda za roho waovu? (1 Wathesalonike 5:21)

¹⁵ Hivi karibuni, kwa njia fulani wapinzani wa Mungu watatangaza hivi: “Amani na usalama!” (1 The. 5:3) Propaganda zinazoongozwa na roho waovu zitajaa duniani, na kuwapotosha wengi. (Ufu. 16:13, 14) Namna gani sisi? Hatutadanganywa ikiwa ‘tutahakikisha [au, kupima] mambo yote.’ (Soma 1 Wathesalonike 5:21.) Neno la Kigiriki linalotafsiriwa “hakikisheni” lilitumiwa kuhusiana na kupima uhalisi wa madini yenye thamani. Hivyo, tunahitaji kupima mambo tunayosikia au tunayosoma ili kuthibitisha ukweli wake. Jambo hilo lilikuwa muhimu kwa Wathesalonike, na litakuwa muhimu zaidi kwetu dhiki kuu inapokaribia. Badala ya kukubali kila jambo ambalo watu wanasema, tunatumia uwezo wetu wa kufikiri ili kulinganisha mambo tunayosoma au yale tunayosikia na mambo ambayo Biblia na tengenezo la Yehova linasema. Tukifanya hivyo, hatutadanganywa na propaganda yoyote ya roho waovu au njia nyingine ya ujanja.​—Met. 14:15; 1 Tim. 4:1.

16. Tuna tumaini gani hakika, na tumeazimia kufanya nini?

¹⁶ Wakiwa kikundi, watumishi wa Mungu wataokoka dhiki kuu. Hata hivyo, tukiwa mtu mmoja-mmoja hatujui mambo tutakayokabili wakati ujao. (Yak. 4:14) Ingawa hivyo, iwe tutaokoka dhiki kuu tukiwa hai au tutakufa kabla ya wakati huo, Yehova atatuthawabisha kwa kutupa uzima wa milele ikiwa tutaendelea kuwa waaminifu. Watiwa-mafuta watakuwa pamoja na Kristo mbinguni. Kondoo wengine watakuwa katika paradiso duniani. Acheni sisi sote tuendelee kukazia fikira tumaini letu zuri na kuendelea kuwa tayari kwa ajili ya siku ya Yehova!