Unaweza Kupata Wapi Ushauri Mzuri?

“Kazi ya kutoa ushauri” sasa imekuwa biashara inayochuma mabilioni ya dola kwa mwaka. Watu wanataka msaada. Mtaalamu mmoja wa afya ya akili, Heinz Lehmann, asema hivi: “[Jamii ya leo] imepungukiwa kielimu na kijamii. Maadili ya kidini yamebadilika. Familia si thabiti sana . . . , na hivyo watu huhangaika.” Mwandishi Eric Maisel asema: “Watu ambao zamani waliwaendea wachawi, mapadre au madaktari wa familia ili wasaidiwe kutatua matatizo ya akili, kiroho na kimwili sasa wanaviendea vitabu vya kujisaidia ili kupata msaada.”

SHIRIKA la Kisaikolojia la Marekani lilianzisha kikosi cha kuchunguza biashara hiyo inayositawi sana. Kikosi hicho kilisema kwamba ingawa kuna “uwezekano mkubwa wa kuwasaidia watu wajielewe na kuwaelewa wengine . . . , madai na majina ambayo hutumiwa kutangaza programu za kuwasaidia watu yanazidi kutiwa chumvi na kufanywa yawe yenye kuvutia sana.” Mwandishi mmoja wa gazeti la Toronto Star asema: “Jihadharini na ushauri bandia wa kidini na kiroho. . . . Jihadharini hasa na vitabu vya kujisaidia, kanda au semina zinazoahidi mambo mengi sana, katika muda mfupi sana, bila uhitaji wa kujitahidi au kujitia nidhamu vya kutosha.” Ni kweli kwamba kuna watu wengi sana ambao kwa kweli wanataka kuwasaidia wale wenye uhitaji. Hata hivyo, jambo linalosikitisha ni kwamba watu kadhaa wasio wanyofu wanajinufaisha na upweke na kuteseka kwa watu, bila kutoa msaada au utatuzi wowote.

Kwa hiyo, ni wapi hasa tunapoweza kupata msaada? Ni wapi tuwezapo kupata ushauri wenye kutumika ambao utafanikiwa sikuzote?

Chanzo cha Mwongozo Hakika

Mhubiri Mmarekani wa karne ya 19, Henry Ward Beecher, alisema: “Biblia ni ramani ya Mungu iwezayo kukuongoza, kulinda meli yako isiharibike baharini, na kukuonyesha mahali bandari iko, na jinsi ya kuifikia bila kukwama miambani au mchangani. Mtu mwingine alisema hivi kuhusu Biblia: “Hakuna mtu awezaye kukomaa kiasi cha kwamba hahitaji Maandiko; kitabu hicho huzidi kueleweka kadiri miaka yetu iongezekavyo.” Kwa nini ufikirie chanzo hiki kwa makini sana?

Biblia yasema hivi ikijipendekeza yenyewe: “Andiko lote limepuliziwa na Mungu na ni lenye manufaa kwa kufundisha, kwa kukaripia, kwa kunyoosha mambo, kwa kutia nidhamu katika uadilifu, ili mtu wa Mungu apate kuwa hodari, aliyeandaliwa vifaa kikamili kwa ajili ya kila kazi njema.” (2 Timotheo 3:16, 17) Maandiko ya Biblia yametokana na Yehova Mungu, Chanzo chenyewe cha uhai. (Zaburi 36:9) Hivyo, yeye anajua sana maumbile yetu, kama andiko la Zaburi 103:14 linavyotukumbusha: “Kwa maana Yeye anatujua umbo letu,  na kukumbuka ya kuwa sisi tu mavumbi.” Hivyo tunaweza kuwa na hakika kabisa kwamba Biblia ni yenye manufaa.

Kwa kweli, Biblia ina kanuni na miongozo inayoweza kutumiwa kukunufaisha katika hali yoyote ile. Mungu atuambia hivi kupitia Biblia: “Njia ni hii, ifuateni.” (Isaya 30:21) Je, kweli Biblia inaweza kutimiza mahitaji ya watu leo? Ebu tuone.

Biblia Hutimiza Mahitaji Yetu . . .

Ya Kupambana na Mahangaiko. Biblia hutuambia: “Msihangaikie kitu chochote, bali katika kila jambo kwa sala na dua pamoja na utoaji-shukrani acheni maombi yenu ya bidii yajulishwe kwa Mungu; na amani ya Mungu izidiyo fikira yote kwa ubora italinda mioyo yenu na nguvu zenu za akili kwa njia ya Kristo Yesu.” (Wafilipi 4:6, 7) Je, kusali kumeweza kusaidia katika kupambana na mahangaiko ya kihisia-moyo yanayotokana na matatizo ya kiuchumi, kutendwa vibaya kingono na kutukanwa, au kifo cha mtu umpendaye? Fikiria jambo lifuatalo lililoonwa:

Baada ya kujua juu ya kutendwa vibaya kingono kwa binti yake, Jackie akiri hivi: “Ile hisia ya hatia kwa kutoweza kumlinda mtoto wako haiwezi kuelezeka. Imenibidi kupambana na hisia za uchungu, chuki, na hasira. Hisia hizo zilikuwa zimeanza kuharibu maisha yangu. Nilitaka sana Yehova aulinde moyo wangu.” Baada ya kusoma tena na tena andiko la Wafilipi 4:6, 7, alijitahidi sana kufuata ushauri wake. “Mimi husali kila siku, nikiomba tena na tena nisiache hisia zisizofaa ziniharibu, na Yehova amenisaidia kusitawisha moyo mtulivu na wenye furaha. Nahisi mwenye amani kwelikweli,” asema Jackie.

Huenda wewe pia ukajikuta katika hali ambayo huwezi kuidhibiti au kuikomesha, inayokuletea mahangaiko ya kihisia-moyo. Kwa kufuata shauri la Biblia la kusali, unaweza kupambana na hali ya namna hiyo kwa mafanikio. Mtunga-zaburi anatutia moyo kwa maneno haya: “Umkabidhi BWANA njia yako, pia umtumaini, naye atafanya.”—Zaburi 37:5.

Ya Kitia-Moyo. Mtunga-zaburi alisema hivi kwa uthamini: “BWANA nimependa makao ya nyumba yako, na mahali pa maskani ya utukufu wako. Mguu wangu umesimama palipo sawa; katika makusanyiko nitamhimidi BWANA.” (Zaburi 26:8, 12) Biblia inatutia moyo kukusanyika pamoja kwa ukawaida ili kumwabudu Yehova. Ushirika huo unaweza kutimizaje mahitaji yako? Baadhi ya watu wameuonaje ushirika huo?

Becky asimulia: “Wazazi wangu hawamtumikii Yehova, hivyo wao hunipinga ninapojaribu kufanya jambo lolote linalohusiana na utumishi wa Mungu. Mimi hujitahidi sana kuhudhuria mikutano.” Becky ahisi kwamba amebarikiwa sana kwa kuwa amejitahidi kuhudhuria mikutano ya Kikristo kwa ukawaida. “Mikutano huimarisha imani yangu, hivi kwamba ninaweza kuvumilia misongo ya kila siku nikiwa mwanafunzi, binti, na mtumishi wa Yehova. Watu kwenye Jumba la Ufalme ni tofauti sana na wanafunzi shuleni! Wananijali na kunisaidia, na mazungumzo yetu hunitia moyo sikuzote. Wao ni rafiki za kweli.”

Naam, tukifuata mwongozo wa Biblia wa kukutana kwa ukawaida, Yehova atatimiza uhitaji wetu wa kitia-moyo. Kwenye mikutano tunapata kujua ukweli wa maneno haya ya mtunga-zaburi: “Mungu kwetu sisi ni kimbilio na nguvu, msaada utakaoonekana tele wakati wa mateso.”—Zaburi 46:1.

Ya Kazi Yenye Kuridhisha na Ifaayo. “Iweni imara, wasioondoleka, sikuzote mkiwa na mengi ya kufanya katika kazi ya Bwana, mkijua kwamba kazi yenu ya jasho si bure kuhusiana na Bwana.” (1 Wakorintho 15:58) Je, “kazi ya Bwana” inaridhisha kikweli? Je, huduma ya Kikristo inatimiza jambo fulani lifaalo?

Amelia aeleza jinsi anavyohisi: “Nilijifunza Biblia pamoja na mume na mke ambao walikuwa  karibu kuachana. Pia nilimsaidia mwanamke ambaye binti yake aliuawa kijeuri. Mwanamke huyo aliumia sana kwa kuwa hakujua hali ya wafu. Katika visa vyote viwili, watu hao walipata amani na tumaini katika maisha yao kwa kutumia kanuni za Biblia. Ninafurahi na kuridhika sana kwa sababu nilipata fursa ya kuwasaidia.” Scott asema: “Ikiwa umepata matokeo mazuri katika huduma ya shambani, umeanzisha funzo la Biblia jipya, au kupata mafanikio fulani kutokana na kutoa ushahidi kivivi hivi, utazungumzia jambo hilo kwa miaka mingi ijayo. Unakuwa na hisia na msisimuko, kila usimuliapo jambo hilo! Huduma ndiyo hutokeza furaha kubwa zaidi na yenye kudumu.”

Ni wazi kwamba kufuata mwongozo wa Biblia wa kuwa wahudumu wenye bidii kumetimiza uhitaji wa watu hawa wa kuwa na kazi yenye kuridhisha na ya maana. Wewe pia unaalikwa ushiriki katika kazi hiyo ya kuelimisha wengine juu ya njia na kanuni za Mungu, na wakati uleule ujinufaishe.—Isaya 48:17; Mathayo 28:19, 20.

Kunufaika Kutokana na Neno la Mungu

Bila shaka, Biblia hutoa miongozo inayoweza kutumika katika ulimwengu wa leo. Ili itunufaishe, tunahitaji kujitahidi daima. Twapaswa kusoma, kujifunza, na kutafakari Biblia kwa ukawaida. Paulo alishauri hivi: “Fikiri kwa uzito juu ya mambo haya; vama katika hayo, ili kusonga mbele kwako kupate kuwa dhahiri kwa watu wote.” (1 Timotheo 4:15; Kumbukumbu la Torati 11:18-21) Mungu anakuhakikishia kwamba ukijitahidi kutumia ushauri wake upatikanao katika Biblia, utafanikiwa. Yeye anaahidi: “Mtumaini BWANA . . . Katika njia zako zote mkiri yeye, naye atayanyosha mapito yako.”—Mithali 3:5, 6.

[Picha katika ukurasa wa 31]

Kufuata ushauri wa Biblia hufanya maisha yawe yenye kuridhisha na kutosheleza