1-2. (a) Kulingana na Waefeso 6:16, kwa nini tunahitaji “ngao kubwa ya imani”? (b) Tutajibu maswali gani?

JE, UNA “ngao kubwa ya imani”? (Soma Waefeso 6:16.) Bila shaka unayo. Kama ambavyo ngao kubwa hulinda sehemu kubwa ya mwili, imani yako hukulinda dhidi ya upotovu wa maadili, jeuri au ukatili, na mambo yoyote ya mfumo huu wa mambo uliopotoka yasiyopatana na viwango vya Mungu.

² Hata hivyo, tunaishi katika “siku za mwisho” na imani yetu itaendelea kujaribiwa. (2 Tim. 3:1) Unaweza kukagua jinsi gani ngao yako ya imani ili kuhakikisha kwamba ni imara? Na unaweza kufanya nini ili uendelee kuishikilia kwa nguvu ngao yako ya imani? Acheni tuchunguze majibu ya maswali hayo.

3. Wanajeshi walifanya nini na ngao zao, na kwa nini?

³ Katika nyakati za Biblia, kwa kawaida wanajeshi walikuwa na ngao zilizofunikwa kwa ngozi. Wanajeshi walizipaka mafuta ili kutunza ngozi na kulinda sehemu za chuma zisipate kutu. Ikiwa mwanajeshi aligundua kwamba ngao yake ilikuwa imeharibika, alihakikisha kwamba imerekebishwa ili sikuzote awe tayari kwa ajili ya pambano lililofuata. Mfano huo unahusuje imani yako?

4. Kwa nini ni lazima uikague ngao yako ya imani, na unapaswa kufanya hivyo jinsi gani?

⁴ Kama ilivyokuwa kwa wanajeshi wa nyakati za kale, ni lazima wewe pia uikague kwa makini na kuidumisha ngao yako ya imani ili siku zote uwe tayari kwa ajili ya pambano. Tukiwa Wakristo, tuna pigano la kiroho na adui zetu wanatia ndani roho waovu. (Efe. 6:10-12) Hakuna mtu yeyote anayeweza kudumisha  ngao yako ya imani kwa niaba yako. Unaweza kuhakikishaje kwamba una imani iliyo tayari kukabili majaribu? Kwanza, unapaswa kusali ili upate msaada wa Mungu. Kisha, unahitaji kutumia Neno la Mungu ili likusaidie kujiona kama Mungu anavyokuona. (Ebr. 4:12) Biblia inasema hivi: “Mtumaini Yehova kwa moyo wako wote, wala usitegemee uelewaji wako mwenyewe.” (Met. 3:5, 6) Ukiwa na hilo akilini, kwa nini usichunguze upya baadhi ya maamuzi uliyofanya hivi karibuni? Kwa mfano, je, umekabili tatizo kubwa la kifedha? Je, ulikumbuka ahadi hii ya Yehova kwenye Waebrania 13:5: “Sitakuacha wala kukutupa kamwe”? Je, ahadi hiyo ilikupa uhakika wa kwamba Yehova atakusaidia? Ikiwa ndivyo, jambo hilo linaonyesha kwamba unaendelea kuidumisha ngao yako ya imani ikiwa katika hali nzuri.

5. Huenda ukagundua nini unapoichunguza imani yako?

⁵ Huenda ukashangazwa na yale utakayogundua unapoichunguza kwa makini imani yako. Huenda ukatambua udhaifu fulani ambao hukujua kwamba unao. Kwa mfano, unaweza kutambua kwamba mahangaiko yasiyo ya lazima, uwongo, na mambo yenye kuvunja moyo yameidhoofisha imani yako. Ikiwa umepatwa na jambo hilo, unaweza kuilindaje imani yako ili isiendelee kudhoofika zaidi?

6. Taja baadhi ya mahangaiko ambayo ni mazuri.

⁶ Baadhi ya mahangaiko ni mazuri. Kwa mfano, inafaa kuhangaikia jinsi tunavyoweza kumpendeza Yehova na Yesu. (1 Kor. 7:32) Ikiwa tumefanya dhambi nzito, tunahangaikia sana kurudisha urafiki wetu pamoja na Mungu. (Zab. 38:18) Pia, tunahangaikia kumpendeza mwenzi wetu wa ndoa na kuwaandalia watu wa familia yetu na pia waamini wenzetu mahitaji yao.—1 Kor. 7:33; 2 Kor. 11:28.

7. Kulingana na Methali 29:25, kwa nini hatupaswi kuwaogopa wanadamu?

⁷ Kwa upande mwingine, mahangaiko yasiyo ya lazima yanaweza kudhoofisha imani yetu. Kwa mfano, huenda tukahangaika mara kwa mara kuhusu kupata chakula na mavazi ya kutosha. (Mt. 6:31, 32) Ili kupunguza mahangaiko hayo, huenda tukaelekeza fikira zetu katika kujitafutia vitu vya kimwili. Huenda hata tukaanza kupenda pesa. Ikiwa tutaruhusu jambo hilo litupate, imani yetu kwa Yehova itaanza kudhoofika na tutapatwa na madhara makubwa ya kiroho. (Marko 4:19; 1 Tim. 6:10) Au huenda tukaathiriwa na aina nyingine ya mahangaiko yasiyo ya lazima, yaani, kuhangaikia kupita kiasi maoni ya watu kutuelekea au kupata kibali chao. Kisha, huenda tukaogopa kudhihakiwa au kuteswa na wanadamu kuliko tunavyoogopa kumchukiza Yehova. Ili tujilinde dhidi ya hatari hiyo, tunapaswa kumsihi Yehova atupatie imani na ujasiri tunaohitaji ili kukabiliana na changamoto hiyo.—Soma Methali 29:25; Luka 17:5.

8. Tunapaswa kutendaje tunaposikia habari za uwongo kutuhusu?

⁸ Shetani, “baba ya uwongo,” anawatumia wale walio chini ya mamlaka yake kueneza uwongo kumhusu Yehova na kuhusu ndugu na dada zetu. (Yoh. 8:44) Kwa mfano, waasi-imani husambaza uwongo na kupotosha ukweli kuhusu tengenezo la Yehova kwenye tovuti mbalimbali, televisheni, na vyanzo vingine vya habari. Habari hizo za uwongo ni miongoni mwa ‘mishale inayowaka moto’ ya Shetani. (Efe. 6:16) Tunapaswa kutendaje mtu fulani anapotushambulia kwa uwongo kama huo? Tutakataa kumsikiliza! Kwa nini? Kwa sababu tuna imani katika Yehova na tunawatumaini ndugu zetu. Isitoshe,  hatuwasiliani kwa vyovyote na waasi-imani. Haturuhusu mtu yeyote au kitu chochote, kutia ndani udadisi, kitufanye tuanze kubishana nao.

9. Mambo yenye kuvunja moyo yanaweza kutuathirije?

⁹ Mambo yenye kuvunja moyo yanaweza kudhoofisha imani yetu. Hatuwezi kupuuza matatizo yetu. Isitoshe, kufanya hivyo kungekuwa kukwepa wajibu wetu. Nyakati nyingine huenda tukavunjika moyo, lakini hatupaswi kuruhusu matatizo yetu yatawale fikira zetu. Tukifanya hivyo, huenda tumaini zuri ambalo Yehova ametupatia likaanza kufifia. (Ufu. 21:3, 4) Hisia za kuvunjika moyo zinaweza kufanya tuishiwe na nguvu na kusababisha tukate tamaa. (Met. 24:10) Tusiruhusu jambo hilo litupate.

10. Unajifunza nini kutokana na barua ya dada mmoja?

¹⁰ Ona jinsi dada mmoja anayeishi Marekani anavyodumisha imani yake huku akimtunza mume wake ambaye ni mgonjwa sana. Katika barua aliyoandikia makao makuu, alisema hivi: “Nyakati nyingine, hali yetu imetuletea mkazo mkubwa na kutuvunja moyo, lakini tumaini letu ni imara. Ninathamini sana kwa mambo yote ambayo tumekuwa tukipokea ili kuimarisha imani yetu na kututia moyo. Kwa kweli, tunahitaji ushauri na kitia-moyo hicho. Mambo hayo yanatusaidia tuendelee kusonga mbele na tuvumilie majaribu ambayo Shetani anatutupia.” Maelezo ya dada huyo yanatufundisha kwamba tunaweza kufanikiwa kushinda hali zenye kuvunja moyo! Jinsi gani? Yaone matatizo yako kuwa majaribu kutoka kwa Shetani. Tambua kwamba Yehova ndiye Chanzo chako cha faraja. Na uthamini chakula cha kiroho anachoandaa.

11. Ili kupima hali ya imani yetu, tunapaswa kujiuliza maswali gani?

¹¹ Je, umetambua sehemu zozote katika ngao yako ya imani zinazohitaji kurekebishwa? Katika kipindi cha miezi michache iliyopita, je, umefanikiwa kuepuka mahangaiko yasiyo ya lazima? Je, umekataa kishawishi cha kuwasikiliza au kubishana na waasi-imani kuhusu uwongo wanaosambaza? Na je, umefaulu kushinda hali zenye kuvunja moyo? Ikiwa  ndivyo, basi imani yako iko katika hali nzuri. Lakini tunapaswa kuendelea kuwa macho kwa sababu Shetani ana silaha nyingine anazojaribu kutumia ili kutushambulia. Acheni sasa tuzungumzie mojawapo ya silaha hizo.

12. Kupenda vitu vya kimwili kunaweza kutuathirije?

¹² Kupenda vitu vya kimwili kunaweza kutukengeusha na kutufanya tupuuze ngao yetu ya imani. Mtume Paulo alisema hivi: “Mtu anayetumikia akiwa mwanajeshi hajihusishi katika shughuli za kibiashara za maisha, ili apate kibali cha yule aliyemwandikisha kuwa mwanajeshi.” (2 Tim. 2:4) Isitoshe, wanajeshi wa Roma hawakuruhusiwa kujihusisha na kazi nyingine yoyote. Ingekuwaje ikiwa mwanajeshi angepuuza takwa hilo?

13. Kwa nini mwanajeshi hakupaswa kujihusisha na shughuli za kibiashara?

¹³ Wazia mfano huu. Asubuhi moja, kundi la wanajeshi linafanya mazoezi wakitumia panga zao, lakini mwanajeshi mmoja hayupo. Mwanajeshi huyo yuko mjini akiuza chakula sokoni. Jioni, wanajeshi wanatumia wakati kukagua mavazi yao ya vita na kunoa panga zao. Lakini yule mwanajeshi mwenye biashara yake anatumia wakati huo kutayarisha chakula kwa ajili ya kuuza siku inayofuata. Hata hivyo, asubuhi inayofuata, adui anashambulia ghafla. Ni mwanajeshi yupi atakayekuwa tayari kwa ajili ya pigano na kupata kibali cha kamanda wake? Na ni mwanajeshi yupi ambaye ungependa asimame kando yako—je, ni mwanajeshi aliyekazia fikira matayarisho yake au yule aliyekengeuka?

14. Tukiwa wanajeshi wa Kristo, ni jambo gani tunaloliona kuwa lenye thamani?

¹⁴ Tukiwa wanajeshi wazuri, hatukengeuki kutoka kwenye lengo letu kuu, yaani, kupata kibali cha Makamanda wetu, Yehova na Kristo. Kupata kibali cha Yehova na Yesu ni jambo lenye thamani zaidi kuliko kitu chochote kinachoahidiwa na ulimwengu wa Shetani. Tunahakikisha kwamba tuna wakati na nguvu tunazohitaji ili kumtumikia Yehova na kuendelea kuitunza ngao yetu ya imani na  sehemu nyingine za vazi letu la kiroho zikiwa katika hali nzuri.

15. Paulo alituonya kuhusu nini, na kwa nini?

¹⁵ Sikuzote ni lazima tuendelee kuwa macho. Kwa nini? Mtume Paulo alionya kwamba ‘wale ambao wameazimia kuwa matajiri watapotoshwa kutoka kwenye imani.’ (1 Tim. 6:9, 10) Neno ‘watapotoshwa’ linaonyesha kwamba tunaweza kukengeuka tunapojaribu kujitafutia vitu visivyo vya lazima. Kisha, tunaweza kuanza kusitawisha moyoni “tamaa nyingi za kijinga zenye kudhuru.” Badala ya kuruhusu tamaa hizo ziingie moyoni mwetu, tunapaswa kuziona kuwa silaha zinazoweza kutudhuru.

16. Simulizi lililo kwenye Marko 10:17-22 linapaswa kutuchochea tutafakari maswali gani?

¹⁶ Tuseme kwamba una pesa za kutosha za kununua vitu vingi vya kimwili. Je, ni kosa kununua vitu tunavyotaka ambavyo kwa kweli hatuvihitaji? Si lazima iwe hivyo. Hata hivyo, fikiria maswali haya: Hata kama tuna uwezo wa kununua kitu fulani, je, kweli tuna wakati na nguvu za kukitumia na kukidumisha? Je, hatutaanza kuvipenda kupita kiasi vitu vyetu vya kimwili? Je, kupenda vitu vya kimwili kunaweza kutufanya tutende kama yule mwanamume kijana aliyekataa mwaliko wa Yesu wa kupanua utumishi wake kwa Mungu? (Soma Marko 10:17-22.) Ni jambo bora sana kuishi  maisha rahisi na kutumia wakati na nguvu zetu zenye thamani kufanya mapenzi ya Mungu.

17. Hatupaswi kusahau jambo gani?

¹⁷ Hatupaswi kamwe kusahau kwamba tuko vitani na ni lazima tuwe tayari kupambana kila siku. (Ufu. 12:17) Ndugu na dada zetu hawawezi kutubebea ngao yetu ya imani. Ni lazima sisi wenyewe tuishike kwa nguvu.

18. Kwa nini wanajeshi katika nyakati za zamani waliendelea kuzishika kwa nguvu ngao zao?

¹⁸ Katika nyakati za zamani, mwanajeshi aliheshimika kwa sababu ya ujasiri wake vitani. Lakini aliaibika ikiwa angerudi nyumbani bila ngao yake. Mwanahistoria Mroma Tacitus aliandika hivi: “Lilikuwa jambo la aibu sana kurudi bila ngao.” Hiyo ni mojawapo ya sababu iliyofanya wanajeshi waendelee kuzishika kwa nguvu ngao zao.

19. Tunaweza kufanya nini ili tuendelee kuishika kwa nguvu ngao yetu ya imani?

¹⁹ Tunaendelea kuishika kwa nguvu ngao yetu ya imani kwa kuhudhuria mikutano ya Kikristo kwa ukawaida na kwa kuwaeleza wengine kuhusu jina la Yehova na Ufalme wake. (Ebr. 10:23-25) Pia, tunasoma Neno la Mungu kila siku na kusali kwa Yehova ili atusaidie kufuata mashauri na mwongozo wake katika kila jambo tunalofanya. (2 Tim. 3:16, 17) Hivyo, hakuna silaha yoyote ambayo Shetani atatumia dhidi yetu itakayotuletea madhara yoyote ya kudumu. (Isa. 54:17) ‘Ngao yetu kubwa ya imani’ itatulinda. Tutasimama imara, bega kwa bega pamoja na ndugu na dada zetu. Na tutafanya mengi zaidi ya kushinda tu mapambano yetu ya kila siku—tutakuwa na pendeleo la kuwa upande wa Yesu atakaposhinda vita dhidi ya Shetani na wafuasi wake.—Ufu. 17:14; 20:10.