Neno la Mungu la Kiunabii Hutoa Tumaini kwa Wakati Ujao

KWA sababu ya Neno la Mungu, Biblia Takatifu, Wakristo wa kweli hutazamia wakati ujao kwa imani, tumaini na kwa kutarajia mema. Kwa kuwa wana uhusiano mzuri pamoja na Yehova Mungu, wao huutazamia wakati ujao kwa hamu. Kama vile hotuba ya ufunguzi kwenye Mikusanyiko wa Wilaya ya “Neno la Mungu la Kiunabii” ilivyoeleza, Mashahidi wa Yehova wamekuwa wanafunzi wenye bidii wa unabii wa Biblia kwa miaka mingi. Hivyo, Yehova aliwaandalia watu wake nini kwenye mikusanyiko hiyo? Wakiwa na Biblia mikononi, wahudhuriaji wote walitaka sana kujua. Kichwa cha kila siku ya mkusanyiko huonyeshwa kikiwa kichwa kidogo tofauti.

SIKU YA KWANZA: Kutembea Katika Nuru ya Neno la Mungu

Hotuba “Neno la Mungu Limetuongoza” ilifafanua kwamba watu wa Yehova ni kama mtu aanzaye safari kukiwa na giza la usiku. Kunapoanza kupambazuka yeye huona vitu kwa weusi-weusi, lakini jua linapoangaza juu yeye huviona waziwazi. Kama ilivyotabiriwa kwenye Mithali 4:18, watu wa Yehova pia wameona njia yao waziwazi kwa nuru nyangavu ya kweli ya neno la Mungu la kiunabii. Wao hawaachwi wajikwae katika giza la kiroho.

Hotuba ya msingi, “Sikiliza Neno la Mungu la Kiunabii,” iliwakumbusha wasikilizaji kwamba wale wanaomtegemea Yehova, tofauti na watu ambao hufuata mesiya na manabii wa uwongo, hawatamauki wala hawavunjiki moyo. Tofauti kabisa na mesiya hao wa uwongo, Mesiya wa kweli Yesu Kristo, ana sifa nyingi sana zenye kumtambulisha! Kwa mfano, kugeuzwa-umbo kimuujiza kwa Yesu, kulionyesha kimbele vile ambavyo angeonekana akiwa Mfalme aliyetawazwa wa Ufalme wa Mungu. Tangu apokee mamlaka ya Ufalme mwaka wa 1914, Yesu pia amekuwa ndiye “nyota ya mchana” inayotajwa kwenye 2 Petro 1:19. “Akiwa Nyota ya Mchana ya Kimesiya, atangaza siku mpya, au muhula mpya, unaopambazuka kwa ajili ya wanadamu wote watiifu,” msemaji akasema.

 Programu ya alasiri ilianza kwa hotuba “Kung’aa Tukiwa Wamulikaji” iliyofafanua andiko la Waefeso 5:8, ambapo mtume Paulo atushauri ‘tuendelee kutembea kama watoto wa nuru.’ Wakristo ni wamulikaji, si kwa kuzungumza tu na wengine kuhusu Neno la Mungu bali pia kwa kutumia Biblia maishani mwao kwa kumwiga Yesu.

Ili tuwe wamulikaji wa aina hiyo, ni lazima ‘Tupendezwe na Kusoma Neno la Mungu.’ Hotuba hiyo ilizungumziwa katika mfululizo wenye sehemu tatu. Baada ya kutaja maneno ya Abraham Lincoln, aliyeiita Biblia “zawadi bora zaidi ambayo Mungu amepata kumpa mwanadamu,” msemaji wa kwanza aliwauliza wasikilizaji kile ambacho mazoea yao ya usomaji huonyesha kuhusu uthamini wao wa Neno la Yehova. Wasikilizaji walitiwa moyo waisome Biblia kwa makini, wakichukua wakati kutafakari masimulizi ya Kimaandiko na kulinganisha mambo mapya na yale wanayojua tayari.

Sehemu ya pili ya mfululizo huo ilikazia uhitaji wa kujifunza, si kusoma kijuujuu tu, ikiwa tutaweka akilini “chakula kigumu.” (Waebrania 5:13, 14) Kujifunza kunajenga hasa, akasema msemaji, ‘tukitayarisha mioyo yetu’ mapema, kama alivyofanya Ezra, kuhani Mwisraeli. (Ezra 7:10) Lakini kwa nini kujifunza ni muhimu sana? Kwa sababu kwahusiana moja kwa moja na uhusiano wetu pamoja na Yehova. Hivyo, funzo la Biblia lapaswa kuwa lenye thamani, lenye kupendeza, na lenye kuburudisha, hata ingawa lahusisha kujidhibiti kiakili na kujitahidi. Sisi hupataje wakati wa kujifunza ifaavyo? Kwa ‘kununua kabisa wakati unaofaa’ kutoka kwa shughuli zisizo za muhimu sana, akasema msemaji wa mwisho katika mfululizo huo. (Waefeso 5:16) Naam, tunaweza kupata wakati kwa kutumia vema kabisa wakati tulio nao.

Hotuba “Mungu Humpa Nguvu Mwenye Kuchoka” ilionyesha kwamba siku hizi watu wengi wamechoka. Ili tupate kuwa na “nguvu ipitayo iliyo ya kawaida” kwa ajili ya huduma ya Kikristo, twahitaji kumtegemea Yehova, ambaye “huwapa nguvu wazimiao.” ( 2 Wakorintho 4:7; Isaya 40:29) Misaada inayotutia nguvu yatia ndani Neno la Mungu, sala, kutaniko la Kikristo, kushiriki kwa ukawaida katika huduma, waangalizi Wakristo, na kielelezo cha uaminifu cha wengine. Hotuba “Iweni Walimu kwa Kufikiria Wakati” ilikazia uhitaji wa Wakristo kuwa walimu na vilevile wahubiri na pia kujitahidi kusitawisha “usanifu wa kufundisha.”—2 Timotheo 4:2.

Hotuba ya mwisho siku hiyo, “Wapiganao na Mungu Hawatashinda,” ilitaja jitihada za hivi karibuni zenye kuelekezwa vibaya ambazo zinafanywa na nchi kadhaa kusudi Mashahidi wa Yehova wasingiziwe kuwa madhehebu hatari. Lakini hatuhitaji kuhofu, kwa kuwa andiko la Isaya 54:17 lasema: “Kila silaha itakayofanyika juu yako haitafanikiwa na kila ulimi utakaoinuka juu yako katika hukumu utauhukumu kuwa mkosa. Huu ndio urithi wa watumishi wa BWANA, na haki yao inayotoka kwangu mimi, asema BWANA.”

SIKU YA PILI: Mambo Yajulishwayo Kupitia Maandiko ya Kiunabii

Baada ya kuzungumzia andiko la Biblia la siku, wakusanyikaji walifurahia mfululizo wa  pili kwenye mkusanyiko, wenye kichwa “Kumtukuza Yehova Tukiwa Wachukuaji wa Nuru.” Hotuba ya kwanza ilionyesha kwamba lengo la Mkristo ni kumtukuza Yehova kwa kuhubiri kila mahali. Sehemu iliyofuata ilionyesha uhitaji wa kuwaelekeza wenye kuitikia kwenye tengenezo la Mungu. Jinsi gani? Kwa kutumia dakika tano au kumi kabla na baada ya kila funzo la Biblia nyumbani ili kuonyesha jinsi tengenezo la Mungu linavyofanya kazi. Hotuba ya tatu katika mfululizo huo ilikazia uhitaji wa kumtukuza Mungu kwa kazi njema.

Hotuba “Vipende Mno Vikumbusha vya Yehova” ilizungumzia mistari iliyoteuliwa kutoka Zaburi 119. Bila shaka, twahitaji vikumbusha, kwa kuwa sote tuna mwelekeo wa kusahau. Basi, ni muhimu kama nini kwamba kama mtunga-zaburi, tusitawishe upendo kwa vikumbusha vya Yehova!

Kisha sehemu yenye kuvutia ikafuata—hotuba ya ubatizo yenye kichwa “Kusikiliza Neno la Kiunabii Huongoza Kwenye Ubatizo.” Wataka-kubatizwa walikumbushwa kwamba wao humwiga Kristo si kwa kubatizwa tu bali pia kwa kufuata hatua zake kwa ukaribu. (1 Petro 2:21) Wapya hao wana pendeleo lililoje kushiriki katika kutimizwa kwa Yohana 10:16, ambapo Yesu alitabiri kwamba angekusanya “kondoo wengine” ili watumikie pamoja na wanafunzi wake watiwa-mafuta!

Hotuba ya kwanza katika programu ya alasiri, “Sikia Lile Ambalo Roho Husema” ilieleza kwamba roho ya Yehova husema nasi kupitia Biblia, “mtumwa mwaminifu na mwenye busara,” na dhamiri yetu iliyozoezwa na Biblia. (Mathayo 24:45) Hivyo, Wakristo hawahitaji kusikia sauti halisi kutoka mbinguni ili kujua jinsi wanavyoweza kumpendeza Mungu. Mazungumzo yaliyofuata, “Kuimarisha Fundisho Linalopatana na Ujitoaji-Kimungu,” yaliwahimiza Wakristo wasidadisi-dadisi maoni yenye kufisidi yanayoenezwa na ulimwengu huu. Kwa kweli, udadisi unaopita kiasi unaweza kutufanya tupokee habari yenye kudhuru kutoka kwa waasi-imani na wawakilishi wengine wa Shetani. Ni jambo lifaalo kama nini kusoma Biblia kwa ukawaida na vilevile kusoma makala yote katika Mnara wa Mlinzi na Amkeni!

Hotuba iliyofuata yenye kichwa “Endelea Kushika Kiolezo cha Maneno Yenye Afya,” ilikazia umuhimu wa kufahamu kabisa “kiolezo” au muundo wa Kimaandiko wa ile kweli. (2 Timotheo 1:13) Kufahamu kiolezo hicho hutuwezesha kuwa wenye kujitoa kwa Mungu na pia wenye kutambua yale ambayo hayapatani na kweli.

Ebu wazia kuonwa na Yehova kuwa mtu mwenye kutamanika. Ni heshima iliyoje! Hotuba “‘Vitu Vinavyotamaniwa’ Vinaijaza Nyumba ya Yehova,” iliyotegemea unabii wa Hagai, ilitia moyo sana kwa sababu iliwahakikishia wasikilizaji kwamba kila mshiriki wa “umati mkubwa” anatamanika kwelikweli kwa Yehova. (Ufunuo 7:9) Kwa hiyo, Yehova atawaokoa ‘atakapoyatikisa’ mataifa mara ya mwisho wakati wa “dhiki kubwa” inayokuja. (Hagai 2:7, 21, 22; Mathayo 24:21) Lakini, wakati huohuo inawapasa watu wa Yehova waendelee kulinda kiroho, kama ilivyofafanuliwa katika sehemu “Maandiko ya Kiunabii Hututahadharisha Tuwe Wenye Kulinda.” Msemaji alitaja maneno ya Yesu: “Fulizeni kulinda kwa sababu hamjui ni siku gani Bwana yenu anakuja.” (Mathayo 24:42) Tunadumuje tukiwa wenye kulinda kiroho? Kwa kuwa na mengi ya kufanya katika utumishi wa Yehova, kwa kusali sikuzote, na kwa kuendelea kuitarajia siku kubwa ya Yehova.

Hotuba ya mwisho siku hiyo ilikuwa na kichwa “Neno la Kiunabii Wakati wa Mwisho.” Hotuba hiyo itakumbukwa miaka mingi baadaye. Kwa nini? Kwa sababu msemaji alitangaza kutolewa kwa kitabu kipya—Sikiliza Unabii wa Danieli! “Kichapo hiki cha kurasa 320 chenye picha nzuri chazungumzia sehemu zote za kitabu cha Danieli,” msemaji akasema. Ni uthibitisho wenye kuimarisha imani kama nini kwamba Yehova anafafanua Neno lake la kiunabii!

SIKU YA TATU: Neno la Mungu la Kiunabii Halishindwi Kamwe

Siku ya mwisho ya mkusanyiko ilianza kwa mfululizo “Maneno ya Kiunabii kwa Ajili ya Wakati Uliowekwa Rasmi.” Sehemu tatu za mfululizo huo zilizungumzia matabiri matatu ya nabii Habakuki juu ya kutekelezwa kwa hukumu  za Yehova. Utabiri wa kwanza ulikuwa dhidi ya Yuda iliyopotoka na wa pili dhidi ya Babiloni lenye uonevu. Wa mwisho, ambao ungali utatimizwa, wahusu uharibifu unaokaribia wa wanadamu wote waovu. Akizungumza kuhusu Har–Magedoni, ndugu aliyetoa hotuba ya mwisho kwenye mfululizo huo aliwatia wasikilizaji wake hofu ifaayo ya kimungu aliposema: “Kwa kweli, litakuwa jambo lenye kutia kicho Yehova atakapoachilia kani yote ya nguvu zake kuu.”

Drama ya Biblia yenye kusisimua ilikuwa na kichwa “Kuthamini Urithi Wetu wa Kiroho.” Drama hiyo yenye kufanya watu wajichunguze mioyo ilionyesha tofauti kati ya Yakobo na Esau katika mtazamo wao wa mambo ya kiroho. Esau alidharau urithi wake wa kiroho, hivyo akapewa Yakobo ambaye aliutunza. ‘Yehova ametupatia urithi gani wa kiroho?’ wakusanyikaji wakaulizwa. “Kweli ya Neno lake, Biblia; tumaini la uhai udumuo milele; na heshima ya kumwakilisha tukiwa wapiga-mbiu wa habari njema,” msemaji akajibu.

Sehemu iliyofuata ilikuwa na kichwa “Urithi Wetu Wenye Thamani Humaanisha Nini Kwako?” Sisi huonyesha mtazamo ufaao kwa urithi wetu wa kiroho kwa kutanguliza utumishi wa Yehova na mapendeleo ya kiroho badala ya masilahi ya kibinafsi au ya kimwili. Hivyo sisi hujenga maisha yetu juu ya uhusiano wetu na Yehova, tofauti kabisa na Adamu, Esau, na Waisraeli wasio waaminifu.

Hotuba ya watu wote, “Kufanya Vitu Vyote Kuwa Vipya—Kama Ilivyotabiriwa,” ilionyesha jinsi matabiri manne ya msingi juu ya “mbingu mpya” na “dunia mpya” yanavyohusiana. (Isaya 65:17-25; 66:22-24; 2 Petro 3:13; Ufunuo 21:1, 3-5) Ni wazi kwamba Yehova alikusudia matabiri hayo yatimizwe kwa kiwango kikubwa zaidi ya vile yalivyotimizwa kwa watu wake waliorudishwa mwaka wa 537 K.W.K. Naam, alikusudia kuwepo na serikali yake ya Ufalme (zile “mbingu mpya”) na raia wake wa kidunia (ile “dunia mpya”), ambao watakaa katika paradiso tukufu ya ulimwenguni pote.

Mkusanyiko ulifikia tamati kwa hotuba yenye kusisimua na yenye kuchochea “Mataraja Yetu Tuongozwapo na Neno la Mungu.” Iliwakumbusha wote kwamba “wakati ubakio [wa kukamilisha kazi ya kutangaza Ufalme] umepunguzwa.” (1 Wakorintho 7:29) Naam, kutekelezwa kwa hukumu ya Yehova dhidi ya Shetani na mfumo wake wote mwovu wa mambo kutaanza hivi karibuni. Na tuwe na maoni kama yale ya mtunga-zaburi aliyeimba: “Nafsi zetu zinamngoja BWANA; yeye ndiye msaada wetu na ngao yetu.” (Zaburi 33:20) Wana matazamio matukufu kama nini ya wakati ujao, wale ambao mataraja yao yanategemea neno la Mungu la kiunabii!

[Picha katika ukurasa wa 7]

Drama yenye kusisimua ilizidisha uthamini kwa urithi wa kiroho wa watumishi wa Yehova

[Picha katika ukurasa wa 7]

Wengi waliosikiliza neno la Mungu la kiunabii walibatizwa