1, 2. (a) Mwanzoni, maneno ya Yesu katika Mathayo 24:12 yaliwahusu nani? (b) Kitabu cha Matendo kinaonyeshaje kwamba Wakristo wengi wa karne ya kwanza waliendelea kuonyesha upendo? (Tazama picha mwanzoni mwa makala hii.)

SEHEMU moja ya ishara ambayo Yesu alitoa kuhusu “umalizio wa mfumo wa mambo” ni kuwa “upendo wa walio wengi zaidi [ungepoa].” (Mt. 24:3, 12) Katika karne ya kwanza, Wayahudi ambao walidai kuwa watu wa Mungu, waliruhusu upendo wao kwa Mungu upoe.

² Kwa upande mwingine, Wakristo wengi wakati huo waliendelea “kutangaza habari njema juu ya Kristo” kwa bidii, na kuonyesha kwamba wanampenda Mungu, Wakristo wenzao, na watu wengine. (Mdo. 2:44-47; 5:42) Hata hivyo, baadhi ya wafuasi wa Yesu katika karne ya kwanza waliruhusu upendo wao upoe.

3. Ni nini ambacho huenda kilisababisha upendo wa baadhi ya Wakristo upoe?

³ Yesu Kristo aliyefufuliwa aliwaambia hivi Wakristo wa karne ya kwanza walioishi Efeso: “Nina jambo hili dhidi yako, kwamba  umeacha upendo uliokuwa nao mwanzoni.” (Ufu. 2:4) Ni sababu gani ambayo huenda ilifanya awaambie hivyo? Inawezekana kwamba wanafunzi hao wa Kristo waliathiriwa na ulimwengu ulioongozwa na tamaa za mwili. (Efe. 2:2, 3) Kama ilivyo katika majiji mengi leo, Efeso la karne ya kwanza lilijawa na uovu. Lilikuwa jiji lenye utajiri mwingi ambalo watu walioishi humo walitanguliza maisha ya starehe, anasa, na raha. Ni wazi kwamba maisha hayo ya ubinafsi yalichukua mahali pa upendo usio na ubinafsi. Kwa kuongezea, mwenendo mpotovu na upotovu wa maadili wenye kuchukiza ulikithiri.

4. (a) Katika siku zetu, upendo umepoa katika njia zipi? (b) Upendo wetu unaweza kujaribiwa katika mambo gani matatu?

⁴ Unabii wa Yesu kuhusu kupungua kwa upendo unaendelea kutimizwa hata katika siku zetu. Leo upendo wa watu wengi kwa Mungu unaendelea kupoa. Mamilioni ya watu wamemwacha Mungu na kutegemea mashirika ya kibinadamu yawasuluhishie matatizo yao. Kwa hiyo, upendo wa watu ambao hawamwabudu Yehova Mungu unaendelea kupoa. Na kama ilivyokuwa katika kutaniko la Efeso la karne ya kwanza, huenda Wakristo wa kweli leo wakaruhusu upendo wao upoe. Sasa tutachunguza jinsi upendo wetu unavyoweza kujaribiwa kuhusu mambo haya matatu: (1) Upendo kwa Yehova, (2) upendo kwa kweli za Biblia, (3) na upendo kwa ndugu zetu.

5. Kwa nini tunapaswa kumpenda Mungu?

⁵ Mapema katika siku ambayo Yesu alionya kuhusu kupungua kwa upendo, alikazia upendo ulio muhimu zaidi. Alisema hivi: “‘Lazima umpende Yehova Mungu wako kwa moyo wako wote na kwa nafsi yako yote na kwa akili yako yote.’ Hii ndiyo amri iliyo kuu na ya kwanza.” (Mt. 22:37, 38) Kwa kweli, kuwa na upendo wenye kina kwa Mungu kunatusaidia kutii amri za Yehova, kuvumilia, na kuchukia mabaya. (Soma Zaburi 97:10.) Hata hivyo, Shetani na ulimwengu wake unajitahidi kudhoofisha upendo wetu kwa Mungu.

6. Watu wamepatwa na nini kwa kuruhusu upendo wao kwa Mungu upoe?

⁶ Ulimwengu unaotuzunguka una maoni yaliyopotoka kuhusu upendo. Badala ya kumpenda Muumba, watu ni “wenye kujipenda wenyewe.” (2 Tim. 3:2) Ulimwengu huu unaotawaliwa na Shetani unachochea “tamaa ya mwili na tamaa ya macho na mtu kujionyesha mali yake maishani.” (1 Yoh. 2:16) Mtume Paulo aliwaonya Wakristo wenzake dhidi ya kutosheleza tamaa za mwili kwa kusema hivi: “Kukaza akili juu ya mwili humaanisha kifo . . . kwa sababu kukaza akili juu ya mwili humaanisha uadui na Mungu.” (Rom. 8:6, 7) Kwa kweli, wale ambao wametumia maisha yao kufuatia vitu vya kimwili au kutosheleza tamaa za ngono wamevunjika moyo na kuumia sana.—1 Kor. 6:18; 1 Tim. 6:9, 10.

7. Wafuasi wa Kristo wanakabili hatari zipi leo?

⁷ Katika nchi fulani, watu wanaoamini na kutangaza waziwazi kuwa hakuna Mungu, au wanaoamini kuwa mambo ya Mungu hayawezi kujulikana, na wanamageuzi hawachochei tu maoni yanayomomonyoa upendo kwa Mungu, bali pia imani katika yeye. Wamewasadikisha wengi kwamba mtu anayeamini kuwa kuna Muumba ni mshamba au mjinga. Wakati huohuo, wanasayansi hutukuzwa, na hilo hufanya wengi wasimkumbuke Muumba wetu. (Rom. 1:25) Tukisikiliza mafundisho kama hayo, huenda tukakengeuka kutoka kwa Yehova, na upendo wetu unaweza kupoa.—Ebr. 3:12.

8. (a) Watu wengi wa Yehova wanakabili hali gani zenye kuvunja moyo? (b) Tunapata kitia moyo gani katika Zaburi 136?

⁸ Tukijiruhusu tuvunjike moyo, imani yetu inaweza kudhoofika na kufanya upendo  wetu kwa Mungu upoe. Katika ulimwengu huu mwovu unaoongozwa na Shetani, nyakati nyingine sisi sote hukabili hali zenye kuvunja moyo. (1 Yoh. 5:19) Huenda kwa sasa tunakabili matatizo yanayosababishwa na uzee, afya mbaya, au mkazo wa kiuchumi. Au labda tunavunjika moyo kwa sababu ya hisia za kwamba hatufai, matarajio ambayo hayajatimia, au udhaifu wetu. Lakini hatupaswi kamwe kuruhusu hali au hisia kama hizo zifanye tusadiki kwamba Yehova ametuacha. Badala yake, tunapaswa kutafakari maneno yenye kutia moyo kuhusu upendo wa milele wa Yehova kutuelekea. Tunasoma maneno kama hayo katika andiko la Zaburi 136:23 linalosema hivi: “Alitukumbuka tulipokuwa katika hali ya chini: Kwa maana fadhili zake zenye upendo ni za mpaka wakati usio na kipimo.” Kwa kweli, upendo mshikamanifu wa Yehova kwa watumishi wake ni wa kudumu. Hivyo, tunaweza kuwa na uhakika kwamba anasikiliza “kilio cha ombi” letu na kutujibu.—Zab. 116:1; 136:24-26, Biblia Habari Njema.

9. Ni nini kilichompa Paulo nguvu za kudumisha upendo wake kwa Mungu?

⁹ Kama mtunga zaburi, Paulo aliimarishwa alipotafakari jinsi Yehova alivyomtegemeza sikuzote. Paulo aliandika hivi: “Yehova ni msaidizi wangu; sitaogopa. Mwanadamu anaweza kunitenda nini?” (Ebr. 13:6) Uhakika huo imara wa Paulo kwamba Yehova angemtegemeza kwa upendo ulimsaidia kukabiliana na matatizo maishani. Hakuruhusu hali ngumu zimvunje moyo. Kwa kweli, alipokuwa mfungwa, Paulo aliandika barua kadhaa zenye kutia moyo. (Efe. 4:1; Flp. 1:7; Flm. 1) Naam, hata alipojaribiwa vikali, Paulo alidumisha upendo wake kwa Mungu. Ni nini kilichompa nguvu za kufanya hivyo? Aliendelea kumtegemea “Mungu wa faraja yote, ambaye hutufariji katika dhiki yetu yote.” (2 Kor. 1:3, 4) Tunaweza kumwigaje Paulo na kudumisha upendo wetu kwa Yehova ukiwa imara?

10. Tunaweza kudumishaje upendo wetu kwa Yehova ukiwa imara?

¹⁰ Paulo mwenyewe anataja njia moja kuu ya kudumisha upendo wetu kwa Yehova ukiwa imara. Aliwaandikia hivi waamini wenzake: “Salini bila kuacha.” Baadaye aliandika hivi: “Dumuni katika sala.” (1 The. 5:17; Rom. 12:12) Kuwasiliana na Mungu kupitia sala ndio msingi wa kuwa na uhusiano wa karibu pamoja naye. (Zab. 86:3) Tunapotumia muda wa kutosha kumweleza Yehova mawazo na hisia zetu za ndani kabisa, tunamkaribia zaidi Baba yetu wa mbinguni, aliye “msikiaji wa sala.” (Zab. 65:2) Kwa kuongezea, tunapotambua kwamba Yehova anajibu sala zetu, upendo wetu kwake huongezeka. Tunafahamu kabisa kuwa “Yehova yuko karibu na wote wanaomwitia.” (Zab. 145:18) Uhakika huo kuwa Yehova anatutegemeza kwa upendo utatusaidia kukabiliana na majaribu mengine ya imani.

11, 12. Tunaweza kusitawishaje upendo wenye kina kwa kweli za Biblia?

¹¹ Tukiwa Wakristo, tunathamini na kuikubali kweli. Neno la Mungu ndilo chanzo pekee cha kweli. Yesu alisema hivi alipokuwa akisali kwa Baba yake: “Neno lako ni kweli.” (Yoh. 17:17) Kwa hiyo, tunaanza kuipenda kweli tunapopata ujuzi sahihi wa Neno la Mungu. (Kol. 1:10) Hata hivyo, mengi yanahusika zaidi ya kupata tu ujuzi. Ona jinsi mwandikaji wa Zaburi 119 aliyeongozwa na roho anavyotusaidia kuelewa kile kinachomaanishwa na kupenda kweli za Biblia. (Soma Zaburi 119:97-100.) Je, sisi hutumia muda fulani kutafakari mistari kadhaa ya Biblia tunapokuwa katika shughuli zetu za kila siku? Tutathamini kweli za Biblia hata zaidi tunapotafakari jinsi  tunavyonufaika kwa kutumia kweli hizo maishani mwetu.

¹² Mtunga zaburi alisema hivi pia: “Jinsi maneno yako yamekuwa laini katika kaakaa langu, kuliko asali kinywani mwangu!” (Zab. 119:103) Vivyo hivyo, tunaweza kufurahia chakula kitamu cha kiroho kinachotegemea Biblia tunachopata katika tengenezo la Mungu. Tunaweza kuruhusu chakula hicho kibaki kinywani mwetu kwa njia ya mfano ili tuweze kukumbuka “maneno yenye kupendeza” ya kweli na kuyatumia kuwasaidia wengine.—Mhu. 12:10.

13. Ni nini kilichomsaidia Yeremia kupenda kweli za Biblia, na hilo lilimchocheaje?

¹³ Nabii Yeremia alipenda kweli za Biblia. Ona jinsi maneno ya Mungu yalivyochochea moyo wake. “Maneno yako yalipatikana, nami nikayala; na neno lako linakuwa kwangu furaha na kushangilia kwa moyo wangu; kwa maana jina lako limeitwa juu yangu, Ee Yehova Mungu wa majeshi.” (Yer. 15:16) Kwa njia ya mfano, Yeremia alikula na kumeng’enya maneno ya Mungu yenye thamani kwa kuyatafakari. Alipofanya hivyo, alisitawisha uthamini wa kutoka moyoni wa pendeleo la kuitwa kwa jina la Mungu. Je, upendo wetu kwa kweli za Biblia umetuchochea kutambua pendeleo la pekee tulilo nalo la kuitwa kwa jina la Mungu na kutangaza Ufalme wake katika siku hizi za mwisho?

14. Tunaweza kuongezaje upendo wetu kwa kweli za Biblia?

¹⁴ Mbali na kusoma Biblia na machapisho yanayotegemea Biblia, ni katika njia gani nyingine tunayoweza kusitawisha upendo wenye kina kwa kweli za Biblia? Tunaweza kuongeza upendo wetu kwa kweli za Biblia kwa kuhudhuria mikutano ya kutaniko kwa ukawaida. Njia moja ya msingi ambayo tunafundishwa Biblia kila juma ni kupitia gazeti la Mnara wa Mlinzi. Ili tuelewe somo tunalojifunza, tunahitaji kutayarisha vizuri Funzo la Mnara wa Mlinzi la kila juma. Njia moja tunayoweza kufanya hivyo ni kwa kuchunguza kila andiko lililotajwa. Kwa sasa, gazeti la Mnara wa Mlinzi linaweza kupakuliwa kwenye tovuti ya jw.org/sw au kupitia JW Library inayopatikana katika lugha nyingi. Baadhi ya mifumo ya kielektroni hufanya iwe rahisi kusoma maandiko yaliyotajwa katika kila makala ya funzo. Lakini hata iwe tunatumia njia gani, tunaposoma maandiko hayo kwa makini na kuyatafakari,  upendo wetu kwa kweli za Biblia utaongezeka.—Soma Zaburi 1:2.

15, 16. (a) Tuna jukumu gani kulingana na Yohana 13:34, 35? (b) Ni kwa njia gani upendo tulio nao kwa ndugu zetu unahusiana na upendo wetu kwa Mungu na kwa Biblia?

¹⁵ Yesu aliwaambia hivi wanafunzi wake katika usiku wake wa mwisho hapa duniani: “Ninawapa ninyi amri mpya, kwamba mpendane; kama vile ambavyo nimewapenda ninyi, ninyi nanyi mpendane vivyo hivyo. Kwa jambo hili wote watajua kwamba ninyi ni wanafunzi wangu, mkiwa na upendo kati yenu wenyewe.”—Yoh. 13:34, 35.

¹⁶ Kuwa na upendo kwa ndugu na dada zetu kunahusiana na upendo tulio nao kumwelekea Yehova. Kwa hakika, hatuwezi kuwapenda ndugu na dada zetu na kukosa kumpenda Yehova, au kumpenda Yehova na kukosa kuwapenda ndugu na dada zetu. Mtume Yohana aliandika hivi: “Yeye ambaye hampendi ndugu yake, ambaye amemwona, hawezi kuwa anampenda Mungu, ambaye hajamwona.” (1 Yoh. 4:20) Isitoshe, upendo wetu kwa Yehova na kwa ndugu zetu unahusiana na upendo wetu kwa Biblia. Kwa nini? Kwa sababu upendo kuelekea kweli za Biblia hutuchochea kutii kutoka moyoni amri ya Kimaandiko ya kumpenda Mungu na kuwapenda ndugu zetu.—1 Pet. 1:22; 1 Yoh. 4:21.

17. Tunaweza kuonyesha upendo katika njia zipi?

¹⁷ Soma 1 Wathesalonike 4:9, 10. Kuna mifano gani ya jinsi tunavyoweza kuonyesha upendo kutanikoni? Huenda ndugu au dada mwenye umri mkubwa akahitaji usafiri wa kwenda kwenye mikutano ya Kikristo. Labda mjane fulani anahitaji msaada wa kukarabati vitu nyumbani kwake. (Yak. 1:27) Ndugu na dada waliovunjika moyo, walioshuka moyo, au wanaokabili majaribu mengine wanahitaji uangalifu wetu, kitia moyo, na faraja licha ya umri wao. (Met. 12:25; Kol. 4:11) Tunathibitisha kwamba tunawapenda kikweli ndugu zetu tunapoonyesha kwa maneno na matendo kuwa tunawahangaikia sana “wale ambao katika imani ni jamaa zetu.”—Gal. 6:10.

18. Ni nini kinachoweza kutusaidia kushinda matatizo madogo-madogo ya kutoelewana na waamini wenzetu?

¹⁸ Biblia ilitabiri kwamba katika “siku za mwisho” za mfumo huu mwovu wa mambo, watu wangekuwa na roho ya ubinafsi na pupa. (2 Tim. 3:1, 2) Kwa hiyo, tukiwa Wakristo tunapaswa kujitahidi kuimarisha upendo wetu kwa Mungu, kwa kweli za Biblia, na miongoni mwetu wenyewe. Ni kweli kwamba huenda nyakati nyingine tukawa na matatizo madogo-madogo ya kutoelewana na waamini wenzetu. Hata hivyo, sote kutanikoni tutapata baraka nyingi tunapochochewa na upendo kutatua hali yoyote ya kutoelewana kwa njia ya upendo! (Efe. 4:32; Kol. 3:14) Kwa hiyo, tusiruhusu kamwe upendo wetu upoe! Badala yake, acheni tuendelee kuwa na upendo wenye kina kwa Yehova, Neno lake, na ndugu zetu.