Katika makala iliyotangulia, tulizungumzia ishara ambayo Yesu alitoa. Ishara hiyo inathibitisha kwamba Ufalme wa Mungu umesimamishwa mbinguni na Yesu Kristo ndiye Mfalme.

Biblia inasema kwamba Yesu alipopewa mamlaka ya Ufalme, alimfukuza Shetani na roho waovu kutoka mbinguni. Utendaji wao unawaathiri wanadamu kwa kiwango kikubwa na ndio sababu mambo yamekuwa mabaya sana duniani tangu mwaka 1914. —Ufunuo 12:7, 9.

Licha ya hali mbaya zilizopo duniani, Yesu akiwa Mfalme wa Ufalme wa Mungu, amefanya mambo fulani ili kuwasaidia wanadamu duniani pote. Kama Yesu alivyotabiri, elimu ya Biblia inatolewa duniani pote. Elimu hii imewasaidia watu wengi kujifunza na kutumia kanuni za Biblia maishani mwao. (Isaya 2:2-4) Mamilioni ya watu wamejifunza jinsi ya kuwa na maoni yanayofaa kuhusu kazi, wameboresha maisha ya familia zao, na wanafurahia vitu vya kimwili bila kuwa watumwa wa vitu hivyo. Mambo wanayojifunza yanawanufaisha sasa na kuwasaidia kuwa na sifa ambazo Mungu anatazamia raia wa Ufalme wake wawe nazo.

Ingawa sasa Yesu anatawala mbinguni, bado serikali za wanadamu zinatawala dunia. Hata hivyo, Mungu alimwambia Yesu hivi: “Nenda ukitiisha . . . maadui wako.” (Zaburi 110:2) Hivi karibuni, Yesu atawaangamiza kabisa wapinzani wake na kuwaletea faraja wale wote wanaomtii Mungu kwa hiari.

Wakati huo, Ufalme wa Mungu utachukua hatua ya

• Kuharibu dini ya uwongo. Dini ambazo zimefundisha uwongo kumhusu Mungu na zimefanya maisha ya watu yawe magumu zitaangamizwa. Biblia inalinganisha dini ya uwongo na kahaba ambaye ataharibiwa hivi karibuni. Wengi watashtuka kuona dini hizo zikiharibiwa.—Ufunuo 17:15, 16.

• Kukomesha utawala wa wanadamu. Ufalme wa Mungu utachukua hatua ya kuzikomesha serikali zote za wanadamu. —Ufunuo 19:15, 17, 18.

• Kuwaangamiza watu waovu. Namna gani wale ambao wameazimia kufanya mambo mabaya na wanakataa kumtii Mungu? “Waovu, wataangamizwa kutoka duniani.”—Methali 2:22.

• Kumwangamiza Shetani na roho waovu. Shetani na roho waovu hawatakuwa na uwezo wa ‘kupotosha mataifa tena.’ —Ufunuo 20:3, 10.

Mambo hayo yote yatawanufaishaje watu watakaokubali Ufalme wa Mungu?

Yesu akiwa Mfalme mbinguni, atatimiza mambo mengi kuliko mwanadamu yeyote. Yesu atatawala pamoja na wengine 144,000 ambao wamechaguliwa kutoka kwa wanadamu. (Ufunuo 5:9, 10; 14:1, 3) Atahakikisha kwamba mapenzi ya Mungu yanatimizwa hapa duniani. Ufalme wa Mungu utawatimizia nini wakaaji wa dunia?

• Utaondoa magonjwa na kifo. “Hakuna mkaaji atakayesema: ‘Mimi ni mgonjwa,’” na “kifo hakitakuwapo tena.” —Isaya 33:24; Ufunuo 21:4.

• Utahakikisha kuna amani ya kweli na usalama. “Amani ya wana wako itakuwa nyingi,” na “wataketi, kila mtu chini ya mzabibu wake na chini ya mtini wake, na hakuna yeyote atakayewaogopesha.” —Isaya 54:13; Mika 4:4.

• Utaandaa kazi yenye kuridhisha. “Watu wangu niliowachagua watafurahia kikamili kazi ya mikono yao. Hawatafanya kazi ya bure.”—Isaya 65:22, 23.

• Utafanya mazingira yawe bora. “Nyika na nchi iliyokauka zitafurahi, na jangwa tambarare litashangilia na kuchanua maua kama zafarani.”—Isaya 35:1.

• Utawafundisha wanadamu mambo wanayopaswa kufanya ili waishi milele. “Uzima wa milele ndio huu, wakujue wewe, Mungu wa pekee wa kweli, na yule uliyemtuma, Yesu Kristo.”—Yohana 17:3.

Mungu anataka ufurahie baraka hizo. (Isaya 48:18) Makala inayofuata inazungumzia mambo unayopaswa kufanya ili ufurahie baraka hizo za wakati ujao.