1. Yehova anawakaribisha waabudu wake wafanye nini? (Tazama pia picha.)

 TUNAWEZA kuzungumza na nani tunapohitaji faraja na mwongozo? Tunajua jibu la swali hilo. Tunaweza kuzungumza na Yehova Mungu katika sala. Yehova anatukaribisha tufanye hivyo. Anataka tusali mara nyingi—‘tusali bila kuacha.’ (1 The. 5:17) Tunaweza kusali kwake kwa uhuru na kumwomba mwongozo kuhusu jambo lolote katika maisha yetu. (Met. 3:5, 6) Kwa kuwa Yehova ni Mungu mkarimu, anatukaribisha tusali kwake mara nyingi tupendavyo.

2. Tutazungumzia nini katika makala hii?

² Tunathamini zawadi ya sala. Ingawa hivyo, kwa sababu tuna shughuli nyingi, huenda ikawa vigumu kwetu kupata muda wa kusali. Pia, huenda tukahisi kwamba tunahitaji kuboresha sala zetu. Inafurahisha kujua kwamba Maandiko yanaweza kutupatia mwongozo na kututia moyo. Katika makala hii, tutachunguza jinsi tunavyoweza kutenga muda wa kusali kwa kuchunguza mfano wa Yesu. Pia, tutazungumzia jinsi tunavyoweza kuboresha sala zetu, kwa kuzungumzia mambo matano muhimu tunayoweza kutaja katika sala.

3. Yesu alielewa nini kuhusu sala?

³ Yesu alielewa kwamba Yehova anathamini sana sala zetu. Muda mrefu kabla ya kuja duniani alimwona Baba yake akijibu  sala za wanaume na wanawake waaminifu. Kwa mfano, Yesu alikuwa kando ya Baba yake alipojibu sala za unyoofu za Hana, Daudi, Eliya, na watumishi wengine wengi waaminifu. (1 Sam. 1:10, 11, 20; 1 Fal. 19:4-6; Zab. 32:5) Ndiyo sababu Yesu aliwafundisha wanafunzi wake wasali mara nyingi na wakiwa na uhakika!—Mt. 7:7-11.

4. Tunajifunza nini kutokana na sala ya Yesu?

⁴ Kupitia sala alizotoa kwa Yehova, Yesu aliwawekea wanafunzi wake mfano. Katika huduma yake yote, Yesu alisali mara nyingi. Alihitaji kutenga muda wa kusali kwa sababu mara nyingi alikuwa na shughuli nyingi na alizungukwa na watu wengi. (Marko 6:31, 45, 46) Aliamka asubuhi na mapema ili awe na muda wa kusali akiwa peke yake. (Marko 1:35) Katika pindi moja, alisali usiku kucha kabla ya kufanya uamuzi muhimu. (Luka 6:12, 13) Na Yesu alisali tena na tena usiku wa kabla ya kifo chake alipokuwa akikazia fikira kutimiza sehemu ngumu zaidi ya mgawo wake duniani.​—Mt. 26:39, 42, 44.

5. Tunawezaje kumwiga Yesu tunaposali?

⁵ Mfano wa Yesu unatufundisha kwamba hata tuwe na shughuli nyingi kadiri gani, tunahitaji kutenga muda wa kusali. Kama Yesu, tunahitaji kupanga muda wa kusali—tunaweza kuamka asubuhi na mapema ili kusali au tunaweza kusali usiku. Tunapofanya hivyo, tunamwonyesha Yehova kwamba tunathamini zawadi hii ya pekee. Dada anayeitwa Lynne anakumbuka jinsi alivyochochewa alipojifunza kwa mara ya kwanza kuhusu pendeleo la sala. Anasema hivi: “Nilipojifunza kwamba ninaweza kuzungumza na Yehova wakati wowote, hilo lilinisaidia kumwona kama Rafiki yangu wa karibu na kutamani kuboresha sala zangu.” Bila shaka, wengi wetu tunahisi hivyo pia. Basi, acheni tuchunguze mambo matano muhimu tunayoweza kutaja katika sala zetu.

6. Kulingana na Ufunuo 4:10, 11, Yehova anastahili kupokea nini?

⁶ Msifu Yehova. Katika maono yenye kustaajabisha, mtume Yohana aliwaona wazee 24 mbinguni wakimwabudu Yehova. Walimsifu Mungu na kusema kwamba anastahili kupokea “utukufu na heshima na  nguvu.” (Soma Ufunuo 4:10, 11.) Pia, malaika waaminifu wana sababu nyingi za kumsifu na kumtukuza Yehova. Wanaishi pamoja naye mbinguni na wanamjua vizuri. Wanaona sifa zake kupitia mambo anayofanya. Wanapomwona Yehova akitenda, wanachochewa kumsifu.​—Ayu. 38:4-7.

7. Tunaweza kumsifu Yehova kuhusu nini?

⁷ Sisi pia tungependa kumsifu Yehova katika sala zetu, tukitaja mambo tunayopenda na kuthamini kumhusu. Unaposoma na kujifunza Biblia, jaribu kutambua sifa za Yehova ambazo hasa unavutiwa nazo. (Ayu. 37:23; Rom. 11:33) Kisha umwambie Yehova jinsi unavyohisi kuhusu sifa hizo. Pia, tunaweza kumsifu Yehova kwa sababu ya jinsi ambavyo ametusaidia na kuwasaidia ndugu na dada zetu wote Wakristo. Sikuzote anatutunza na kutulinda.​—1 Sam. 1:27; 2:1, 2.

8. Ni baadhi ya sababu gani nyingi ambazo zinatufanya tumshukuru Yehova? (1 Wathesalonike 5:18)

⁸ Mshukuru Yehova. Tuna sababu nyingi za kumshukuru Yehova katika sala. (Soma 1 Wathesalonike 5:18.) Tunaweza kumshukuru kwa ajili ya kitu chochote kizuri tulicho nacho; kwa sababu kila zawadi njema hutoka kwake. (Yak. 1:17) Kwa mfano, tunaweza kumshukuru kwa dunia yetu maridadi na vitu vyenye kustaajabisha alivyoumba. Pia, tunaweza kumshukuru kwa uhai wetu, familia yetu, rafiki zetu, na tumaini letu. Na tungependa kumshukuru Yehova kwa kuturuhusu tufurahie urafiki wenye thamani pamoja naye.

9. Kwa nini tunahitaji kusitawisha mtazamo wa shukrani kumwelekea Yehova?

⁹ Huenda tukahitaji kufanya jitihada za pekee ili kufikiria sababu ambazo zinatufanya sisi binafsi tumshukuru Yehova. Tunaishi katika ulimwengu usio na shukrani. Mara nyingi watu hukazia fikira vitu wanavyotaka, badala ya kukazia fikira mambo wanayoweza kufanya ili kuonyesha shukrani kwa ajili ya vitu walivyo navyo. Ikiwa tutaathiriwa na mtazamo huo, sala zetu zinaweza kuwa orodha ya mambo tunayotaka. Ili jambo hilo lisitokee, tunapaswa kuendelea kusitawisha na kuonyesha shukrani kwa ajili ya mambo yote ambayo Yehova anatufanyia.​—Luka 6:45.

10. Hisia za shukrani zilimsaidiaje dada fulani kuvumilia? (Tazama pia picha.)

¹⁰ Kuwa na mtazamo wa shukrani kunaweza kutusaidia kuvumilia hali ngumu. Fikiria simulizi la dada Kyung-sook, linalopatikana katika gazeti la Mnara wa Mlinzi la Januari 15, 2015. Aligunduliwa kwamba ana kansa ya mapafu. Alisema hivi: “Ugonjwa huo uliniathiri sana, nilihisi kwamba nimepoteza kila kitu, na niliogopa sana.” Ni nini kilichomsaidia kuvumilia? Alisema kwamba kila usiku kabla ya kulala, alienda kwenye paa la nyumba yake na kusali kwa  sauti kuhusu mambo matano ambayo alithamini kuwa nayo siku hiyo. Kufanya hivyo, kulimpunguzia mahangaiko na kumchochea kuonyesha upendo wake kwa Yehova. Alijionea jinsi Yehova anavyowasaidia watumishi wake waaminifu wanapokabili hali ngumu, na akatambua kwamba tuna baraka nyingi maishani kuliko changamoto tunazokabili. Kama Kyung-sook, tuna sababu nyingi za kumshukuru Yehova, hata ikiwa tunakabili jaribu fulani. Tunapomshukuru katika sala, hilo linaweza kutusaidia kuvumilia na kuendelea kuwa na utulivu.

11. Kwa nini wanafunzi wa Yesu walihitaji ujasiri baada ya Yesu kurudi mbinguni?

¹¹ Mwombe Yehova akupe ujasiri katika huduma. Muda mfupi kabla ya kurudi mbinguni, Yesu aliwakumbusha wanafunzi wake kuhusu mgawo wao wa kutoa ushahidi kumhusu “katika Yerusalemu, katika Yudea yote na Samaria, na mpaka sehemu ya mbali zaidi ya dunia.” (Mdo. 1:8; Luka 24:46-48) Muda mfupi baadaye, viongozi wa Kiyahudi walimkamata mtume Petro na Yohana na kuwaleta mbele ya Sanhedrini, wakawaamuru wanaume hao waaminifu waache kuhubiri, na hata wakawatisha. (Mdo. 4:18, 21) Petro na Yohana walitendaje?

12. Kulingana na Matendo 4:29, 31, wanafunzi walifanya nini?

¹² Baada ya kutishwa na viongozi wa Kiyahudi, Petro na Yohana walisema hivi: “Kama ni sawa machoni pa Mungu kuwasikiliza ninyi badala ya Mungu, hukumuni ninyi wenyewe. Lakini sisi hatuwezi kuacha kusema kuhusu mambo ambayo tumeyaona na kuyasikia.” (Mdo. 4:19, 20) Petro na Yohana walipoachiliwa huru, wanafunzi walipaza sauti zao kwa Yehova katika sala ambayo ilikazia kufanya mapenzi yake. Walisali hivi: “Nawe uwawezeshe watumwa wako waendelee kutangaza neno lako kwa ujasiri wote.” Yehova alijibu sala hiyo ya unyoofu.​—Soma Matendo 4:29, 31.

13. Tunaweza kujifunza nini kutokana na mfano wa Jin-hyuk?

¹³ Tunaweza kuwaiga wanafunzi hao kwa kuendelea kuhubiri hata ikiwa wenye mamlaka watatuamuru tuache kuhubiri. Fikiria mfano wa Jin-hyuk, ndugu aliyefungwa gerezani kwa sababu ya msimamo wake wa kutounga mkono upande wowote. Alipokuwa gerezani, alipewa kazi ya kuwashughulikia baadhi ya wafungwa waliokuwa katika kifungo cha upweke, lakini hakuruhusiwa kuzungumza nao kuhusu mambo ambayo hayakuhusiana na kazi yake, kutia ndani Biblia. Alisali apate ujasiri na busara ili ahubiri kila alipopata fursa. (Mdo. 5:29) Anasema hivi: “Yehova alijibu sala zangu kwa kunipa ujasiri na hekima ya kuanzisha mafunzo ya Biblia ya dakika tano kwenye milango ya vyumba vya gerezani. Kisha, usiku, niliandika barua ambazo ningewapa wafungwa siku iliyofuata.” Sisi pia tunaweza kuwa na uhakika kwamba Yehova atatusaidia kutimiza huduma yetu. Kama Jin-hyuk, tunaweza kusali ili tupate ujasiri na hekima.

14. Ni nini kinachoweza kutusaidia tunapokabiliana na matatizo? (Zaburi 37:3, 5)

¹⁴ Mwombe Yehova akusaidie uvumilie licha ya matatizo. Wengi wetu tunakabiliana na changamoto za magonjwa au za kihisia, kufiwa na mpendwa wetu, hali fulani ngumu katika familia, mateso, au matatizo mengine. Na mambo kama vile mlipuko wa magonjwa na vita yamefanya iwe vigumu hata zaidi kushughulika na changamoto hizo. Mmiminie  Yehova moyo wako. Mwambie kuhusu hali yako kama ambavyo ungemwambia rafiki wa karibu. Uwe na uhakika kwamba Yehova “atatenda kwa niaba yako.”​—Soma Zaburi 37:3, 5.

15. Sala inawezaje kutusaidia ‘kuvumilia chini ya dhiki’? Toa mfano.

¹⁵ Kudumu katika sala kutatusaidia ‘kuvumilia chini ya dhiki.’ (Rom. 12:12) Yehova anajua mambo ambayo waabudu wake wanavumilia—yeye “husikia kilio chao cha kuomba msaada.” (Zab. 145:18, 19) Dada Kristie ambaye ni painia wa kawaida mwenye umri wa miaka 29, alijionea ukweli na jambo hilo. Bila kutarajia alianza kusumbuliwa na ugonjwa mbaya. Matokeo ni kwamba alishuka moyo sana. Baadaye, alipata habari kwamba mama yake alikuwa amepatikana na ugonjwa usioweza kutibiwa. Kristie anasema hivi: “Nilisali kwa bidii kwa Yehova ili anipe nguvu nilizohitaji kila siku. Nilijitahidi kufuata ratiba nzuri ya kiroho kwa kuhudhuria mikutano na kujifunza kibinafsi.” Anaongezea hivi: “Sala ilinisaidia kukabiliana na nyakati ngumu. Nilijua kwamba sikuzote Yehova alikuwa pamoja nami, na kujua jambo hilo kulinifariji sana. Ingawa ugonjwa wangu haukwisha mara moja, Yehova alijibu sala zangu kwa kunipa amani ya ndani na utulivu moyoni.” Acheni tusisahau kamwe kwamba “Yehova anajua jinsi ya kuwakomboa kutoka kwenye jaribu watu wenye ujitoaji-kimungu.”​—2 Pet. 2:9.

16. Kwa nini tunahitaji msaada wa Yehova ili kupinga majaribu?

¹⁶ Mwombe Yehova akusaidie kupinga majaribu. Tukiwa wanadamu wasio wakamilifu, sikuzote tunapambana dhidi ya majaribu ya kufanya mambo mabaya. Shetani anafanya yote anayoweza ili kufanya pambano hilo liwe ngumu hata zaidi. Njia moja anayojaribu kupotosha fikira zetu ni kupitia  burudani zenye upotovu wa maadili. Burudani kama hizo hujaza akili yetu mawazo machafu—mawazo yanayomchafua yule mtu tuliye kwa ndani na yanayoweza kutuongoza kwenye dhambi nzito.​—Marko 7:21-23; Yak. 1:14, 15.

17. Baada ya kusali ili tupate msaada, tunapaswa kufanya nini ili tuepuke majaribu? (Tazama pia picha.)

¹⁷ Tunahitaji msaada wa Yehova ili tushinde majaribu ya kufanya mambo mabaya. Yesu alitia ndani ombi hili katika sala ya kielelezo: “Usituingize katika majaribu, bali utukomboe kutoka kwa yule mwovu.” (Mt. 6:13) Yehova anataka kutusaidia, lakini ni lazima tumwombe msaada. Pia, lazima tutende kulingana na sala zetu. Tunaweza kuchukua hatua hususa ili kuepuka kusoma au kusikiliza mawazo yasiyofaa ambayo yameenea katika ulimwengu wa Shetani. (Zab. 97:10) Tunaweza kujaza akili zetu mawazo yanayofaa kwa kusoma na kujifunza Biblia. Kuhudhuria mikutano na kuhubiri kutatusaidia pia kulinda fikira zetu. Naye Yehova anatuahidi kwamba hataacha tujaribiwe kuliko tunavyoweza kuhimili.​—1 Kor. 10:12, 13.

18. Sisi sote tunahitaji kufanya nini inapohusu sala?

¹⁸ Kuliko wakati mwingine wowote, kila mmoja wetu anahitaji kusali ili kuendelea kuwa mwaminifu kwa Yehova katika siku hizi za mwisho zilizo ngumu. Tenga wakati kila siku ili usali kutoka moyoni. Yehova anataka ‘tumwage mioyo yetu mbele zake’ katika sala. (Zab. 62:8) Msifu Yehova na umshukuru kwa mambo yote anayofanya. Mwombe akusaidie uwe mwenye ujasiri katika huduma. Msihi akusaidie kushughulika na tatizo lolote na kupinga majaribu yoyote ambayo huenda unakabili. Usimruhusu mtu au kitu chochote kikuzuie kusali kwa ukawaida kwa Yehova. Lakini Yehova anajibuje sala zetu? Tutachunguza swali hilo muhimu katika makala inayofuata.